〈專文〉台灣人著愛講台灣話

文/劉重義

台灣話在這幾冬事實上已經有在復興的趨勢。足感謝阮台南人黃仁勳董事長，最近伊予「講台灣話」這個議題閣較突出，相當受著台灣人社會的重視和討論。

90年代初期，有看著新聞報導台大數學系教授楊維哲用台灣話教數學，引起赤藍反動派的攻擊。

陳水扁做台北市長之時，請陳師孟做副市長。拄好我有機會轉去台灣，當時是網際網路(Internet)在台灣開始受重視之時陣，陳師孟請我去市政府做相關的演講。我的講題是「以網路代替馬路」，當我一開嘴用台灣話開始講，頭前一排可能著是支那黨長期執政留落來的市府人員，真無客氣徛起來退場，其中有人故意要講予我聽：「他是故意的，沒有人能用台語講高科技。」我還是繼續全場用台灣話演講。

2005我轉去台灣參與科技政策研究，嘛在台灣科技大學兼課，教「資訊安全」和「電子商務」。我的教學課綱寫足清楚，85%台灣話、10%英語、5%其他。選課的學生非常濟，十幾冬中間，咁哪有2個支那來的交換學生講怹聽無，我勸怹拜託人翻譯或是退選。來選課的台灣學生事實上攏聽有，是較祙曉講。我是無強迫怹著隨我講台灣話，卻攏有幾組學生嘛會用台灣話起來做期中報告。

我在台灣住十幾冬中間，幾乎四界去攏講台灣話，咁哪一擺在中壢休息站，拄著一位客家女性服務員，足有禮數講伊聽無。基本上，赤藍人的假支那民國是較成功透過政治暴力在教育上破壞台灣話，在民間社會，台灣話還是相當有生機。

一擺在台北的公車頂，看著一個生做足媠足溫柔的少年女性，抱著伊大概才2、3歲的囝仔，足有耐性用台灣話共伊的囝仔講沿途路邊心適的所在，囝仔嘛不時用台灣話問老母。嘿是我看著足媠的一幕。

歷史上，母語受外來統治勢力壓迫的民族，親像克羅埃西亞、愛爾蘭、芬蘭和波羅地海三國等，當怹的少年人開始重視家己的母語，攏會帶動民族主義的興起，促成驅逐外來勢力追求民族獨立的熱潮。過去幾冬，台灣話復興的趨勢當然會引起外來赤藍掠奪集團和支共的緊張，怹會用盡辦法要破壞和阻止台灣話的復興。台灣人著是愛堅定咱台灣主體意識，鼓舞台灣人講家己的母語。

台灣建國後的語言政策，會使參考芬蘭獨立後的處理方式：以台灣話做全國性的官方語言，在客家或原住民人數達到某種程度的地區，相對的客家話或原住民話才嘛列做這地區的官方語言。芬蘭基於歷史的原因，有將過去的侵略者的瑞典話和芬蘭話列入做全國性的官方語言，總是，若支共對台灣繼續有敵意，現在在台灣相當普遍使用的北京話著無應該列入做全國性的官方語言。