【台語世界／錄音】三塊加(ka)六塊

文、錄音／蘇晏德 So͘, Iàn Tek

台灣地名真趣味，三塊六塊真怪奇，你若問我beh tó去，故事濟kah講bē離。

10月chhe 7拜六，今仔日beh去九塊厝？m̄-sī lah，我是teh講sńg-chhiò，是beh去高雄ê三塊厝kap屏東ê六塊厝，beh坐10點32分落南ê火車，提早半點鐘到路竹火車頭，oân-nā等車oân-nā寫作。

路竹車頭ê大廳旅客滿sì-kè，見證路竹mā是鬧熱ê小城。

今仔日是路竹柑仔蜜節，車頭前有接送ê公車，加添路竹鬧熱ê氣氛。

雖罔12月天涼風微微仔吹，tī月台有淡薄仔冷，M̄-koh tī日頭腳猶是炎熱。

Peh上車人e-e-kheh-kheh chhōe無縫thang khiā，tī記持- -nih這是tī無高速公路ê年代chiah會發生ê代誌，m̄知今仔日是啥日子。

高雄三民區自古早to̍h有三塊厝chit-ê地名，鄭- -氏王朝有義民王、蔡、鄭三族tòe軍隊來台灣，姓王- -ê tī東段ê「橋頭」；姓蔡- -ê tī南段ê「海墘」，姓鄭- -ê tī西北段ê「後角」開墾種作，所擺號名「三塊厝」。

臺灣hō͘國民黨搶奪，取建設三民主義模範區ê名，區公所設tī三塊厝，自按呢號做三民區。

車ná坐筆ná動，區間車ta̍k站停，岡山，橋仔頭，楠仔坑，新左營，左營，內惟，美術館，鼓山，三塊厝到ah緊落車，行出站筆攑- -起來寫一首詩送hō͘三塊厝。

三塊厝火車頭

Khiā tī新站邊仔ê三塊厝舊車頭
早前火車過站無留
Hō͘人心酸目屎吞落喉
Chit-má全新ê車頭
邊仔有koân-koân ê大樓
附近ê彩色厝是你ê厝邊tau
日本式建築拋荒ê舊車頭
鐵枝路beh陪你展現新面貌

詩寫煞無食晝，坐12點17分落南ê火車繼續行，高雄，民族，科工館，正義，鳳山，後庄，九曲堂，火車駛過高屏溪六塊厝到ah，這是今仔日ê第二站。

六塊厝tī屏東縣大屯溪ê溪口，聽講早期kan-na六戶人家厝，自按呢叫做六塊厝。

1977年，空軍tī六塊厝舊住所起眷屬宿舍chiâⁿ做眷村，沿用舊名「六塊厝」。

Tī-chia落車附近有一間無掛khǎng-páng ê麵擔仔，生理好kah無臭無siâu，ài tiàm外口排隊等伊叫，我先去車頭看看巡巡leh，sūn-sòa寫一首詩送hō͘六塊厝。

六塊厝火車頭

無tap無sap ê車頭無壁無門
人去厝空無人thang問
無水無便所你ê叫拋荒
孤單ê老榕仔樹心酸酸
可惡ê o͘-bui teh kā我相借問
車頭附近有出名ê牛肉湯
烏鉎ê石敢當有刻名狀
伊ê名叫六塊厝文化驛園

詩寫煞koh去麵擔仔排隊準備tī iau，無疑悟等ê時間比食ê時間ke二倍khah ke，麵食煞坐13點49分上北ê火車回程。

台灣字（白話字）版
Saⁿ-tè-chhù ka La̍k-tè-chhù

Tâi-oân tē-miâ chin chhù-bī, Saⁿ-tè La̍k-tè chin koài-kî, Lí nā mn̄g góa beh tó khì, Kò͘-sū chē kah kóng bē lī,

10 goa̍h chhe 7 pài-la̍k, Kin-á-ji̍t beh khì Káu-tè-chhù? M̄-sī lah góa sī teh kóng sńg-chhiò, Sī beh khì Ko-hiông ê Saⁿ-tè-chhù kap Pîn-tong ê La̍k-tè-chhù, Beh chē 10 tiám 32 hun lo̍h-lâm ê hóe-chhia, The̍h-chá pòaⁿ-tiám-cheng kàu Lō͘-tek hóe-chhia-thâu, oân-nā tán-chhia oân-nā siá-chok.

Lō͘-tek chhia-thâu ê tōa-thiaⁿ lú-kheh móa-sì-kè, Kiàn-chèng Lō͘-tek mā sī nāu-jia̍t ê sió-siâⁿ.

Kin-á-ji̍t sī Lō͘-tek kam-á-bi̍t-cheh, Chhia-thâu ū chiap-sàng ê kong-chhia, Ke-thiⁿ Lō͘-tek nāu-jia̍t ê khì-hun.

Sui-bóng 12 goe̍h thiⁿ liâng-hong bî-bî-á chhoe, Tī goe̍h-tâi ū tām-po̍h-á léng, M̄-koh tī ji̍t-thâu kha iáu-sī iām-joa̍h.

Peh chiūⁿ-chhia lâng e-e-kheh-kheh chhōe bô phāng thang khiā, Tī kì-tî- -nih che-sī tī bô ko-sok kong-lō͘ ê nî-tāi chiah ē hoat-seng ê tāi-chì, M̄-chai kin-á-ji̍t sī siáⁿ ji̍t-chí.

Ko-hiông Sam-bîn-khu chū kó͘-chá to̍h ū Saⁿ-tè-chù chit-ê tē-miâ, Tēⁿ- -sī ông-tiâu ū gī-bîn Ông, Chhòa, Tēⁿ, saⁿ cho̍k tòe kun-tūi lâi Tâi-oân, Seⁿ Ông- -ê tī tang-tōaⁿ ê ”kiô-thâu”, Sèⁿ Chhòa- -ê tī lâm-tōaⁿ ê “hái-kîⁿ”, Sèⁿ Tēⁿ- -ê tī sai-pak ê “āu-kak”khai-khún chèng-choh, Só͘-pái hō-miâ ”Saⁿ-tè-chhù”.

Tâi-oân hō͘ Kok-bîn-tóng chhiúⁿ-toa̍t, Chhú kiàn-siat Sam-bîn Chú-gī bô͘-hoān-khu ê miâ, Khu-kong-só͘ siat tī Saⁿ-tè-chhù, Chū án-ne hō-chò Sam-bîn-khu.

Chhia ná chē pit ná tāng, Khu-kan-chhia ta̍k chām thêng, Kong-san, Kiô-á-thâu, Lâm-á-kheⁿ, Sin-Chó-iâⁿ, Chó-iâⁿ, Lāi-ûi, Bí-su̍t-koán, Kó͘-san, Saⁿ-tè-chhù kàu ah kín lo̍h-chhia, Kiâⁿ chhut chām pit gia̍h- -khí-lâi siá chi̍t-siú si sàng hō͘ Saⁿ-tè-chhù.

Saⁿ-tè-chhù Hóe-chhia-thâu

Khiā tī sin-chām piⁿ-á ê Saⁿ-tè-chhù kū chhia-thâu
Chá-chêng hóe-chhia kòe chām bô lâu
Hō͘ lâng sim sng ba̍k-sái thun lo̍h âu
Chit-má choán-sin ê chhia-thâu
Piⁿ-á ū koân-koân ê tōa-lâu
Hù-kīn ê chhài-sek chhù sī lí ê chhù-piⁿ tau
Ji̍t-pún sek kiàn-tio̍k pha-hng ê kū chhia-thâu
Thih-ki-lō͘ beh pôe lí tián-hiān sin bīn-māu

Si siá soah bô chia̍h-tàu, Chē 12 tiám 17 hun lo̍h-lâm ê hóe-chhia kè-sio̍k kiâⁿ, Ko-hiông, Bîn-cho̍k, Kho-kang-koán, Chèng-gī, Hōng-soaⁿ, Āu-chng, Kiú-khiok-tông, Hoe-chhia sái kòe Ko-pîn-khe La̍k-tè-chhù kàu ah, Che sī kin-á-ji̍t ê tē-jī chām.

La̍k-tè-chhù tī pîn-tong-koān Tōa-tùn-khe ê khe-kháu, Thiaⁿ kóng chá-kî kan-na la̍k-hō͘ jîn-ke-chhù, Chū án-ne kiò-chò La̍k-tè-chhù.

1977 nî, Khong-kun tī La̍k-tè-chhù kū chū-só͘ khí koàn-sio̍k sok-siā chiâⁿ-chò koàn-chhoan, Iân iōng kū-miâ La̍k-tè-chhù.

Tī-chia lo̍h-chhia hū-kīn ū chi̍t-keng bô kòa khǎng-páng ê mī-tàⁿ-á, Seng-lí hó kah bô chhàu bô siâu, ài tiàm gōa-kháu pâi-tūi tán i kiò, Góa seng khì chhia-thâu sûn-sûn khòaⁿ-khòaⁿ leh, sūn-sòa siá chi̍t-siú si sàng hō͘ La̍k-tè-chhù.

La̍k-tè-chhù Hóe-chhia-thâu

Bô tap bô sap ê chhia-thâu bô piah bô mn̂g
Lâng khì chhù khang bô lâng thang mn̄g
Bô chúi bô piān-só͘ lí ê miâ kiò pha-hng
Ko͘-toaⁿ ê lāu chhêng-á-chhiū sim sng-sng
Khó-òⁿ ê o͘-bui teh kā góa sio-chioh-mn̄g
Chhia-thâu hū-kīn ū chhut-miâ ê gû-bah-thng
O͘-sian ê chio̍h-kám-tong ū khek miâ-chn̄g
I ê miâ kiò La̍k-tè-chhù bûn-hòa ia̍h-hn̂g

Si siá soah koh khì mī-tàⁿ-á pâi-tūi tī iau, Bô-gî-gō͘ tán ê sî-kan pí chia̍h ê sî-kan ke nn̄g-pōe khah ke, Mī chia̍h soah, chē 13 tiam 49 hun chiūⁿ-pak ê hóe-chhia hôe-têng.

讀hōo你聽