【台語世界／錄音】Hit Pái練習ê機會

文、錄音／A-ka

細漢ê時，我著真欣羨人會曉彈電子琴，只要手指頭仔sió振動一下，著會當變化出濟濟迷人ê聲音，致使我mā足想beh學看māi leh。M̄-kú，阿母嫌我無定性，驚我會頭興興、尾冷冷，學無三工著hoah停。最後是我一再掛保證，絕對會用行動去證明，阿母chiah勉強tìm頭來答應。

會記得我tú開始學ê時，keyboard定定會chhi̍h m̄著去，練習ê過程真無順利。彈出來ê聲音真刺chha̍k，若像跳針ê唱片，lóng聽bē入耳。我真iàn氣，kā電子琴tàn一邊，tiāⁿ-tiāⁿ想beh來放棄。M̄-kú，驚人笑我是虎頭鳥鼠尾，只好一再鼓勵家己：萬事起頭難。無論koh按怎艱苦，mā ài堅持落去。

總算皇天不負苦心人，原本ê我是連Do Re Mi lóng看無，後- -來soah愈來愈進步。一直到chit-má，我已經有二步七仔。Chit幾年，mā tiāⁿ-tiāⁿ參加一寡表演。Tī彈琴ê過程中，我要意- -ê m̄是最後ê分數kap排名，是ta̍k-pái會當練習ê機會。其中hō͘我印象上深- -ê，著是今年電子琴ê全國賽。

為著beh kap人會比phēng，我用盡心思來準備，kā濟濟好聽ê台灣民謠重新koh改編。Che對我來講是真大ê挑戰。所以，我比早前koh-khah phah-piàⁿ，ta̍k工認真teh練習，而且無嫌費氣，kā彈奏ê琴聲全部錄音落來，斟酙聽看敢有欠點ê所在。我按呢一pái koh一pái，無暝無日真有耐心來修改。

雖罔無閒kah強beh chhia-poa̍h-péng，m̄-kú一切ê辛苦有代價，我一關衝過一關，竟然piàⁿ入去最後ê決賽。Che是我人生頭一pái，khiā tī全國ê大舞台。比賽hit一工，我緊張kah心肝phi̍h-pho̍k-chhái，iáu是無顧一切真piàⁿ-sè。但是現場ê高手實在有夠濟，所以我ê成績吊車尾。M̄-kú，我真珍惜hit pái練習ê機會，所得著ê意義勝過kap人比koân低。

俗語講：「戲棚頂一工，戲棚腳三冬。」Chit ê比賽hō͘我來理解，著算koh-khah有才情，tī上台進前，mā ài練習千遍萬遍，chiah有上好ê表現。若是一日討海，三日曝網，是無可能會成功- -ê。Mā因為kap hiah濟選手交戰過，chiah知影做人千萬m̄-thang驕傲自大，掠準全世界kan-ta家己上厲害。飽穗ê稻仔是頭犁犁，咱ài謙虛，腳踏實地，chiah會當進步愈濟。

想bē到hit pái練習ê機會，會有chiah-ni̍h大ê收成kap感受。我已經深深來領悟，beh學會曉任何ê本事，一定ài骨力來學習，更加用心phah基礎，kā食苦當做食補。我相信只要踏出第一步，代誌著無心內所想- -ê hiah恐怖，顛倒phah開眼界，chiâⁿ做阮成長ê養分，看著無仝景緻ê旅途。未來ê我會把握時機，展現出勇敢ê態度，意志堅定，chhōe著屬於家己ê光，成功kiâⁿ出家己ê路。

台灣字（白話字）版

Hit Pái Liān-si̍p ê Ki-hōe

Sè-hàn ê sî, góa tio̍h chin him-siān lâng ē-hiáu tôaⁿ tiān-chú-khîm. Chí-iàu chhiú-chéng-thâu-á sió tín-tāng chi̍t- -ē, tio̍h ē-tàng piàn-hòa chhut chē-chē bê-lâng ê siaⁿ-im. Tì-sú góa mā chiok siūⁿ beh o̍h khòaⁿ-māi leh. M̄-kú, a-bú hiâm góa bô tēng-sèng, kiaⁿ góa ē thâu hèng-hèng, bóe léng-léng, o̍h bô saⁿ kang tio̍h hoah-thêng. Chòe-āu sī góa it-chài kòa pó-chèng, choa̍t-tùi ē iōng hêng-tōng khì chèng-bêng, a-bú chiah bián-kióng tìm-thâu lâi tah-èng.

Ē kì-tit góa tú khai-sí o̍h ê sî, keyboard tiāⁿ-tiāⁿ ē chhi̍h m̄-tio̍h- -khì, liān-si̍p ê kòe-thêng chin bô sūn-lī. Tôaⁿ- -chhut-lâi ê siaⁿ-im chin chhì-chha̍k, ná-chhiūⁿ thiàu-chiam ê chhiùⁿ-phìⁿ, lóng thiaⁿ bē ji̍p-ní. Góa chin iàn-khì, kā tiān-chú-khîm tàn chi̍t piⁿ, tiāⁿ-tiāⁿ siūⁿ beh lâi hòng-khì. M̄-kú, kiaⁿ lâng chhiò góa sī hó͘-thâu niáu-chhí-bóe, chí-hó it-chài kó͘-lē ka-kī: bān-sū khí-thâu lân. Bô-lūn koh án-chóaⁿ kan-khó͘, mā ài kian-chhî- -lo̍h-khì.

Chóng-sǹg hông-thian put hū khó͘-sim-jîn. Goân-pún ê góa sī liân Do Re Mi lóng khòaⁿ bô, āu- -lâi soah jú lâi jú chìn-pō͘. It-ti̍t kàu chit-má, góa í-keng ū jī-pō͘-chhit-á. Chit kúi nî, mā tiāⁿ-tiāⁿ chham-ka chi̍t-kóa piáu-ián. Tī tōaⁿ-khîm ê kòe-thêng-tiong, góa iàu-ì- -ê m̄-sī chòe-āu ê hun-sò͘ kap pâi-miâ, sī ta̍k-pái ē-tàng liān-si̍p ê ki-hōe. Kî-tiong hō͘ góa ìn-siōng siōng chhim- -ê, tio̍h sī kin-nî tiān-chú-khîm ê choân-kok-sài.

Ūi-tio̍h beh kap lâng ē pí-phēng, góa iōng chīn sim-su lâi chún-pī, kā chē-chē hó-thiaⁿ ê Tâi-oân bîn-iâu tiông-sin koh kái-pian. Che tùi góa lâi kóng sī chin tōa ê thiau-chiàn. Só͘-í, góa pí chá-chêng koh-khah phah-piàⁿ, ta̍k-kang jīn-chin teh liān-si̍p, jî-chhiáⁿ bô hiâm hùi-khì, kā tōaⁿ-chàu ê khîm-siaⁿ choân-pō͘ lo̍k-im- -lo̍h-lâi, chim-chiok thiaⁿ khòaⁿ kám ū khiàm-tiám ê só͘-chāi. Góa án-ne chi̍t pái koh chi̍t pái, bô-mê-bô-ji̍t chin ū nāi-sim lâi siu-kái.

Sui-bóng bô-êng kah kiōng-beh chhia-poa̍h-péng, m̄-kú it-chhè ê sin-khó͘ ū tāi-kè. Góa chi̍t koan chhiong kòe chi̍t koan, kèng-jiân piàⁿ ji̍p-khì chòe-āu ê koat-sài. Che sī góa jîn-seng thâu-chi̍t-pái khiā tī choân-kok ê tōa bú-tâi. Pí-sài hit chi̍t kang, góa kín-tiuⁿ kah sim-koaⁿ phi̍h-pho̍k-chhái, iáu-sī bô kò͘ it-chhè chin piàⁿ-sè. Tān-sī hiān-tiûⁿ ê ko-chhiú si̍t-chāi ū-kàu chē. Só͘-í góa ê sêng-chek tiàu-chhia-bóe. M̄-kú, góa chin tin-sioh hit pái liān-si̍p ê ki-hōe, só͘ tit-tio̍h ê ì-gī sèng kòe kap lâng pí koân-kē.

Sio̍k-gí kóng, “Hì-pêⁿ-téng chi̍t kang, hì-pêⁿ-kha saⁿ tang.” Chit ê pí-sài hō͘ góa lâi lí-kái, tio̍h sǹg koh-khah ū châi-chêng, tī chiūⁿ-tâi chìn-chêng, mā ài liān-si̍p chhian-piàn bān-piàn, chiah ū siōng hó ê piáu-hiān. Nā-sī chi̍t ji̍t thó-hái, saⁿ ji̍t pha̍k bāng, sī bô khó-lêng ē sêng-kong- -ê. Mā in-ūi kap hiah chē soán-chhiú kau-chiàn- -kòe, chiah chai-iáⁿ chò-lâng chhian-bān m̄-thang kiau-ngō͘ chū-tāi, lia̍h-chún choân sè-kài kan-ta ka-kī siōng lī-hāi. Pá-sūi ê tiū-á sī thâu lê-lê, lán ài khiam-hi, kha-ta̍h-si̍t-tē, chiah ē-tàng chìn-pō͘ jú chē.

Siūⁿ-bē-kàu hit pái liān-si̍p ê ki-hōe, ē ū chiah-ni̍h tōa ê siu-sêng kap kám-siū. Góa í-keng chhim-chhim lâi léng-ngō͘, beh o̍h ē-hiáu jīm-hô ê pún-sū, it-tēng ài kut-la̍t lâi liān-si̍p; kèng-ka iōng-sim phah ki-chhó͘, kā chia̍h-khó͘ tòng-chò chia̍h-pó͘. Góa siong-sìn chí-iàu ta̍h chhut tē-it pō͘, tāi-chì tio̍h bô sim-lāi só͘ siūⁿ- -ê hiah khióng-pò͘. Tian-tò phah-khui gán-kài, chiâⁿ-chò gún sêng-tióng ê ióng-hūn, khòaⁿ-tio̍h bô kâng kéng-tì ê lú-tô͘. Bī-lâi ê góa ē pá-ak sî-ki, tián-hiān chhut ióng-kám ê thāi-tō͘, ì-chì kian-tēng, chhōe-tio̍h sio̍k-î ka-kī ê kng, sêng-kong kiâⁿ chhut ka-kī ê lō͘.

讀hōo你聽