世界母語日2014 <台語文>

1947年獨立ê巴基斯坦國 (Dominon of Pakistan), 分做東巴基斯坦kap西巴基斯坦；1971年東巴基斯坦成做獨立做這馬ê孟加拉國. 西巴基斯坦就是現今巴基斯坦國。
\n當時西巴基斯坦主要語言是烏爾都語(Urdu), 東巴基斯坦卻是講孟加拉語(Bengali) ê人較濟。1948年, 巴基斯坦國宣佈唯一官方語言是烏爾都語(Urdu), 引起東巴基斯坦多數講孟加拉語人ê不滿, 開始積極爭取孟加拉語mā成做為官方語言(Official languages)。
\n1952年2月21日, 今仔日孟加拉首都ê達卡大學學生kap爭取母語權濟濟群眾tī高等法院附近遊行時, hō͘警察開槍掃射, 有四個學生死亡, 續引起暴動。這應該是人類歷史中因為爭取語言權來死傷ê頭一擺。後來巴基斯坦當局tī 1956年2月29日宣佈孟加拉語成做第二種官方語言。
\n今仔日, 每年2月21日已經是孟加拉國ê國定假日。聯合國也tī 1999年11月17日制訂每年2月21日做世界母語日(International Mother languages day), 對2000年起實施. 後來又koh定2008年為世界母語年! 不管是母語日抑是母語年, 重點是鼓舞保存母語, 使用母語, 發展母語, 多語教育kap多元文化。
\n倒轉來看台灣, 本土母語hō͘外來政權壓迫超過100年, 這100外年是人類文明發展上濟, 上緊koh上關鍵ê坎站, 咱ê本土語言卻一直被蹧躂kap迫害, 經過日本人kap中國人按呢ê文化大屠殺(Culture genocide)了後, 咱ê母語已經偆無半條命。
\n真無簡單, 台灣民主化加減hō͘咱希望. 到1999年當時ê教育部長楊朝祥才tī chiâⁿ百位學者, 立委與母語運動人士ê面前親嘴答應國民教育1-9年每禮拜beh實施1-2點鐘母語課, 害咱歡喜甲半小死!  結果leh? 眼時前實際情形是國小1-6年級逐禮拜干焦有1點鐘! 這根本著是”打五折”mā!  教育部長講話無算是, 上bái ê教育示範! 
\n2007年扁政府制訂「台灣母語日」, 希望學校每週定一日為母語日, 鼓勵學生當日盡量使用個人母語, 也呼籲主管機關進行「母語日訪視」, 鼓勵師生說母語, 發現問題koh協助解決. 本意足讚, M̄-kú執行了ê效果按怎, 到2008以後馬政府就無teh要意. 連母語教育經費mā刣到偆一半, 實在hō͘人真「擋袂條」。
\n最近教育蔣部長又koh聲聲句句答應beh佇12年國教國中階段實施母語必選, 敢有影?