【台語世界／錄音】一日雙營

文/錄音：蘇晏德So͘, Iàn Tek

昨- -日拜六學校118週年校慶，2024年12月初2拜一補假免上課，tī路竹坐9點2分上北ê火車去lau-lau leh，今仔日坐火車beh去柳營kap林鳳營。鄭- -氏王朝帶領十萬軍眷進入台灣，為著統治方便，實施開墾田地制度，並且利用軍隊ê人力tī台南設立真chē營區，親像新營、後營、柳營、林鳳營、下營、查畝營(Cha-bó͘-iâⁿ)。台灣ê地名to̍h是記錄過去歷史ê腳跡，Che to̍h是台南有chiah-nī號做『營』ê原因。

Tī火車頂êng-êng無代誌gia̍h筆bóng寫作，Sūn-sòa沿路kā各站ê站名記錄- -落來。9點2分上北火車beh來去，心情輕鬆真歡喜，(路竹)、(大湖)到(中洲)，bat tī中洲教會kā白話字分張，(仁德)、(保安)到(台南)，大台南火車上大站；(大橋)、(永康)到(新市)，窗外樹木青翠好天氣；(南科)、(善化)、(菝仔林)，10月22 bat來chia行踏，(隆田)、(林鳳營)到(柳營)，tī-chia落車四kè行。

10點13分tī柳營車頭落車，柳營火車頭足特別ê所在是大門ê出口m̄-sī tī中央，大門是tī出站ê正手pêng，因為車頭ê頭前是私人地。車頭ê正中是一間古厝，埕斗種真chē花kap盆栽。落車先tī附近行踏chhōe靈感，然kî後為柳營火車頭寫一首詩，che to̍h是我旅遊ê目的。

柳營火車頭

拜一補假人清閒
坐tī柳營車頭月台柴椅頂
快車siú siú經過柳營lóng無停
厝角鳥仔teh kā我歡迎
四跤跳仔ûn-ûn-á行- -過真冷靜
兩排khiā thêng-thêng ê老松
用心tī車頭teh經營
特別ê車頭大門入口tī入站ê倒爿
2024.1202 tī柳營火車頭寫

詩寫煞，順大門ê路行，車頭m̄-sī tī市區，冷冷清清。路雙pêng koân-koân ê松仔樹陪我伴相思，沿鐵枝路邊正oat過平交道，看著一間店名叫做八角8 ê飲料店，我真hòⁿ-hiân去買一杯冬瓜茶，sūn-sòa問店員為啥物店名叫做八角8，伊講m̄知ài問in頭家。中晝tī家禾便當食晝，Koh行回頭tī柳營坐11點56分落南ê火車去林鳳營。柳營到林鳳營kan-na一站3.9公里，chi̍t-tia̍p-á時間niā-niā，落車kāng-khoán tī附近行行- -leh chhōe靈感，sòa接koh為林鳳營火車頭寫一首詩。

林鳳營火車頭

拋荒ê古厝恬恬無人問
哀怨ê歲月hō͘人心酸
歷盡滄桑m̄知經過jōa-chē年
Hām榕仔樹ta̍k工teh觸纏
大榕樹跤風微微
山盟海誓teh kap古厝訴情意
林鳳營車頭無鬧熱ê街市
M̄-koh有出名ê牛奶

2024.1202 tī林鳳營車頭寫

林鳳營車頭tī六甲ê郊區，車頭tī安靜iap-thiap ê所在，附近有一間拋荒ê古厝，厝頂空空無khàm蓋，古厝有pit-sûn ê灶台kap屎礐仔，Khah特別- -ê是古厝hō͘老榕仔樹ê樹根纏tiâu-tiâu，兩人糖甘蜜甜舊情綿綿。Tī-chia 40分鐘無四輪- -ê經過，久久chiah一班公車，火車頭有公車牌仔，有一个略約20歲ê媠姑娘仔teh等車，我kā問附近有啥好sńg ê所在，伊lóng用台語kap我交談，聽了khi-mó͘-chih put-lí-á
giang。結束今仔日雙營ê旅程，坐12點41分落南ê火車，徙腳離開懷念ê林鳳營。

台灣字（白話字）版

Chi̍t-ji̍t Siang-iâⁿ

Cho̍h- -ji̍t pài-la̍k ha̍k-hāu 118 chiu-nî hāu-khèng, 2024 nî 12 goe̍h chhe 2 pài-it pó͘-ká bián siōng-khò. Tī Lō͘-tek chē 9 tiám 2 hun chiūⁿ-pak ê hóe-chhia khì lau-lau leh. Kin-á-ji̍t chē hóe-chhia beh khì Liú-iâⁿ kap Lîm-hōng-iâⁿ. Tēⁿ- -sī ông-tiâu tòa-niá 10 bān kun-koàn chìn-ji̍p Tâi-oân. Ūi-tio̍h thóng-tī hong-piān, si̍t-si khai-khún chhân-tē chè-tō͘. Pēng-chhiáⁿ lī-iōng kun-tūi ê jîn-le̍k tī Tâi-lâm siat-li̍p chin-chē iâⁿ-khu, chhin-chhiūⁿ Sin-iâⁿ, Āu-iaⁿ, Liú-iâⁿ, Lîm-hōng-iâⁿ, Ē-iâⁿ, Cha-bó͘-iâⁿ. Tâi-oân ê tē-miâ to̍h sī kì-lo̍k kòe-khì le̍k-sú ê kha-jiah. Che to̍h sī Tâi-lâm ū chiah-nī hō-chò ”iâⁿ” ê goan-in.

Tī hóe-chhia téng êng-êng bô tāi-chì gia̍h pit bóng siá-chok, sūn-sòa iân-lō͘ kā kok-chām ê chām-miâ kì-lo̍k- -lo̍h-lâi. 9 tiám 2 hun chiūⁿ-pak hóe-chhia beh lâi-khì. Sim-chêng khin-sang chin hoaⁿ-hí. (Lō͘-tek), (Tōa-ô͘) kàu (Tiong-chiu), bat tī Tiong-chiu kàu-hōe kā Pe̍h-ōe-jī pun-tiuⁿ. (Jîn-tek), (Pó-an) kàu (Tâi-lâm), tōa Tâi-lâm hóe-chhia siōng tōa chām. (Tōa-kiô), (Éng-khong) kàu (Sin-chhī), thang-gōa chhiū-bo̍k chheⁿ-chhùi hó thiⁿ-khì. (Lâm-kho), (Siān-hòa), (Pa̍t-á-nâ), 10 goe̍h 22 bat lâi chia kiâⁿ-ta̍h. (Liông-tiân), (Lîm-hōng-iâⁿ) kàu (Liú-iâⁿ), tī-chia lo̍h-chhia sì-kè kiâⁿ.

10 tiám 13 hun tī Liú-iâⁿ chhia-thâu lo̍h-chhia. Liú-iâⁿ hé-chhia-thâu chiok tek-pia̍t ê só͘-chai sī tōa-mn̂g ê chhut-kháu m̄-sī tī tiong-ng. Tōa-mn̂g sī tī chhut chām ê chiàⁿ-chhiú pêng, in-ūi chhia-thâu ê thâu-chêng sī su-jîn tē. Chhia-thâu ê chiàⁿ tiong-ng sī chi̍t-keng kó͘-chhù. Tiâⁿ-táu chèng chin-chē hoe kap phûn-chai. Lo̍h-chhia seng tī hū-kīn kiâⁿ-ta̍h chhōe lêng-kám, jiân-kî-āu ūi Liú-iâⁿ hoé-chhia-thâu siá chi̍t-siú si. Che to̍h sī góa lú-iû ê bo̍k-te̍k.

Liú-iâⁿ Hoé-chhia-thâu

Pài-it pó͘-ká lâng chheng-êng
Chē tī Liú-iâⁿ chhia-thâu goa̍t-tâi chhâ-í téng
Khoài-chhia siú siú keng-kòe Liú-iâⁿ lóng bô thêng
Chhù-kak-chhiáu-á teh kā góa hoan-gêng
Sì-kha-thiàu-á ûn-ûn-á kiâⁿ- -kòe chin léng-cheng
Mn̄g-pâi khiā thêng-thêng ê lāu-chhêng
Iōng-sim tī chhia-thâu teh keng-êng
Te̍k-pia̍t ê chhia-thâu tōa-mn̂g ji̍p-kháu tī ji̍p chām ê tò-pêng
2024.1202 tī Liú-iâⁿ hé-chhia-thâu siá

Si siá soah, Sūn tōa-mn̂g ê lō͘ kiâⁿ, Chhia-thâu m̄-sī tī chhī-khu léng-léng-chheng-chheng, Lō͘ siang-pêng koân-koân ê chhêng-á-chhiū pôe góa phōaⁿ siuⁿ-si, Iân thih-ki-lō͘ piⁿ chiàⁿ-oat kòe pêng-kau-tō, Khòaⁿ tio̍h chi̍t-keng tiàm-miâ kiò-chò Peh-kak 8 ê ím-liāu-tiàm. Góa chin hòⁿ-hiân khì bé chi̍t-poe tang-koe-tê, sūn-sòa mn̄g tiàm-goân ūi-siáⁿ-mi̍h tiàm-miâ kiò-chò Peh-kak 8. I kóng m̄-chai ài mn̄g in thâu-ke. Tiong-tàu tī Ka-hô piān-tong chia̍h-tàu. Koh kiâⁿ hôe-thâu tī Liú-iâⁿ chē 11 tiám 56 hun lo̍h-lâm ê
hóe-chhia khì Lîm-hōng-iâⁿ. Liú-iâⁿ kàu Lîm-hōng-iâⁿ kan-na chi̍t-chām 3.9 kong-lí,
chi̍t-tia̍p-á sî-kan niā-niā. Lo̍h-chhia kāng-khoán tī hū-kīn kiâⁿ-kiâⁿ- -leh chhōe lêng-kám,
Sòa-chiap koh ūi Lîm-hōng-iâⁿ hé-chhia-thâu siá chi̍t-siú si.

Lîm-hōng-iâⁿ hé-chhia-thâu

Pha-hng ê kó͘-chhù tiām-tiām bô lâng mn̄g
Ai-oàn ê sòe-goa̍t hō͘ lâng sim sng
Le̍k-chīn chhong-song m̄-chai keng-kòe jōa-chē nî
Hām chhêng-á-chhiū ta̍k-kang teh tak-tîⁿ
Tōa chhêng-chhiū-kha hong bî-bî
San-bêng hái-sè teh kap kó͘-chhù sò͘ chêng-ì
Lîm-hōng-iâⁿ chhia-thâu bô nāu-jia̍t ê ke-chhī
M̄-koh ū chhut-miâ ê gû-ni
2024.1202 tī Lîm-hōng-iâⁿ chhia-thâu siá

Lîm-hōng-iâⁿ chhia-thâu tī La̍k-kah ê kau-khu. Chhia-thâu tī an-chēng iap-thiap ê só͘-chāi. Hū-kīn ū chi̍t-keng pha-hng ê kó͘-chhù. Chhù-téng khang-khang bô hàm-kòa. Kó͘-chhù ū pit-sûn ê chàu-tâi kap sái-ha̍k-á. Khah te̍k-pia̍t- -ê sī kó͘-chhù hō͘ lāu chhêng-á-chhiū ê chhiū-kin tîⁿ-tiâu-tiâu. Nn̄g lâng thn̂g-kam bi̍t-tiⁿ kū-chêng mî-mî. Tī-chia 40 hun-cheng bô sì-lián- -ê keng-kòe. Kú-kú chiah chi̍t-pan kong-chhia. Hoé-chhia-thâu ū kong-chhia pâi-á. Ū chi̍t-ê lio̍k-iok 20 hòe ê súi ko͘-niû-á teh tán-chhia. Góa kā mn̄g hū-kīn ū siáⁿ hó sńg ê só͘-chāi. I lóng ēng Tâi-gí kap góa kau-tâm, thiaⁿ liáu khi-mó͘-chih put-lí-á giang. Kiat-sok kin-á-ji̍t Siang-iâⁿ ê lú-têng. Chē 12 tiám 41 hun lo̍h-lâm ê hóe-chhia, sóa-kha lî-khui
hoâi-liām ê Lîm-hōng-iaⁿ.

讀hōo你聽