【台語世界／錄音】國校ê好朋友

文、錄音／A-ka

我有一ê死忠兼換帖ê好朋友，名叫做阿英仔。伊kap我仝年歲，是讀國校仔chiah熟似–ê。伊ê頭鬃長長烏sìm-sìm，目睭têng-sûn圓lìn-lìn。笑起來有兩ê小小ê酒窟仔，看起來kài古錐。俗語講：「花食露水，人食嘴súi」，阿英仔就是chit款心肝善良，講話真甜，chiâⁿ好嘴ê囡仔。

因為伊tòa tī阮兜ê附近niā-niā，所以，若tú著歇睏日，阮會tiāⁿ-tiāⁿ相chhōe，做伙騎鐵馬，四界lin-long-se̍h。我有啥物心內話，lóng想beh kap伊分享。有時，伊會來阮chia開講、畫圖、食點心；有時，我會去in hia扮公伙仔、放風吹。莫怪阮阿媽chhiâng-chāi笑阮兩人是褲帶kat相黏，親像sai公仔siūⁿ-poe leh。

算–起-來，阮兩人mā chiâⁿ有緣，ùi一年仔開始，著仝一班到chit-má。上課ê時，阮會做伙讀冊寫字，認真聽老師ê教示；下課著去福利社買sì-siù-á，相招去chhū流籠、幌韆鞦。若耍了thiám ah，著倒tī運動埕ê草仔埔頂面，看天頂ê白雲變魔術，順sòa講心事。阿英仔hō͘我上感心ê所在是，便nā有人beh kā我創治，伊著會緊走來幫我解圍。莫怪阮ê感情會kap姊妹仔仝款，真親密。
有時陣，阮mā會因為意見bē合，soah冤家起呸面，同學去投hō͘老師聽。老師會氣phut-phut kā阮講：「若是兩人lóng m̄肯相讓，著mài鬥陣。」M̄-kú，等下課ê鐘仔聲一tân，阮著koh耍做伙，啥物鳥鼠仔冤lóng bē記得ah！我不時mā teh想，阮會當互相了解，個性chiah-ni̍h bā，he是因為阿英仔bē計較，chiâⁿ pun張，ta̍k項代誌lóng先替別人想。所以，會當kap伊熟似，一定是我頂世人有燒好香、做好代。

會記得有一pái，我人teh艱苦無爽快，著tī厝內歇睏兩工，無去學校上課。放學了後，阿英仔著專工來阮兜探望，看我有要緊–無，koh主動kā我ê作業chah–轉來，kā我講今仔日老師所教ê進度，叫我m̄-thang煩惱。伊koh送我一粒七彩透光ê玻璃珠仔，講he是伊一直khǹg tī身軀邊、上心愛ê寶貝。玻璃珠仔總共有兩粒，伊講一粒是伊的，一粒beh hō͘–我，希望我ê身體會當趕緊好起來。阿英ê關心kap陪伴，hō͘我真大ê安慰，心肝頭感覺chiâⁿ溫暖。

做代誌han-bān、表現普通、鈍腳鈍手ê我，身軀邊有一位chiah-ni̍h支持我、鼓勵我ê囡仔伴，hō͘我一點仔著bē孤單。Kap阿英同齊學習、chhit-thô ê日子，是我頭殼內底美好ê記持。我有chiah-ni̍h má-chih ê知己，che是真大ê福氣，我會好好仔寶惜。俗語講：「衫著新，人著舊。」珍貴難得ê感情像真珠，向望阮兩人ê情誼會當長長久久，做一世人知心ê好朋友。

台灣字（白話字）版

Kok-hāu ê Hó-pêng-iú

Góa ū chi̍t ê sí-tiong kiam ōaⁿ-thiap ê hó-pêng-iú, miâ kiò-chò A-Eng-á. I kap góa kâng nî-hòe, sī tha̍k kok-hāu-á chiah se̍k-sāi–ê. I ê thâu-chang tn̂g-tn̂g o͘-sìm-sìm, ba̍k-chiu têng-sûn îⁿ-lìn-lìn. Chhiò–khí-lâi ū nn̄g ê sió-sió ê chiú-khut-á, khòaⁿ–khí-lâi kài kó͘-chui. Sio̍k-gí kóng, “Hoe chia̍h lō͘-chúi, lâng chia̍h chhùi-súi.” A-Eng-á tō sī chit khoán sim-koaⁿ siān-liông, kóng-ōe chin tiⁿ, chiâⁿ hó-chhùi ê gín-á.

In-ūi i tòa tī gún tau ê hū-kīn niā-niā, só͘-í, nā tú-tio̍h hioh-khùn-ji̍t, gún ē tiāⁿ-tiāⁿ sio-chhōe, chò-hóe khiâ thih-bé, sì-kè lin-long-se̍h. Góa ū siáⁿ-mih sim-lāi-ōe, lóng siūⁿ beh kap i hun-hióng. Ū-sî, i ē lâi gún chia khai-káng, ōe-tô͘, chia̍h tiám-sim. Ū-sî, góa ē khì in hia pān-kong-hóe-á, pàng hong-chhoe. Bo̍k-koài gún a-má chhiâng-chāi chhiò gún nn̄g lâng sī khò͘-tòa kat sio-liâm, chhin-chhiūⁿ sai-kong-á-siūⁿ-poe leh.

Sǹg–khí-lâi, gún nn̄g lâng mā chiâⁿ ū-iân, ùi it-nî-á khai-sí, tio̍h kâng chi̍t pan kàu chit-má. Siōng-khò ê sî, gún ē chò-hóe tha̍k-chheh siá-jī, jīn-chin thiaⁿ lāu-su ê kà-sī. Hā-khò tio̍h khì hok-lī-siā bé sì-siù-á, sio-chio khì chhū-liû-lông hàiⁿ-chhia-chhiu. Nā sńg liáu thiám ah, tio̍h tó tī ūn-tōng-tiâⁿ ê chháu-á-po͘ téng-bīn, khòaⁿ thiⁿ-téng ê pe̍h-hûn piàn mô͘-su̍t, sūn-sòa kóng sim-sū. A-Eng-á hō͘ góa siōng kám-sim ê só͘-chāi sī, piān-nā ū lâng beh kā góa chhòng-tī, i tio̍h ē kín cháu lâi pang góa kái-ûi. Bo̍k-koài gún ê kám-chêng ē kap chí-mōe-á kâng-khoán, chin chhin-bi̍t.

Ū sî-chūn, gún mā ē in-ūi ì-kiàn bē ha̍h, soah oan-ke khí-phùi-bīn. Tông-o̍h khì tâu hō͘ lāu-su thiaⁿ. Lāu-su ē khì-phut-phut kā gún kóng, “Nā-sī nn̄g lâng lóng m̄-khéng sio-niū, tio̍h mài tàu-tīn.” M̄-kú, tán hā-khò ê cheng-á-siaⁿ chi̍t tân, gún tio̍h koh sńg chò-hóe, siáⁿ-mih niáu-chhí-á-oan lóng bē-kì-tit ah. Góa put-sî mā teh siūⁿ, gún ē-tàng hō͘-siong liáu-kái, kò-sèng chiah-ni̍h bā, he sī in-ūi A-Eng-á bē kè-kàu, chiâⁿ pun-tiuⁿ, ta̍k-hāng tāi-chì lóng seng thè pa̍t-lâng siūⁿ. Só͘-í, ē-tàng kap i se̍k-sāi, it-tēng sī góa téng-sì-lâng ū sio hó hiuⁿ, chò hó-tāi.

Ē-kì-tit ū chi̍t pái, góa lâng teh kan-khó͘ bô sóng-khoài, tio̍h tī chhù-lāi hioh-khùn nn̄g kang, bô khì ha̍k-hāu siōng-khò. Pàng-o̍h liáu-āu, A-Eng-á tio̍h choan-kang lâi gún tau thàm-bōng, khòaⁿ góa ū iàu-kín–bô, koh chú-tōng kā góa ê chok-gia̍p chah–tńg-lâi, kā góa kóng kin-á-ji̍t lāu-su só͘ kà ê chìn-tō͘, kiò góa m̄-thang hoân-ló. I koh sàng góa chi̍t lia̍p chhit-chhái thàu-kng ê po-lê-chu-á, kóng he sī i it-ti̍t khǹg tī sin-khu-piⁿ siōng sim-ài ê pó-pòe. Po-lê-chu-á chóng-kiōng ū nn̄g lia̍p, i kóng chi̍t lia̍p sī i ê, chi̍t lia̍p beh hō͘–góa, hi-bāng góa ê sin-thé ē-tàng kóaⁿ-kín hó–khí-lâi. A-Eng ê koan-sim kap pôe-phōaⁿ, hō͘ góa chin tōa ê an-ùi, sim-koaⁿ-thâu kám-kak chiâⁿ un-loán.

Chò tāi-chì han-bān, piáu-hiān phó͘-thong, tūn-kha-tūn-chhiú ê góa, sin-khu-piⁿ ū chi̍t-ūi chiah-ni̍h chhi-chhî–góa, kó͘-lē–góa ê gín-á-phōaⁿ, hō͘ góa chi̍t-tiám-á tio̍h bē ko͘-toaⁿ. Kap A-Eng tâng-chê ha̍k-si̍p chhit-thô ê ji̍t-chí, sī góa thâu-khak lāi-té bí-hó ê kì-tî. Góa ū chiah-ni̍h má-chih ê ti-kí, che sī chin tōa ê hok-khì, góa ē hó-hó-á pó-sioh. Sio̍k-gí kóng, “Saⁿ tio̍h sin, lâng tio̍h kū.” Tin-kùi lân-tit ê kám-chêng chhiūⁿ chin-chu, ǹg-bāng gún nn̄g lâng ê chêng-gî ē-tàng tn̂g-tn̂g-kú-kú, chò chi̍t-sì-lâng ti sim ê hó-pêng-iú.

讀hōo你聽