我看台灣的語言教育

聯合國教科文組織（UNESCO）佇1999年，為著欲促進語言、文化的多樣性佮多語種化，共每年2月21定做「世界母語日」。閣佇2001年通過的『世界文化多樣性宣言』，向望會當保存現有的文化多樣性。
\n我本人是佇日本時代出世的，雖然彼當陣日本政府有皇民化的政策，毋過嘛無禁止台灣人講家己的母語，尤其是日本統治台灣50年久，嘛無台灣人因為按呢，煞袂曉講家己的母語。
\n咱來看香港佮新加坡。香港受英國統治146年，英國人嘛無咧禁止香港人講in的廣東話，講英語佮廣東話攏會通。新加坡自英國政府統治到今的政府，嘛攏無咧禁止在地的唐人、馬來人佮印度人的母語，in的族語佮英語仝款，攏是官方的語言。
\n是按怎中國國民黨政府拍輸走贏，1949年走來到台灣，就佇1951年7月，開始推行in所講的『國語』，強制學生干焦會使得講『國語』，袂使得講家己的母語。若無，就會夆罰徛、罰錢，抑是掛『我說方言』的狗牌仔，致到咱台灣人的母語強欲失傳去矣，真明顯的違反UNESCO的多語化政策，嚴重危害本土族群的語言佮文化。
\n自細漢讀『國文』讀過濟濟的文言文，親像『師說』、『先妣事略』，『瀧岡阡表』、『陳情表』、『出師表』、『祭十二郎文』、『中國文化教材』佮『總統文告』遮个有空無榫閣無路用的物件，幾十年來除了考試以外，親像也無啥物路用，讀來讀去讀甲家己的生活語言煞講無路來。
\n最近咱教育部咧『危調』高中課綱，in講文言文的份量無懸，猶未到65%。講彼啥物痟話! 啥物時代啦，有彼款落伍的觀念。基本上，文言文、古文若有人欲研究，咱無反對；毋過提遮的物件教育咱的下一代，閣用來做各種考試的項目，是非常可惡的；按呢予人無時間佮氣力通學本土的語言佮將來有路用的外國語言。
\n咱用佇語言教育的時間是無算少，毋過時間上的配置是嚴重的失調；用佇教中國文言文佔傷過濟的時間，實在誠毋是款。有真濟人講因為訂遐課綱的人 ，文言文、古文是in所會曉教的金飯碗，當然in著攔(ânn)牢牢；是毋是事實咱毋知，若真正是按呢，這款自私自利的做法，敢有天理？