錯亂ê民主

這馬閣倒轉來看三年外前，也就是2010年底ê五都選舉ê選舉khua̋n-páng和旗仔，予人感覺有夠諷刺佮厭氣。附圖是敝人踮當時所hip ê一部份相片剪接做伙ê圖片，諸君lín應該已經看出每一支廣告攏是以台語寫的台文字句，以和人無仝款的文字畫面來搶目，想欲達到宣傳廣告的效果。
\n對競選khua̋n-páng，到逐ê應該攏知影ê參選人攏會用當地多數人所講ê語種來做競選演講。tsia ê種種現象，戇戇ê阮掠準講一聲本地語言會當出頭天–ah，人選舉連宣傳的廣告攏用台語咧寫。佇阮做台文工作ê專業眼光裡，tsia ê 廣告頂用ê字雖講隨人寫隨人ê無真一致ê標準，毋過實質上已經予阮kha趒手弄自我麻醉ê歡喜。
\n五都選舉煞，接紲是2012年頭ê總統選舉，閣較予阮歡喜ê是2011年4月底，某政黨ê黨內總統提名初選競選活動暗會頂，這位參選人一向tī電視看著伊，都從來無聽過伊講台語的人，竟然規暗差不多有七成的演講是用台語咧講。
\n無論佗一个政黨，選舉時攏是用底層頭家ê語言做in ê競選ê工具，是講tsia ê一票一票選出來ê頭人坐著大位了後，越頭竟然講另外一款ê語言，選舉拜票講頭家ê語種，坐著大位了後，講ê煞是in所謂ê「官話」，　　李前總統有一句名言「毋通袂記得權力是來自人民」，攑「民主」大旗的「中華民國」出現「錯亂ê民主」，按呢敢也有資格佮人講是「民主國家」？
\n一个民主國家聚集群居ê選舉投票人所講ê語言種，敢毋是該當然就是「官話/國語」，哪會使有「官話」和「非官話」之分？抑無敢算是「民主國家」？
\n台灣人講台灣話，台灣話含原住民語、客家語、台語（指華語以外多數台灣人講ê一種話）敢毋是天公地道ê代誌？是按怎lán一票一票選出來ê頭人坐著大位了後，就無閣講lán ê話語，串講攏是in自認清高ê「官話」，閣較夭壽ê是，in ê官僚都毋予lán ê囡仔讀lán 家己ê語文冊，連上基本ê 九年一貫國民教育，對國小到國中都毋予lán一貫，lán就愛kā in pun(分)，愛kā in討，in敢毋是lán一票一票選出來ê頭人，台灣ê民主tsiânn實是錯亂–ah！