​請予母語教師一个光明正大的身份

若毋是對母語有興趣，干焦靠這種無保障的頭路會餓死！年底無年終獎金，歇寒歇熱無薪水、連勞健保嘛會予學校退出！教育部明明有規定支援教師一禮拜會當教20節，一節320箍，毋過到各縣市就去予人變項刣掉！
\n以桃園縣這三年來為例：原本一禮拜會使教20節課的，所有的大間學校攏干焦核可10節課爾！賰的就是愛有大學畢業的人就配超鐘點課的鐘點費，一節以260箍來算！除了按呢，真濟母語教師愛替學校訓練語文競賽選手，有的學校會替支援老師申請一寡費用補貼！有的學校，in認為支援教師本來就是愛共學校做公工，義務來訓練選手！毋過教育部一直無予母語支援教師一个好聽的正名！干焦以「2688專案本土語言教學支援工作人員」來稱呼！講坦白的，真濟2688的支援教師佇學校是隱形人、是無被尊重佮重視的！
\n另外，對教育部佇今年5月發佈的「教育部精進國民中小學暨幼兒園本土語文實施計畫草案」，對這个草案內容，我心內出現一寡疑問！像佇草案P21對台文系所畢業的母語教師來講是一項較有淡薄仔意義的做法「3. 各校未有充足人員可教授本土語文課程時，可由通過本土語言能力認證或具有本土語文相關系所畢業之人員，依《中小學兼任代課及代理教師聘任辦法》進行聘任，以廣納優秀人才。」
\n毋過佇P10的講法，對真濟佇第一線的支援教師是足大的傷害！「 1.教學支援工作人員教育專業能力待加強與流動率高 教學支援工作人員雖具備精通本土語言聽說讀寫能力，卻多未具有教學原理、兒童心理、教材教法、多元評量等教育知能，對於學校作息、行政方式亦有不甚瞭解，易與學生、學校或家長間產生摩擦。其次，此類教學人員年齡偏高，加上工作穩定性及薪資偏低，造成人員流動率高，產生不利學生學習及造成學校困擾現象。」
\n這款講法對一直認真咧教學的支援人員，是一種無友善閣帶有足大傷害的！身為台灣母語教育學會總會常務理事佮桃園分會會長的我，應該愛替阮家己遮的辛苦的母語支援教師發聲一下！