【台語世界／錄音】台語文短詩集

文／吳旻恩Ngô͘, Bîn-un (高雄市茄萣仔國小六年生)
指導老師／蘇晏德

跙冰

我上kah意跙冰
俗語講：驚驚bē著等
跙冰會當逍遙展才能
比賽若贏有功名
Hō͘我感覺足光榮
跙冰tī我心內足神聖
跙冰隊是我第二ê家庭
跙冰予我好心情

台灣字（白話字）版

Chhū-peng

Góa siōng kah-ì chhū-peng
Sio̍k-gí kóng, “Kiâⁿ-kiâⁿ bē tio̍h-téng.”
Chhū-peng ē-tàng siau-iâu tián châi-lêng
Pí-sài nā iâⁿ ū kong-bêng
Hō͘ góa kám-kak chiok kong-êng
Chhū-peng tī góa sim-lāi chiok sîn-sèng
Chhū-peng-tūi sī góa tē-jī ê ka-têng
Chhū-peng hō͘ góa hó sim-chêng

我ê人生

我ê人生真享受
有編寫足濟夢想
無煩無惱無憂愁
認真讀冊有成就
學校有足濟朋友
好聽ê歌做伙唱
上蓋佮意拍桌球
欣賞台語ê文章

台灣字（白話字）版

Góa ê jîn-seng

Góa ê jîn-seng chin hiáng-siū
Ū pian-siá chiok-chē bāng-siúⁿ
Bô hoân bô ló bô iu-chhiû
Jīn-chin tha̍k-chheh ū sêng-chiū
Ha̍k-hāu ū chiok-chē pêng-iú
Hó thiaⁿ ê koa chò-hóe chhiùⁿ
Siōng-kài kah-ì phah toh-kiû
Him-sióng Tâi-gí ê bûn-chiuⁿ

我ê籃球夢

籃球是我ê夢
我希望變成有路用ê人
拍籃球我上紅
籃球會當hō͘我放空
我想beh加入籃球幫
籃球功夫我內行
拍籃球hō͘我心輕鬆
電kah別人lóng投降

台灣字（白話字）版

Góa ê nâ-kiû bāng

Nâ-kiû sī góa ê bāng
Góa hi-bāng piàn-sêng ū lō͘-ēng ê lâng
Phah nâ-kiû góa siōng âng
Nâ-kiû ē-tàng hō͘ góa pàng-khang
Góa siūⁿ beh ka-ji̍p nâ-kiû-pang
Nâ-kiû kang-hu góa lāi-hâng
Phah-kiù hō͘ góa sim khin-sang
Tiān kah pa̍t-lâng lóng tâu-hâng

讀hōo你聽