語言、教育佮生活

2月20為著欲參加『十二年國民基本教育課程綱要總綱(草案)』嘉義場的公聽會，七早八早就起來發落工廠的工課，閣拜託慶山兄來代課。是按怎愛了遮濟氣力，專工來參加這个公聽會?
\n因為我想無，這十幾年來，咱才開始注意著透過學校教育，咱愛學會曉講咱家己的母語，愛認捌咱家己的文化爾爾。毋過，我發覺咱的囡仔有心欲學，序大人、老師、新聞媒體、教育體制……煞不時來咧阻擋；講學母語會阻礙in學華語、英語；會增加囡仔的負擔；講母語會曉講、會曉聽就好；講考試無考，學彼無效……。咱教育的目的是啥物?敢毋是希望咱的序細會當共學的物件運用佇生活當中；會當和親情朋友有好的聯繫，建立好的關係。啊是按怎這陣，阿公、阿媽想欲佮孫仔講一句仔話，就愛天地顛倒反，用彼毋精傱的『台灣國語』佮孫仔講話?
\n政府一直咧強調「國際化」，當然，國際化是蓋要緊。是講佇咧追求國際化進前，咱敢捌認真共想看覓咧?世界上有佗一个國家的百姓是袂曉講家己的話，煞一直咧學別人的話佮文化?這，予我感覺真悲哀!連家己的話都講袂好勢，就準講是別人的話講甲siah-siah叫，人敢看咱會上目?敢會尊重咱?
\n閣較予人想袂曉的是對「母語」的誤解。對一個民族來講，「母語」絕對毋若是「阿母的話」遮爾簡單爾爾。母語是這塊土地久長以來釘根的語言。
\n當咱用尊重的態度，將新住民的語言列入教育體系的時陣，咱是毋是更加愛予咱的本土語言—原住民語、客語、台語有喘氣的空間，有生湠的機會。
\n教育的目的是欲解決生活中五花十色的問題，語言是生活溝通的工具，透過語言予人佮人之間有好的關係，予社會安定。本土語言更加是這塊土地歷史、文化、人文、感情的根本，向望咱的政府會當重視，好好仔規劃，親像學習其他語言仝款，對一年仔開始建立基礎，共拼音系統學予牢底，聽、講、讀、寫照步來，佇國小建立基礎，國中開始練習書寫，高中、大學以後用媠氣的台灣話寫出台灣人的聲嗽。喙講台灣話，手寫台語文，予世界各國攏會當欣賞著咱台灣正港的文學作品。