【台語世界／錄音】寫Hō͘查某囝ê一張Phoe

文、錄音／A-ka

阿bûn，我心愛ê查某囝：

Chit幾年，阿母一直m̄敢去看早前咱做伙hip ê舊相片。因為便nā看著，阿母ê心著bē-su石bō-á仝款真受拖磨，心內足艱苦- -ê，一時忍bē-tiâu著會開始流目屎，無法度控制家己ê情緒。M̄-kú，後- -來我發現，ùi你chēng紅嬰仔出世到大漢，ta̍k張相片lóng深深刻tī阮ê頭殼底，往事一幕一幕，親像cha-hng chiah發生過仝款。

Chit-kái ê「國中教育會考」，你考了無理想。阿母足想beh kā你lám- -一下，hō͘你溫暖kap力量。M̄-kú，你tiām-tiām無講話，kā家己關tī房間內底，lóng無beh出門。阿母知影你ê心情一定真bái，一定chiâⁿ鬱卒koh失志。因為你用hiah-ni̍h-á濟時間去準備，koh tī la̍h-ji̍t頂面做記號，ta̍k工算看iáu chhun幾工tō beh考試ah。你驚tī厝內會lán-si，規年thàng天，無論透風á-sī落雨，放學了後lóng留tiàm學校讀冊，讀到暗時九點chiah轉- -來。

你ê phah-piàⁿ，阿母lóng有看- -著，我chiâⁿ佩服你ê積極kap頂真。Chit-pái「會考」ê成績無理想，m̄是你ê能力無好，頭一pái參加chit種大型ê考試，心內難免會緊張、失覺察，m̄-thang想講未來著lóng無成功ê機會。今仔日ê表現失常，並無表示從今以後，你ê人生著烏有去ah。千萬m̄-thang失去你寶貴ê自信kap樂觀。阿母會陪伴tī你身軀邊，咱koh做伙勇敢面對下一場ê考驗。

阿母有注意- -著，你已經足久足久lóng無kap姊姊講話ah。姊姊ê身體khah lám，阿母用真濟時間hē心神看顧伊。你是m̄是因為按呢，感覺阿母對lín有大細心？其實我有gōa愛lín姊姊，著有gōa愛你；我有gōa疼惜你，tō有gōa疼姊姊。阿母分bē出有hō͘啥人khah濟，hō͘啥人khah少； kan-ta知影lín兩ê姊妹仔lóng是我上寶貝ê心肝仔囝。平凡ê阿母無法度ta̍k項代誌lóng處理kah真chiâu-chn̂g，做kah chiâⁿ周至，希望你會當體諒。你ê心內nā有啥物想法，mā會使開嘴kā阿母講。

自細漢，你著是一ê真貼心ê囡仔，kā家己照顧kah chiâⁿ好勢，阿母lóng m̄免煩惱，真感謝你chiah-ni̍h-á聽話bat代誌。Tī你ê身上，阿母看著家己少年時代chhóng-pōng好強ê個性，做人siuⁿ過驕傲自大，lia̍h準he著是自信，m̄知影thang謙虛相讓。因為有chit ê欠點，阿母tī人生ê路途kiâⁿ過真濟坎坎坷坷，常在跋倒受傷。所以，我真心希望你會當冷靜落來，thang看著家己不足ê所在，kā改變調整過來，避免受著kap阿母仝款ê痛苦。阿母向望你一世人lóng會當真自在、真快樂。

永遠愛你ê阿母

台灣字（白話字）版

Siá Hō͘ Cha-bó͘-kiáⁿ ê Chi̍t Tiuⁿ Phoe

A-bûn, góa sim-ài ê cha-bó͘-kiáⁿ：

Chit kúi nî, a-bú it-ti̍t m̄-káⁿ khì khòaⁿ chá-chêng lán chò-hóe hip ê kū siòng-phìⁿ. In-ūi piān-nā khòaⁿ- -tio̍h, a-bú ê sim tio̍h bē-su chio̍h-bō-á kâng-khoán chin siū thoa-bôa, sim-lāi chiok kan-khó͘- -ê. Chi̍t-sî jím-bē-tiâu tio̍h ē khai-sí lâu ba̍k-sái, bô-hoat-tō͘ khòng-chè ka-kī ê chêng-sû. M̄-kú, āu- -lâi góa hoat-hiān, ùi lí chēng âng-eⁿ-á chhut-sì kàu tōa-hàn, ta̍k-tiuⁿ siòng-phìⁿ lóng chhim-chhim khek tī gún ê thâu-khak-té. Óng-sū chi̍t bō͘ chi̍t bō͘, chhin-chhiūⁿ cha-hng chiah hoat-seng- -kòe kâng-khoán.

Chit-kái ê “Kok-tiong kàu-io̍k hōe-khó”, lí khó-liáu bô lí-sióng. A-bú chiok siūⁿ beh kā lí lám- -chi̍t-ē, hō͘ lí un-loán kap le̍k-liōng. M̄-kú, lí tiām-tiām bô kóng-ōe, kā ka-kī koaiⁿ tī pâng-keng lāi-té, lóng bô beh chhut-mn̂g. A-bú chai-iáⁿ lí ê sim-chêng it-tēng chin bái, it-tēng chiâⁿ ut-chut koh sit-chì. In-ūi lí iōng hiah-ni̍h-á chē sî-kan khì chún-pī, koh tī la̍h-ji̍t téng-bīn chò kì-hō, ta̍k-kang sǹg khòaⁿ iáu chhun kúi kang tō beh khó-chhì ah. Lí kiaⁿ tī chhù-lāi ē lán-si, kui-nî-thàng-thiⁿ, bô-lūn thàu-hong á-sī lo̍h-hō͘, pàng-o̍h liáu-āu lóng lâu tiàm ha̍k-hāu tha̍k-chheh, tha̍k kàu àm-sî káu-tiám chiah tńg- -lâi.

Lí ê phah-piàⁿ, a-bú lóng ū khòaⁿ- -tio̍h, Góa chiâⁿ pōe-ho̍k lí ê chek-ke̍k kap téng-chin. Chit-pái “hōe-khó” ê sêng-chek bô lí-sióng, m̄ sī lí ê lêng-le̍k bô hó. Thâu-chi̍t-pái chham-ka chit chióng tōa-hêng ê khó-chhì, sim-lāi lân-bián ē kín-tiuⁿ sit-kak-chhat. M̄-thang siūⁿ kóng bī-lâi tio̍h lóng bô sêng-kong ê ki-hōe. Kin-á-ji̍t ê piáu-hiān sit-siông, pēng bô piáu-sī chiông kim í-āu, lí ê jîn-seng tio̍h o͘-iú- -khì ah. Chhian-bān m̄-thang sit-khì lí pó-kùi ê chū-sìn kap lo̍k-koan. A-bú ē pôe-phōaⁿ tī lí sin-khu-piⁿ, lán koh chò-hóe ióng-kám bīn-tùi ē-chi̍t-tiûⁿ ê khó-giām.

A-bú ū chù-ì- -tio̍h, lí í-keng chiok kú chiok kú lóng bô kap ché-ché kóng-ōe ah. Ché-ché ê sin-thé khah lám, a-bú iōng chin chē sî-kan hē-sim-sîn khòaⁿ-kò͘- -i. Lí sī m̄ sī in-ūi án-ne, kám-kak a-bú tùi lín ū tōa-sè-sim? Kî-si̍t góa ū gōa ài lín ché-ché, tio̍h ū gōa ài lí; góa ū gōa thiàⁿ-sioh- -lí, tō ū gōa thiàⁿ ché-ché. A-bú hun bē chhut ū hō͘ siáⁿ-lâng khah chē, hō͘ siáⁿ-lâng khah chió, kan-ta chai-iáⁿ lín nn̄g ê chí-mōe-á lóng sī góa siōng pó-pòe ê sim-koaⁿ-á-kiáⁿ. Pêng-hoân ê a-bú bô-hoat-tō͘ ta̍k hāng tāi-chì lóng chhú-lí kah chin chiâu-chn̂g, chò kah chiâⁿchiu-chì, hi-bāng lí ē-tàng thé-liōng. Lí ê sim-lāi nā ū siáⁿ-mih siūⁿ-hoat, mā ē-sái khui-chhùi kā a-bú kóng.

Chū sè-hàn, lí tio̍h sī chi̍t ê chin tah-sim ê gín-á, kā ka-kī chiàu-kò͘ kah chiâⁿ hó-sè, a-bú lóng m̄-bián hoân-ló. Chin kám-siā lí chiah-ni̍h-á thiaⁿ-ōe bat tāi-chì. Tī lí ê sin-siōng, a-bú khòaⁿ-tio̍h ka-kī siàu-liân sî-tāi chhóng-pōng hò͘-kiông ê kò-sèng. Chò-lâng siuⁿ kòe kiau-ngō͘ chū-tāi, lia̍h-chú he tio̍h sī chū-sìn, m̄ chai-iáⁿ thang khiam-hi sio-niū. In-ūi ū chit ê khiàm-tiám, a-bú tī jîn-seng ê lō͘-tô͘ kiâⁿ kòe chin chē khám-khám-khia̍t-khia̍t, chhiâng-chāi poa̍h-tó siū-siong. Só͘-í, góa chin-sim hi-bāng lí ē-tàng léng-chēng lo̍h- -lâi, thang khòaⁿ-tio̍h ka-kī put-chiok ê só͘-chāi, kā kái-piàn tiâu-chéng kòe- -lâi, pī-bián siū-tio̍h kap a-bú kâng-khoán ê thòng-khó͘. A-bú ǹg-bāng lí chi̍t-sì-lâng lóng ē-tàng chin chū-chāi, chin khoài-lo̍k.

Éng-oán ài- -lí ê a-bú

讀hōo你聽