【專欄】大罷免意義佮舊金山和約對台灣前途安排

文/陳月妙 台灣教授協會副會長、中正大學外文系前系主任退休教授）

昨暗10～12點，佇世界台灣文化論壇做線頂演講。我用台語講大罷免的意義閣台灣前途出路 － 舊金山和約對台灣前途的安排。

事實上，大罷免了後，台灣人心浮動，逐家對前途攏真煩惱。其實，大罷免對公民覺醒的角度來看，實在是大成功，只是無達成任務，繼續維持現狀爾爾。31：0行到第三階段，130萬人簽署，閣有2063000出仔的同意票。佇深鐵藍區，實在是足無簡單矣。

而且，這擺的運動，時間自2025.2.1開始到8.23, 有6個月3禮拜閣1工。第一擺全台遶境護台灣，全島互相呼應，出錢出力者，排隊排甲落落長，有自然形成的網路課金平台，中介媒合者無經手經費，予捐助者直接寄付逐個廠商，攏總處理有3000萬遮濟的金額。會使講各行各業風起雲湧做伙反共護台灣，千手觀音處處現，四界是活跳的苦海台灣男女神龍，史無前例，壯闊無底比。

咱若共這款情形湠闊到全台，敢無600萬以上的拍死無退的台灣捍衛志士正港台灣人？所以，毋通失志，穩住身心，繼續勇敢拚落去啦！

身為福爾摩沙台灣兒女，400冬來攏是咧革命反抗，抵抗外來政權。歴史上，咱有四大革命，郭懷一（1652）、朱一貴（1721）、林爽文（1786）、戴潮春（1861），清治這三擺，時間攏超過三年以上，規模足大。清治213年，三年一小反五年一大反，大小民變攏總有143擺。

到日本時代閣有1895乙未戰爭，有余清芳（1915）焦吧年事件、莫那魯道（1931）的霧社事件。

到中國流亡台灣，有1947的228大革命。美麗島事件（1979）、野百合運動（1990）、刑法100條抗爭（1993）、野草莓運動（2008）及最近的2014太陽花學運。

咱這擺大規模的大罷免就是繼承這個福爾摩沙人的傳統拍死無退的抵抗精神。

演講第二部份是紹介舊金山和平條約，是台灣人的出世證明，嘛是咱最後的逃生門。二工前，美國AIT處長公開講，中國講的開羅宣言佮波茨坦宣言，攏是扭曲事實，烏白宣傳。8月29日，美國參議院軍事委員會主席維克（Roger Wicker）專工千里迢迢來到咱台灣厝內，甲咱講咱台灣人有自決權（self-determination )。閣有8月初5，英國前首相Boris Johnson來台灣演講，嘛甲咱講台灣人愛向世界宣佈公投獨立建國。

猶有8月26日， IPAC世界國會議員抗中論壇辦餐會挺台灣自由之夜，英國瑞典波蘭日本代表，攏上台演講7,8分鐘強力支持台灣。實在足感心，in挺台灣挺甲來咱兜辦餐會咧挺咱。

台灣人真正愛勇敢，毋通驚，國際攏咧挺咱，咱愛大聲喝出，咱欲建立福爾摩沙台灣國啦！

照舊金山和約，台灣的主權屬台灣人的，這部份地位已定。毋過，台灣人因為一直予中華民國軍事佔領，所以攏無自決建國號名報戶口。這部份，台灣人愛清醒，毋通有一工親像克里米亞用選票出賣家己陷入無可挽回的境地。

逐家攏咧講選舉算選票，唉！這條路繼續閣行落去，毋知會按怎？

咱愛切割台灣佮中華民國矣；若無，繼續勾勾纏，會發生啥物代誌咧？

(2025/09/14)