【專欄】踏著先祖先烈的血路前進，咱台灣欲行向叨位去？

文－陳月妙（台灣教授協會副會長、中正大學外文系前系主任退休教授）

昨暗，佇上帝殿堂濟南教會週五守護台灣祈禱會做全台語處境分享，講咱這塊土地一再輪迴佇外來勢力殖民過程中的抗爭史。

400冬來，外來勢力一再殖民咱的土地。因為高壓統治，咱台灣有過四大革命，荷蘭時代郭懷ㄧ、清治時代朱ㄧ貴、林爽文、戴潮春，猶閣有清殖民213年期間，3年一小反5年一大反，攏總有過143次革命的求生存抗爭過程（依陳冠學所著：四大革命）。

到1895年, 經過馬關條約，日本取得台灣的主權佇5.29澳底登陸進入台北城，軍隊行到桃園新竹，拄著足嚴重的抗爭，一路向南苗栗彰化雲林拍到屏東枋寮，到11月中，才完全降服台灣。事實上，山區的抵抗，持續20冬之久。

另外，佇近代日本治下的南部余清芳西來庵事件（1915，玉井焦吧哖事件）、中部莫那魯道霧社事件（1931），攏是真嚴重的抗日事件。

1945二戰終戰了後，中國蔣介石集團殘暴治下的1947年227大革命，致使228種族大屠殺（Formosa Genocide or Massacre）, 是近代湠全台灣上大規模強烈反抗高壓暴政的二月革命。可惜死傷如山、血流成河，毋過並無成功。

閣愈近期的反抗有美麗島事件（1979）、野百合學運（1990）、刑法100條抗爭（1991）、野草莓學運（2008）、太陽花學運（2014）反服貿事件等，攏是咱台灣先祖先烈一路傳承落來的，為著生存反抗的基因佮精神。

最後講著舊年的青鳥行動、今年規模史無前例全台強強滾的大罷免行動，更加是反抗外來入侵勢力的反共清除內奸護土護台的行動，親像史詩仝款雄偉壯麗的公民大覺醒運動。所以，大罷免雖罔無成功，毋過，對土地主體性大覺醒的角度來看，是大成功。對咱土地主體性的確認佮增強，歴史意義不凡，台灣歴史之筆，將來一定會記落一大篇章。

今花蓮9月23日下晡，發生足嚴重馬太鞍溪源頭堰塞湖爆破，爆發山洪土石流淹掉整個光復鄉。咱更加看著台灣人逐擺拄著天災地變的時陣，攏會出現一隊一隊一直來，水火中來去、滿身漉糊糜冒著自身性命危險的救災救難活菩薩大隊。猶閣有隨後數萬个救苦救難人間天使的圓鍬大隊鉛筆仔超人、雨鞋超人、義煮超人、怪手超人、醫護大隊等等，佮源源不絕的捐款行為，有錢出錢有力出力逐家救災無落人後。這種情景，一再一再顯示這塊多災多難土地子民，上韌性勇敢面對災難的時，普遍大我無私互助生存的強烈意志。

數萬年來咱這塊土地的子民，逐擺拄著天災地變，從來攏毋是哭父哭母趁火打劫，攏是褲腳衫仔pih起來，化身做千手觀音，衝到受災現場，做救苦救難的菩薩天使。

今咱台灣猶閣佇中華民國非法軍事佔領佮非法殖民台灣當中，咱欲何去何從？按照舊金山和平條約第2條，日本放棄福爾摩沙澎湖所有權利、頭銜佮請求權，第23條寫明美國是主要佔領權國，親像是台灣的第一監護人。所以，今年9月19日美國AIT在台協會已經向世界佮台灣人講出歴史真相，台灣主權未定，毋但不屬於中華民國，更加不屬於中華人民共和國，主權當然是屬於台灣人，這部份已定。只是，台灣一直被中華民國軍事佔領中，猶未執行自決建立屬於家己的國家，所以講台灣主權國家地位未定。

咱踏著先人行過，為著生存抗爭的血路，咱欲倚靠咱傳承對400冬來祖先拍死無退堅韌的台灣精神，繼續争取咱未來光明的的出路。就是，咱愛争取美國監護人終止中華民國非法的軍事佔領，予咱台灣人自決建國，建立屬於咱的主權獨立福爾摩沙台灣國。

按呢，咱台灣人就出頭天，頂天立地佇世界舞台頂、名正言順徛起來。偌會當按呢，咱絕對是全世界前五名內的國家。