〈專文〉安怎判斷真假買辦？

文/劉重義

最近網路、媒體對賴清德的攻擊，比楊柳風颱掃台灣閣較強。在民族鬥爭過程，毀壞敵對族群的領導重心，予敵對族群歹團結歹運作，絕對是必要的手段。

就我所瞭解，賴清德是到目前的假支那民國總統中間，唯一在任職中公開正確宣示：台灣主權地位是由舊金山和約決定，此條約並無將台灣澎湖交支那。

李登輝、陳水扁、蔡英文和賴清德攏是普選出的假支那民國總統，本質上攏是外來赤藍體制的「買辦頭人」，總是，台灣人呣通犯幼稚病，叫是外來體制的買辦攏是民族敵人。近代民族解放運動史內底，有祙少外來體制的買辦利用怹在外來體制擁有的權力，做出對推動家己民族獨立成功有相當的貢獻，芬蘭、愛爾蘭、阿爾及利亞、捷克、波羅地海三國等，攏有先例。

簡單講，在外來體制控制下有某種民主選舉的社會，安呢選出的在地政治人物有可能是民族叛徒，嘛有可能是民族解放運動的領導者。咱著客觀地掌握敵我形勢，基於台灣民族利益，冷靜理智對一寡假支那民國體制內的買辦和買辦頭人，注意怹講啥做啥。

無呣對，騙仙仔能當騙寡濟由戇人決定！仝道理，在當前外來赤藍體制下，敵人的認知戰會當傷害咱民族的領導者寡大，嘛是由戇台灣人決定！

昨日8月15我將頂面這段短文貼在人面冊，李震華大律師看了，留話希望我指出，安怎判斷真假支那買辦的標準。

歹勢，嘿絕對比在法庭上正反辯證較複雜，無可能用法律觀點去裁決。坦白講，我個人嘛無能力來制定一組所謂「判斷標準」。總是我會當確定，咱著用推動民族獨立運動的觀點和態度做基礎去判斷，著冷靜理性評估「買辦」的言行對運動形勢的影響，有清楚長時間在出賣台灣民族利益的「買辦」，咱才通論定伊是「民族叛徒」。彼時，打擊民族叛徒的「買辦」才有正當性！

每一個拍拚要擺脫外來勢力壓迫的民族，攏需要有予國際社會會當認定有夠領導聲望的民族運動者。所以，要追求國家獨立的民族，呣通無頭無腦毀損家己民族可能的領導者。在有民主選舉的外來體制下，透過由普選產生的在地政治人物，往往會出現有潛在力的民族運動領導者。

當民族運動力量弱之時，咱對「買辦」的要求應該放較鬆哩，呣通過度要求怹著現牌積極展現民族氣魄，甚至要求人著做「烈士」；對無被確認是外來體制走狗的「買辦」，怹有時陣的反民族言論，咱著注意怹發言的背景和目的。嚴重毀損家己民族可能的領導者，這種行為本身著是一種破壞民族運動的行為。咱台灣人應該有夠智慧通判斷，目前由支共和親支共勢力聯合發動，全面打擊醜化賴清德的認知戰，著是外來赤藍權貴長期消滅台灣人領導者不斷繼續的一種手法。

大部分的台灣人一定有台灣心，咱這種民族信心的樹根一定著徛乎在，樹尾才呣驚敵人捲認知戰的風颱。傷害台灣民族利益是外來赤藍假支那民國體制的本質，有台灣心的「買辦」，平常時一定會避免過度傷害民族利益，一定會適時抓機會做出有利民族利益的決定。當然嘛有少數投機的台灣人，會甘願做外來壓迫體制惡質的走狗。總講一句，需要較長時間耐心的觀察，呣通簡單受人煽動去攻擊、侮辱無清楚主動違背或破壞台灣民族利益的「買辦」。

追蹤李登輝先生自做「副總統」以後的言論和作為，會當引導咱有足好的正確觀察態度，幫助咱有合理閣正確的判斷分別真假買辦。