【台語世界／錄音】健康排第一

文、錄音／A-ka

自細漢，阮ê身體著真lám，tiāⁿ-tiāⁿ掛號走病院，ká-ná teh kiâⁿ灶腳仝款。所以讀冊了後，阮lóng chiâⁿ細膩，隨時提醒家己ài注意，因為無想beh破病來請假，bē得thang去學校上課，按呢老師教ê重點無聽著，功課會tòe bē著。
想bē到tī我讀六年仔ê下學期，阮siuⁿ過大意，猶是破功ah，無法度領著國校畢業典禮ê「全勤獎」。Hit當陣，有一位同學sió-khóa-á感冒，我kan-ta下課chhōe伊chhit-thô，tī短短ê時間內底，著hō͘伊òe- -著。

Tú開始，我頭眩目暗gōng-chhia-chhia，嚨喉發炎koh sau聲。想講tī厝內歇睏- -幾工ah著會恢復，啥知影後來變做胸坎cha̍t-cha̍t koh khuh-khuh嗽，雙港鼻水kòng-kòng流，bē-su關無bā ê水道頭。原本ê我是樂暢活潑koh ài四界pha-pha走﹔chit-má sòa親像一ê虛弱ê老歲仔，無lám無ne無胃口，食啥物著吐啥物，規ê人軟siô-siô bē四序。Chiah過無幾工，著消瘦落肉chhun皮黏骨，心情chiâⁿ鬱卒。

落尾，我ê症頭愈來愈嚴重，規粒頭殼燒hōng-hōng。阿母緊kā度針提來磅，驚一tiô！Beh倚四十度。莫怪明明chiâⁿ hip熱，阮sòa一ê面仔無血色、身軀起畏寒。阿爸心狂火to̍h駛車載我去病院，ná kiâⁿ ná走直接kā阮抱去急診室。當我倒tī病床，目睭沙微沙微thí bē開，又koh鼻著熟似ê藥水味，阮忍bē牢目箍紅。想起chit站仔，受病疼ê折磨，ta̍k工hông關tī厝- -裡，啥物所在lóng bē當去，實在是一件痛苦ê代誌。

醫生猶會認得我，伊提ām-á-khún ê聽筒斟酌聽，用心做檢查。後來，有一位護理師beh kā阮注射，伊ê腳手chiâⁿ猛掠，tī我無心理準備、猶bē赴反應ê時，著大力kā針ui- -落去，害阮疼kah目屎四淋垂。好ka-chài！有阿母陪tī身軀邊，用溫柔ê雙手安搭阮ê心chiâⁿ，不時hō͘阮勇氣講：「M̄-thang驚，阿母tī chia。」
俗語講：「千斤ê重擔有人扛，四兩ê病疼無人pun。」真濟人lóng是到破病ê時陣，chiah來心肝頭懊惱亂紛紛。Chit pái破病，我拖beh規個月，m̄-nā家己受苦，mā害爸母無閒chhih-chhih chiâⁿ煩惱，白頭毛發真濟，看起來加老幾若歲。

其實，身體勇健才有後步，chiah有氣力行 koh-khah遠ê路。所以，健康是咱上大ê本錢，我beh kā排tī人生ê第一位，好好仔照顧家己。人若勇壯有元氣，著會精神飽tīⁿ心花開，ta̍k工chiah會得thang歡歡喜喜koh輕輕鬆鬆過日子。

台灣字（白話字）版
Kiān-khong Pâi Tē-it

Chū sè-hàn, gún ê sin-thé tio̍h chin lám, tiāⁿ-tiāⁿ kòa-hō cháu pēⁿ-īⁿ, kán-ná teh kiâⁿ chàu-kha kâng-khoán. Só͘-í tha̍k-chheh liáu-āu, gún lóng chiâⁿ sè-jī, sûi-sî thê-chhéⁿ ka-kī ài chù-ì. In-ūi bô siūⁿ beh phòa-pēⁿ lâi chhéng-ká, bē-tit-thang khì ha̍k-hāu siōng-khò. Án-ne lāu-su kà ê tiōng-tiám bô thiaⁿ- -tio̍h, kong-khò ē tòe-bē-tio̍h.

Siūⁿ-bē-kàu tī góa tha̍k la̍k-nî-á ê ē-ha̍k-kî, gún siuⁿ kòe tāi-ì, iáu sī phò-kong ah, bô-hoat-tō͘ niá tio̍h kok-hāu pit-gia̍p tián-lé ê “Choân-khîn-chióng”. Hit-tang-chūn, ū chi̍t-ūi tông-o̍h sió-khóa-á kám-mō͘, góa kan-ta hā-khò chhōe i chhit-thô, tī té-té ê sî-kan lāi-té, tio̍h hō͘ i òe- -tio̍h.

Tú khai-sí, góa thâu-hîn-ba̍k-àm gōng-chhia-chhia, nâ-âu hoat-iām koh sau-siaⁿ. Siūⁿ-kóng tī chhù-lāi hioh-khùn- -kúi-kang-á tio̍h ē khoe-ho̍k. Siáⁿ chai-iáⁿ āu- -lâi pìⁿ chò heng-khám cha̍t-cha̍t koh khuh-khuh-sàu, siang káng phīⁿ-chúi kòng-kòng-lâu, bē-su koaiⁿ bô bā ê chúi-tō-thâu. Goân-pún ê góa sī lo̍k-thiòng oa̍h-phoat koh ài sì-kè pha-pha-cháu. Chit-má sòa chhin-chhiūⁿ chi̍t ê hi-jio̍k ê lāu-hòe-á, bô-lám-bô-ne bô ūi-kháu, chia̍h siáⁿ-mih tio̍h thò͘ siáⁿ-mih, kui-ê lâng nńg-siô-siô bē sù-sī. Chiah kòe bô kúi kang, tio̍h siau-sán-lo̍h-bah chhun phôe liâm kut, sim-chêng chiâⁿ ut-chut.

Lo̍h-bóe, góa ê chèng-thâu jú lâi jú giâm-tiōng, kui-lia̍p thâu-khak sio-hōng-hōng. A-bú kín kā tō͘-chiam the̍h-lâi pōng, kiaⁿ-chi̍t-tiô! Beh óa sì-cha̍p tō͘. Bo̍k-koài bêng-bêng chiâⁿ hip-joa̍h, góa sòa chi̍t ê bīn-á bô huih-sek, sin-khu khí ùi-kôaⁿ. A-pah sim-kông-hóe-to̍h sái-chhia chài góa khì pēⁿ-īⁿ, ná kiâⁿ ná cháu ti̍t-chiap kā gún phō khì kip-chín-sek. Tng góa tó tī pēⁿ-chhn̂g, ba̍k-chiu sa-bui sa-bui thí bē khui. Iū-koh phīⁿ-tio̍h se̍k-sāi ê io̍h-chúi-bī, gún jím-bē-tiâu ba̍k-kho͘ âng. Siūⁿ khí chit-chām-á, siū pēⁿ-thiàⁿ ê chiat-bôa, ta̍k-kang hông koaiⁿ tī chhù- -ni̍h, siáⁿ-mih só͘-chāi lóng bē-tàng khì. Si̍t-chāi sī chi̍t kiāⁿ thòng-khó͘ ê tāi-chì.

I-seng iáu ē jīn-tit góa, i the̍h ām-á-kún ê thiaⁿ-tâng chim-chiok thiaⁿ, iōng-sim chò kiám-cha. Āu- -lâi, ū chi̍t ūi hō͘-lí-su beh kā gún chù-siā. I ê kha-chhiú chiâⁿ mé-lia̍h, tī góa bô sim-lí chún-pī iáu bē-hù hoán-èng ê sî, tio̍h tōa-la̍t kā chiam ui- -lo̍h-khì. Hāi gún thiàⁿ kah ba̍k-sái sì-lâm-sûi. Hó-ka-chài! Ū a-bú pôe tī sin-khu-piⁿ, iōng un-jiû ê siang-chhiú an-tah gún ê sim-chiâⁿ, put-sî hō͘ gún ióng-khì kóng, “M̄-thang kiaⁿ, a-bú tī chia.”

Sio̍k-gí kóng, “Chhian kin ê tāng-tàⁿ ū lâng kng, sì niú ê pēⁿ-thiàⁿ bô lâng pun.” Chin chē lâng lóng sī kàu phòa-pēⁿ ê sî-chūn chiah lâi sim-koaⁿ-thâu àu-náu loān-hun-nun. Chit-pái phòa-pēⁿ, góa thoa beh kui-kò-goe̍h. M̄-nā ka-kī siū-khó͘, mā hāi pē-bú bô-êng-chhih-chhih chiâⁿ hoân-ló. Pe̍h thâu-mo͘ hoat chin chē, khòaⁿ- -khí-lâi ke lāu kúi-nā hòe.

Kî-si̍t, sin-thé ióng-kiāⁿ chiah ū āu-pō͘, chiah ū khùi-la̍t kiâⁿ koh-khah hn̄g ê lō͘. Só͘-í, kiān-khong sī lán siōng tōa ê pún-chîⁿ. Góa beh kā pâi tī jîn-seng ê tē-it ūi, hó-hó-á chiàu-kò͘ ka-kī. Lâng nā ióng-chòng ū goân-khì, tio̍h ē cheng-sîn pá-tīⁿ sim-hoe-khui. Ta̍k-kang chiah ē-tit-thang hoaⁿ-hoaⁿ-hí-hí koh khin-khin-sang-sang kòe ji̍t-chí.

讀hōo你聽