【台語世界／錄音】聽身軀講話

文、錄音／陳俐雯 Tân Lī-bûn

你若相信病疼koh食認正經有病疼，m̄免等kah人傷重，頭殼就會吩咐你掠病疼金金相，按呢病疼就是家己做空hō͘家己跳ê齣頭，保領病疼會一路kap你黏相óa。

樹仔有法度大欉ài時間，有法度開花結子ài有肥底；人ê身體beh勇ā是beh敗，tī五行ê世界道理lóng仝款。咱人身軀會疼會無爽快「that」是根源，積táu是因端，伊bē無分無會that- -牢leh，這hām咱平時仔食=ê、生活慣勢kap心情lóng有牽kha̍p。

論真講按身軀ê「道」疼無的確有病，是咱hông教tòng-gōng- -去，才淺腹腸誤解疼是leh教示咱啥。咱lóng知影水溝仔tī猶未that- -leh進前就愛tiāⁿ清才bē積táu生蠓蟲，若有這款致覺，平素時仔tī身軀lóng無哼無呻就kā囤=ê糞埽摒摒- -leh，按呢厝若清氣鳥鼠ka-choa̍h就無半隻，咱體內毒素就無通chhàng-chhiu chhōe你討債。

你ê勇健kap別人無tī-tāi，koh較bē當無責無任擲hō͘醫生擔。所pái活leh有真濟選擇，beh選勇健選破病，beh揀長歳壽koh活kah媠氣ā是揀短命koh歹死，lóng chāi你。按看會著ê chia̍h食kap歹慣勢，到長期無要意家己ê情緒，chia有意願改變- -無足重要。M̄-thang時到破病才beh斟酌；勇健m̄是無米才煮番薯湯chiah-nī-á簡單ê代誌。

養身才會勇身，時間是上好ê干證。病疼是咱用5冬10冬ā是koh較久ê時間，hām身軀做對頭chhiâⁿ- -出來ê。你規日走pha-pha敢bat正經致心家己身軀有tó位走精- -無？日子一工一工teh過敢有顫悶身軀teh thok-thâu？M̄管有〜無，你逐工tùi家己做啥代誌he跤跡lóng會成做後過身軀ê記持。

台灣字（白話字）版
Thiaⁿ Sin-khu Kóng-ōe

Lí nā siong-sìn pēⁿ-thiàⁿ koh chia̍h-jīn chèng-keng ū pēⁿ-thiàⁿ, m̄-bián tán kah lâng siong-tiōng, thâu-khak tō ē hoan-hù lí lia̍h pēⁿ-thiàⁿ kim-kim-siòng. Án-ne pēⁿ-thiàⁿ tō sī ka-tī chò-khang hō͘ ka-tī thiàu ê chhut-thâu, pó-niá pēⁿ-thiàⁿ ē chi̍t-lō͘ kap lí liâm-sio-óa.

Chhiū-á ū-hoat-tō͘ tōa-châng ài sî-kan, ū-hoat-tō͘ khui-hoe kiat-chí ài ū pûi-té. Lâng ê sin-thé beh ióng ā-sī beh pāi, tī ngó͘-hêng ê sè-kài tō-lí lóng kāng-khoán. Lán-lâng sin-khu ē thiàⁿ ē bô sóng-khoài “that” sī kin-goân, chek-táu sī in-toaⁿ, i bē bô-hun-bô-hōe that- -tiâu leh. Che hām lán pêng-sî-á chia̍h=ê, seng-oa̍h koàn-sì kap sim-chêng lóng ū khan-kha̍p.

Lūn-chin kóng àn sin-khu ê “tō” thiàⁿ bô tek-khak ū pēⁿ, sī lán hông kà tòng-gōng- -khì, chiah chhián pak-tn̂g gō͘-kái thiàⁿ sī leh kà-sī lán siáⁿ. Lán lóng chai-iáⁿ chúi-kau-á tī iáu-bē that- -leh chìn-chêng tō ài tiāⁿ chheng chiah-bē chek-táu seⁿ báng-thâng. Nā ū chit-khoán tì-kak, pêng-sò͘-sî-á tī sin-khu lóng bô haiⁿ bô chhan tō kā tún=ê pùn-sò piàⁿ-piàⁿ- -leh. Án-ne chhù nā chheng-khì niáu-chhí ka-choa̍h tō bô-pòaⁿ-chiah. Lán thé-lāi to̍k-sò͘ tō bô-thang chhàng-chhiū chhōe lí thó-chè.

Lí ê ióng-kiāⁿ kap pa̍t-lâng bô-tī-tāi, koh-khah bē-tàng bô-chek-bô-jīm tàn hō͘ i-seng taⁿ. So͘-pái oa̍h leh ū chin-chē soán-te̍k: beh soán ióng-kiāⁿ soán phòa-pēⁿ, beh kéng tn̂g hòe-siū koh oa̍h kah súi-khùi ā-sī kéng té-miā koh pháiⁿ-sí, lóng chāi lí. Àn khòaⁿ ē tio̍h ê chia̍h-si̍t kap pháiⁿ koàn-sì, kàu tn̂g-kî bô iàu-ì ka-tī ê chêng-sū, chia ū ì-goān kái-piàn- -bô chiok tiōng-iàu. M̄-thang sî-kàu phòa-pēⁿ chiah beh chim-chiok, ióng-kiāⁿ m̄-sī bô bí chiah chú han-chî-thng chiah-nī-á kán-tan ê tāi-chì.

Ióng-sin chiah ē ióng-sin, sî-kan sī siōng hó ê kan-chèng. Pēⁿ-thiàⁿ sī lán iōng 5 tang 10 tang ā-sī koh-khah kú ê sî-kan, hām sin-khu chò-tùi-thâu chhiâⁿ- -chhut-lâi ê. Lí kui-ji̍t cháu-pha-pha kám-bat chèng-keng tì-sim ka-tī sin-khu ū tó-ūi cháu-cheng- -bô? Ji̍t-chí chi̍t-kang chi̍t-kang kòe kám-ū chùn-būn sin-khu teh thok-thâu? M̄-koán ū bô, lí ta̍k-kang tùi ka-tī chò siáⁿ tāi-chì he kha-jiah lóng ē chiâⁿ-chò āu-kòe sin-khu ê kì-tî.

讀hōo你聽