〈專文〉台灣哪有可能變菜單！

文/李恒德

川習會進前統媒一直咧炒「台灣菜單論」講Trump是生理人有交易的個性，所以有可能為著伊本身的利益共台灣列為交易的菜單！

我的看法是「聽你咧Pā-Pu！」你是咧騙外行的人毋過Trump無外行
所以台灣絕對無可能變做美中談判的菜單，理由真簡單，現步美中的勢面是中國求美國較濟抑是美國求中國較濟？美國敢有狼狽甲需要共台灣這支王牌提出來交換？下面我分析予你聽：

Trump這爿要緊的只有一項就是選票。美國人反共的意識真懸尤其國會內底便若討論反中助台的法案贊成的票數攏將近100%，台灣是抗中的第一線共台灣交換出去對Trump的選票絕對是有百害無一利。所以美國上要緊的是叫中國加買寡農產品佮飛機石油等等予Trump的選民有錢趁就好，其他欲戰欲削伊攏無咧驚。

自本中國控制的「稀罕金屬」因為Trump自第一任的任期就有注意著，並且有積極採取對策分散來源得著相當效果，所以這馬已經毋是重要課題，反倒轉來中國求美國的真濟並且攏關係著中國的生死。

頭一項是科技的制裁予中國一直無法度行入先進的行列，尤其這馬AI時代，美國因為和台灣縛做伙所以技術處處領先，中國彼爿套一句魏哲家所講「好看頭爾」所以期待美國放鬆科技制裁是中國第一要緊的課題，偏偏這項美國毋但毋肯閣愈咬愈絚。

第二項是期待美國放鬆經濟制裁開放市場予中國的經濟袂去束死。
因為美國是中國第一大市場，美國人的消費力是世界任何國家佮地區攏袂當代替，美中關係拍歹中國的產品銷袂出去，造成工人大量失業經濟衰退問題確實嚴重！

尤其最近美國佇南美洲佮中東的行動不但證明美國軍隊的戰力領先中國一大步，而且切斷中國一帶一路的布置佮石油的來源予中國受傷沉重，美國閣較無需要提台灣對中國讓步！

上好笑的是逐擺中美談判中國就趕緊提起台灣議題表示伊有偌要緊絕對毋讓步，按呢是毋是家己共底牌掀岀來予美國看，伊愈要緊美國就愈毋肯放。

無說美國的立場是「台灣是伊二戰的戰利品，暫時交予中華民國代管爾，根本就無𠄘認是中華人民共和國的」這已經是美國朝野的共讖。

其他莫講基本形勢的台灣是第一島鏈佮非紅供應鏈的關鍵地位，美國當然是絕對袂當放捒！
所以啊，講台灣是菜單根本是假議題，是認知作戰操作「疑美論」的老步佮漚步，你認為敢有需要插伊！

#生理sing-lí：生意
#Pā-Pu：吹喇叭，胡吹
#懸kuân：高
#趁thàn：賺
#削siah：拚鬥
#絚ân：緊
#無說bô-sueh：何況
#漚步àu-pōo：爛招數
#插tshap：理會

2026.5.2.