【台語世界／錄音】螺絲王國〜路竹 Lô͘-si ông-kok~Lō͘-tek

文、錄音／蘇晏德 So͘, Iàn Tek

路竹在地ê鄉親有真濟人m̄知，路竹有一項世界第一〜螺絲，路竹ê螺絲出口是全世界佔有率第一，路竹是正港ê螺絲王國。你m̄-thang看bē起細細ê一粒螺絲，m̄管是你手- -nih所攑ê手機á，á-sī tī天頂飛ê飛lêng機lóng需要螺絲。全國螺絲生產量上大ê所在著是tī路竹，路竹所生產ê螺絲著佔總出口量ê一半，而且外銷到140 kúi-ê國家，會得通講：有人ê所在著有路竹ê螺絲。路竹ê螺絲m̄-nā產量濟，品質mā-sī世界第一，在地螺絲工場ê頭家講：台灣本身所做ê品質ē-tàng kah世界各國pí-phēng，路竹生產螺絲ê時間已經超過60年，螺絲品質會受著世界肯定，除了路竹鄉親本身拍拚以外，上重要是因為路竹有利便ê交通，而且離鋼鐵ê大本營中鋼無遠，所以chiah會變成螺絲工場設廠ê地點。因為路竹有2 ê交流道beh運送真方便，按呢路竹著形成一ê螺絲窟，螺絲工場ê模á好、線材好、技術好，所以路竹ê螺絲佔有率是全世界第一名，細漢ê時若tī路竹ê郊外聽著 khin-khin-khiang-khiang ê聲音感覺真吵，mā感覺真趣味，因為這種聲音著是路竹土地ê聲sàu，這是路竹在地ê文化，mā-sī路竹ê特產。

螺絲對路竹ê經濟有真大ê幫贊，你若tī路竹聽著khin-khin-khiang-khiang ê聲音m̄免大驚小怪，過去路竹上興ê時陣大大細細有kúi-nā百間工場tī chia設廠，著因為按呢路竹ê螺絲董- -ê特別濟，蘇董- -ê、王董- -ê、林董- -ê、一大堆，大工場kā小工場ê螺絲包- -起來行銷到全世界，上、中、下游做伙拍拚。想bē到一支細細ê螺絲替路竹替台灣tī世界ê舞台頂拚出好名聲，這種khin-khin khiang-khiang ê機hâi聲，著是路竹chit-phiàn土地在地ê聲sàu。

台灣字（白話字）版

Lō͘-tek chāi-tē ê hiong-chhin ū chin-chē lâng m̄-chai, Lō͘-tek ū chi̍t hāng sè-kài tē-it~lô͘-si. Lō͘-tek ê lô͘-si chhut-kháu sī choân sè-kài chiàm-iú-lu̍t tē-it. Lō͘-tek sī chiàⁿ-káng ê lô͘-si ông-kok. Lí m̄-thang khòaⁿ bē khí sè-sè ê chi̍t lia̍p lô͘-si, m̄-koán sī lí chhiú- -nih só͘ gia̍h ê chhiú-ki-á, á-sī tī thiⁿ-téng poe ê hui-lêng-ki lóng su-iàu lô͘-si. Choân-kok lô͘-si seng-sán-liōng siōng-tōa ê só͘-chāi tio̍h-sī tī Lō͘-tek.Lō͘-tek só͘ seng-sán ê lô͘-si tio̍h chiàm chóng chhut-kháu-liōng ê chi̍t-pòaⁿ. Jî-chhiáⁿ gōa-siau kàu 140 kúi-ê kok-ka. Ē-tit-thang kóng,Ū lâng ê só͘-chāi tio̍h ū Lō͘-tek ê lô͘-si! Lō͘-tek ê lô͘-si m̄-nā sán-liōng chē phín-chit mā-sī sè-kài tē-it. Chāi-tē lô͘-si kang-tiûⁿ ê thâu-ke kóng,”Tâi-oân pún-sin só͘ chò ê phín-chit ē-tàng kah sè-kài kok-kok pí-phēng.” Lō͘-tek seng-sán lô͘-si ê sî-kan í-keng chhiau-kòe 60 nî. Lô͘-si phín-chit ē siū-tio̍h sè-kài khéng-tēng, tû-liáu Lō͘-tek hiong-chhin pún-sin phah-piàⁿ í-gōa, siōng tiōng-iàu sī in-ūi Lō͘-tek ū lī-piàn ê kau-thong. Jî-chhiáⁿ lî kǹg-thih ê tāi-pún-iâⁿ Tiong-kǹg bô hn̄g. Sò͘-í chiah ē piàn-sêng lô͘-si kang-tiûⁿ siat-chhiúⁿ ê tē-tiám. In-ūi Lō͘-tek ū 2 ê kau-liû-tō beh ūn-sàng chin hong-piān. Án-ne Lō͘-tek tio̍h hêng-sêng chi̍t-ê lô͘-si-khut. Lô͘-si kang-tiûⁿ ê bô͘-á hó, sòaⁿ-châi hó, kî-su̍t hó. Sò͘-í Lō͘-tek ê lô͘-si chiàm-iú-lu̍t sī choân sè-kài tē-it miâ. Sè-hàn ê sî nā tī Lō͘-tek ê kau-gōa thiaⁿ-tio̍h khin-khin-khiang-khiang ê siaⁿ-im kám-kak chin chhá, mā kám-kak chin chhù-bī. In-ūi chit chióng siaⁿ-im tio̍h-sī Lō͘-tek thó͘-tē ê siaⁿ-sàu. Che-sī Lō͘-tek chāi-tē ê bûn-hòa, mā-sī Lō͘-tek ê te̍k-sán.

Lô͘-si tùi Lō͘-tek ê keng-chè ū chin tōa ê pang-chān. Lí nā tī Lō͘-tek thiaⁿ-tio̍h khin-khin-khiang-khiang ê siaⁿ-im m̄-bián tōa-kiaⁿ sió-koài. Kòe-khì Lō͘-tek siōng heng ê sî-chūn tōa-tōa sè-sè ū kúi-nā pah keng kang-tiûⁿ tī chia siat-chhiúⁿ. Tio̍h in-ūi án-ne Lō͘-tek ê lô͘-si táng- -ê tek-pia̍t chē, So͘ tàng- -ê, Ông táng- -ê, Lîm táng- -ê chi̍t-tōa-tui. Tōa kang-tiûⁿ kā sió kang-tiûⁿ ê lô͘-si pau- -khí-lâi hêng-siau kàu choân sè-kài. Siōng, tiong, hā-iû, chò-hóe phah-piàⁿ. Siūⁿ bē kàu chi̍t-ki sè-sè ê lô͘-si thè Lō͘-tek thè Tâi-oân tī sè-kài ê bú-tâi-téng piàⁿ chhut hó miâ-siaⁿ. Chit chióng khin-khin khiang-khiang ê ki-hâi siaⁿ, tio̍h sī Lō͘-tek chit-phiàn thó͘-tē chāi-tē ê siaⁿ-sàu.

讀hōo你聽