【台語世界／錄音】Kā「中國史」改做「東亞史」ê看法

教育部beh thui-sak kā「中國史」改做「東亞史」，有人贊聲，mā有人反對。Che tī民主社會lóng真正常。M̄-koh有大中國意識ê人tō bē-su神主牌á hō͘人kòng-kòng破kâng-khoán。Tī chia提出個人ê看法，kap ta̍k-ê來分享。

Àn 國民學校ê社會課、國中kap高中ê歷史、到大學ê中國通史，àn夏商周、秦漢、魏晉南北朝、隋唐、五代十國、宋元明清、民國、共產中國，為tio̍h考試，痛苦吞腹內，koh khah án-chóaⁿ mā tio̍h 讀。只是beh應付考試，lóng無ka-tī ê想法。年久月深，吸收bē-chió封建思想kap儒家愚民思想ê毒素。Hó-ka-chài，我體內排毒ê系統koh sǹg bē-bái，chia-ê毒素lóng kā清tàn-sak ah。
Bat看過中國ê歷史戲劇，中國ê歷史tō是1部皇帝帝位ê爭奪史，犧牲gōa-chē無辜百姓ê性命。朝代ê替換、無數ê戰爭，有gōa-chē歷史ê資料無–去，留–lo̍h-lâi ê kam lóng 是真–ê？歷史只是teh為帝王服務，史官nā寫m̄-tio̍h字，頭殼tō無–去。Só͘-pái我認為中國ê歷史是3分真，7分假，kám有需要thó-chè人ê性命去讀chi̍t-kóa假ê mi̍h-kiāⁿ？

教lán講中國是禮儀之邦，sì-kho͘-lê-á ê國家kap民族hō-chò東夷、南蠻、西戎、北狄。kan-tāⁿ in是人，別人lóng是豬狗禽獸。日本歷史上所發生ê謀反事件，是判當事人hām i ê toa-kiáⁿ 死刑，其他ê家族流放。M̄-koh中國ê做法是誅九族，斬草除根。是siáⁿ人teh做野蠻ê代誌？Koh教lán講匈奴hō͘ 漢帝國phah敗，向西逃走，tī歐洲建立「Hungary」chit ê國家；突厥hō͘ 唐帝國phah敗，向西逃走，建立「Turkey」chit ê國家，bē-su中國gōa gâu。現此時Hungary hām Turkey lóng是共和制度ê國家，中國iā koh是獨裁專制ê國家，是siáⁿ人khah文明？Koh繼續講siáⁿ-mih禮儀之邦，真正是sià-sí sià-chèng，kòng破身分證。

Koh教lán講文天祥、岳飛、鄭成功等人是民族英雄，國民學校ê時bat寫過作文，〈我siōng崇拜ê民族英雄〉。我bat看過1篇文章，作者講台灣無民族英雄，m̄-koh有保護家園ê英雄。Chhin-chhiūⁿ 乙未戰爭ê時，吳湯興、姜紹祖等人所領導ê客家義軍，勇敢teh hām日本兵相戰，保護lán ê家園，in正是lán尊敬ê英雄。學生時代m̄-bat學過乙未戰爭chit段歷史，是看〈1895〉chit齣電影chia chai-iáⁿ，真iàn-khì。

孫文發動革命，建立中華民國，我kā尊敬，m̄-koh是án-chóaⁿ我tō ài稱呼i 是「國父」？Ta̍k-ê人lóng chai-iáⁿ，1911年hit當時ê台灣是大日本帝國ê領土，武昌起義hām台灣有siáⁿ ti-tāi？Goán tau對面teh換戶長，kap我有siáⁿ關係？當時孫文hō͘ 清帝國通緝，sì-kè走路，走來台灣，tī台灣ê時間chiah gōa久，hō͘人稱呼「國父」，i ka-tī mā會bū-sà-sà。

中國ê歷史nā讀愈深，中tio̍h大中國意識ê毒tō愈深。有時間thang關心幾千里遠ê所在，幾千tang前發生ê代誌，ná m̄ ke用心來關心lán所tòa ê台灣？台灣有歷史ê記載sui-bóng kan-tāⁿ 400 tang，m̄-koh chit 400 tang ê歷史lán kam lóng讀有chiâu-ûn？尤其是最近百幾tang來，日本ê統治對台灣當然有好有bái，台灣總督府民政長官後藤新平bat講，台灣人驚死、貪財、愛面子，iā tō是因為台灣人驚死，對抗武漢肺炎chiah ē-tàng做kah chiah-nī好。台灣人hō͘日本人教kah ta̍k-hāng照步來，m̄-koh Kô͘-bīn-tháng ta̍k-hāng靠關係，無beh照規矩來，無beh承認日本ê建設，beh kā台灣人ùi日本皇民chiâⁿ做中國人，thún-ta̍h台灣，食台灣人ê肉，chhńg台灣人ê骨，lim 台灣人ê血，吸台灣人ê髓，做惡做毒，ná-ē lóng無講？

有大中國意識ê人nā 講tio̍h「南京大屠殺」，tō咬牙切齒，bē-su ài日本人血債血還，nā講tio̍h 「228事件」 kap「白色恐怖」，tō kek-tiām-tiām，ài lán向前看。前行政院長俞國華bat án-ne講：「當年滿清入關，thâi-sí真chē漢人，mā-bô kā漢人hōe失禮」。意思tō是講，tī 228事件 kap白色恐怖無辜犧牲ê siǎn-pái lóng 該死 tō tio̍h？Che tō是「高級外省人」ê心態，用in ê思維所編寫ê歷史kam ē讀–tit？Khiā tī台灣人ê立場來看，228事件kap白色恐怖對lán ê影響是超過南京大屠殺太chē，何況南京大屠殺發生ê原因是戰爭，Kô͘-bīn-tháng ê軍隊老早tō 離開南京城，放百姓hō͘日本兵thâi，in kam無責任？228事件kap白色恐怖是Kô͘-bīn-tháng有計畫beh消滅台灣ê gâu人，thang好進行愚民統治。

米國人kám ē 講in是米國人，mā是英國人？米國人kam需要kā英國ê歷史bat透透？Kā「中國史」改做「東亞史」，koh kā份量減少，是tú-á-hó niâ。立足台灣，放眼亞洲，邁向世界，chiah是正確ê歷史觀。教育部beh thui-sak kā「中國史」改做「東亞史」，我kā hoah 1聲讚！！

台灣字（白話字）版
Kā ‘Tiong-kok-sú’ kái-chò ‘Tang-a-sú’ ê khòaⁿ-hoat  Tiuⁿ , Tì Hong

Kàu-io̍k-pō͘ beh thui-sak kā ‘Tiong-kok-sú’ kái-chò ‘Tang-a-sú’, ū-lâng chàn-siaⁿ, ū-lâng hoán-tùi. Che tī bîn-chú siā-hōe lóng chin chèng-siông. M̄-koh ū tōa Tiong-kok ì-sek ê lâng tō bē-su sîn-chú-pâi-á hō͘ lâng kòng-kòng-phòa kâng-khoán. Tī chia thê-chhut kò-jîn ê khòaⁿ-hoat, kap ta̍k-ê lâi hun-hióng.
Àn kok-bîn ha̍k-hāu ê siā-hōe-khò, kok-tiong, ko-tiong ê le̍k-sú, kàu tāi-ha̍k ê Tiong-kok thong-sú; àn Hā, Siong, Chiu, Chîn, Hàn, Ūi, Chìn, Lâm-pak-tiâu, Sûi, Tông, Ngó͘-tāi, Si̍p-kok, Sòng, Goân, Bêng, Chheng, Bîn-kok, Kiōng-sán Tiong-kok, ūi-tio̍h khó-chhì, thòng-khó͘ thun pak-lāi. Koh khah án-chóaⁿ mā tio̍h tha̍k. Chí-sī beh èng-hù khó-chhì, lóng bô ka-tī ê siūⁿ-hoat. Nî-kú goe̍h-chhim, khip-siu bē-chió hong-kiàn su-sióng kap Jû-ka gû-bîn su-sióng ê to̍k-sò͘. Hó-ka-chài, góa thé-lāi pâi-to̍k ê hē-thóng koh sǹg bē-bái. Chia ê to̍k-sò͘ lóng kā chheng tàn-sak ah.
Bat khòaⁿ-kòe Tiong-kok ê le̍k-sú hì-kio̍k. Tiong-kok ê le̍k-sú tō sī 1 pō͘ hông-tè tè-ūi ê cheng-toa̍t-sú. Hi-seng gōa-chē bû-ko͘ peh-sèⁿ ê sèⁿ-miā. Tiâu-tāi ê thè-ōaⁿ, bû-sò͘ ê chiàn-cheng, ū gōa-chē le̍k-sú ê chu-liāu bô–khì. Lâu–lo̍h-lâi ê kám lóng sī chin–ê? Le̍k-sú chí-sī teh ūi tè-ông ho̍k-bū. Sú-koaⁿ nā siá m̄-tio̍h jī, thâu-khak tō bô–khì. Sò͘-pái góa jīn-ûi Tiong-kok ê le̍k-sú sī 3 hun chin, 7 hun ké. Kám ū su-iàu thó-chè lâng ê sèⁿ-miā khì tha̍k chi̍t-kóa ké ê mi̍h-kiāⁿ?
Kà lán kóng Tiong-kok sī lé-gî chi pang. Sì-kho͘-lê-á ê kok-ka kap bîn-cho̍k hō-chò Tong-î, Lâm-bân, Se-jiông, Pak-te̍k. Kan-tāⁿ in sī lâng, pa̍t-lâng lóng sī ti káu khîm-siù. Ji̍t-pún le̍k-sú siōng só͘ hoat-seng ê bô͘-hoán sū-kiāⁿ, sī phòaⁿ tang-sū-jîn hām i ê toa-kiáⁿ sí-hêng, kî-tha ê ka-cho̍k liû-hòng. M̄-koh Tiong-kok ê chò-hoat sī thi kiú-cho̍k, chám chháu tû kin. Sī siáⁿ lâng teh chò iá-bân ê tāi-chì? Koh kà lán kóng Hiong-lô͘ hō͘ Hàn-tè-kok phah-pāi, hiòng sai tô-cháu, tī Au-chiu kiàn-li̍p ‘Hungary’ chit ê kok-ka. Thut-khoat hō͘ Tông-tè-kok phah-pāi, hiòng sai tô-cháu, kiàn-li̍p ‘Turkey’ chit ê kok-ka. Bē-su Tiong-kok gōa gâu. Hiān-chú-sî Hungary hām Turkey lóng sī kiōng-hô chè-tō͘ ê kok-ka. Tiong-kok iā koh sī to̍k-chhâi choan-chè ê kok-ka. Sī siáⁿ lâng khah bûn-bêng? Koh kè-sio̍k kóng siáⁿ-mih lé-gî chi pang. Chin-chiàⁿ sī sià-sí sià-chèng, kòng-phòa sin-hūn-chèng.
Koh kà lán kóng Bûn Thian-siông, Ga̍k-hui, Tēⁿ Sêng-kong téng lâng sī bîn-cho̍k eng-hiông. Kok-bîn ha̍k-hāu ê sî bat siá kòe chok-bûn “Góa siōng chông-pài ê bîn-cho̍k eng-hiông”. Góa bat khòaⁿ-kòe 1 phiⁿ bûn-chiuⁿ. Chok-chiá kóng Tâi-oân bû bîn-cho̍k eng-hiông. M̄-koh ū pó-hō͘ ka-hn̂g ê eng-hiông. Chhin-chhiūⁿ It-bī Chiàn-cheng ê sî, Ngô Thng-heng, Khiang Siāu-chó͘ téng lâng só͘ léng-tō ê Kheh-ka gī-kun. Ióng-kám teh hām Ji̍t-pún-peng sio-chiàn. Pó-hō͘ lán ê ka-hn̂g. In chiàⁿ-sī lán chun-kèng ê eng-hiông! Ha̍k-seng sî-tāi m̄-bat o̍h-kòe It-bī Chiàn-cheng chit-tōaⁿ le̍k-sú. Sī khòaⁿ ‘1895’ chit chhut tiān-iáⁿ chia chai-iáⁿ, chin iàn-khì.
Sun-bûn hoat-tōng kek-bēng, kiàn-li̍p Tiong-hôa-bîn-kok, góa kā chun-kèng. M̄-koh sī án-chóaⁿ góa tō ài chheng-ho͘ i sī ‘kok-hū‘? Ta̍k-ê lâng lóng chai-iáⁿ, 1911 nî hit-tong-sî ê Tâi-oân sī Tōa-ji̍t-pún Tè-kok ê léng-thó͘. Bú-chhiong khí-gī hām Tâi-oân ū siáⁿ ti-tāi? Goán tau tùi-bīn teh ōaⁿ hō͘-tiúⁿ, kap góa ū siáⁿ koan-hē? Tong-sî Sun-bûn hō͘ Chheng-tè-kok thong-chi̍p. Sì-kè cháu-lō͘. Cháu–lâi Tâi-oân. Tī Tâi-oân ê sî-kan chia gōa-kú, hō͘ lâng chheng-ho͘ sī ‘kok-hū’. I ka-tī mā ē bū-sà-sà.
Tiong-kok ê le̍k-sú nā tha̍k jú chhim, tiòng tio̍h tōa Tiong-kok ì-sek ê to̍k tō jú chhim. Ū sî-kan thang koan-sim kúi chheng lí hn̄g ê só͘-chāi, kúi chheng tang chêng hoat-seng ê tāi-chì, ná m̄ ke iōng-sim lâi koan-sim lán só͘ tòa ê Tâi-oân? Tâi-oân ū le̍k-sú ê kì-chài sui-bóng kan-tāⁿ 400 tang, m̄-koh chit 400 tang ê le̍k-sú lán kam lóng tha̍k ū chiâu-ûn? Iû-kî sī chòe-kīn pah kúi tang lâi, Ji̍t-pún ê thóng-tī tong-jiân ū hó ū bái, Tâi-oân Chóng-tok-hú bîn-chèng tiúⁿ-koaⁿ Goto Sinpei bat kóng, Tâi-oân-lâng kiaⁿ-sí, tham-châi, ài-bīn-chú. Iā tō sī in-ūi Tâi-oân-lâng kiaⁿ-sí, tùi-khòng Bú-hàn hì-iām chiah ē-tàng chò kah chiah-nī hó. Tâi-oân-lâng hō͘ Jit-pún-lâng kà kah ta̍k-hāng chiàu-pō͘-lâi. M̄-koh Kô͘-bīn-tháng ta̍k-hāng khò koan-hē. Bô beh chiàu kui-kí lâi. Bô beh sêng-jīn Ji̍t-pún ê kiàn-siat. Beh kā Tâi-oân-lâng ùi Ji̍t-pún hông-bîn chiâⁿ chò Tiong-kok-lâng. Thún-ta̍h Tâi-oân. Chia̍h Tâi-oân-lâng ê bah, chhńg Tâi-oân-lâng ê kut, lim Tâi-oân-lâng ê hoeh, suh Tâi-oân-lâng ê chhóe. Chò ok chò to̍k, ná-ē lóng bô kóng?
Ū tōa Tiong-kok ì-sek ê lâng nā kóng tio̍h ‘Lâm-kiaⁿ tōa tó͘-sat’ tō kā gê chhiat khí. Bē-su ài Jit-pún-lâng hiat-chè hiat-hâiⁿ. Nā kóng tio̍h ‘228 Sū-kiāⁿ’ kap ‘Pe̍h-sek khióng-pò͘’, tō kek-tiām-tiām, ài lán hiòng chiân khòaⁿ. Chêng Hêng-chèng īⁿ-tiúⁿ Jû Kok-hoa bat án-ne kóng, ‘Tong-nî Móa-chheng li̍p koan, thâi-sí chin-chē Hàn-jîn, mā-bô kā Hàn-jîn hōe sit-lé!” Ì-sù tō sī kóng, tī 228 sū-kiāⁿ kap Pe̍h-sek khióng-pò͘ bû-ko͘ hi-seng ê siǎn-pái lóng kai-sí tō tio̍h? Che tō sī ‘ko-kip gōa-séng-lâng’ ê sim-thài, iōng in ê su-ûi só͘ pian-siá ê le̍k-sú kam ē tha̍k–tit? Khiā tī Tâi-oân-lâng ê li̍p-tiûⁿ lâi khòaⁿ, 228 Sū-kiāⁿ kap Pe̍h-sek khióng-pò͘ tùi lán ê éng-hióng sī chhiau-kòe Lâm-kiaⁿ tōa tó͘-sat thài chē! Hô-hòng Lâm-kiaⁿ tōa tó͘-sat ê goân-in sī chiàn-cheng. Kô͘-bīn-tháng ê kun-tūi láu-chá tō lî-khui Lâm-kiaⁿ-siâⁿ. Pàng peh-sèⁿ hō͘ Ji̍t-pún-peng thâi. In kam bô chek-jīm? 228 Sū-kiāⁿ kap Pe̍h-sek khióng-pò͘ sī Kô͘-bīn-tháng ū kè-ōe beh siau-bia̍t Tâi-oân ê gâu lâng, thang hó chìn-hêng gû-bîn thóng-tī.
Bí-kok-lâng kám ē kóng in sī Bí-kok-lâng, mā sī Eng-kok-lâng? Bí-kok-lâng kám ū su-iàu kā Eng-kok ê le̍k-sú bat thàu-thàu? Kā ‘Tiong-kok-sú’ kái-chò ‘Tang-a-sú’. Koh kā hūn-liōng kiám-chió, sī tú-á-hó niâ. Li̍p-chiok Tâi-oân, hòng-gán A-chiu, māi-hiòng sè-kài, chiah sī chèng-khak ê le̍k-sú-koan. Kàu-io̍k-pō͘ beh thui-sak kā ‘Tiong-kok-sú’ kái-chò ‘Tang-a-sú’, góa kā hoah 1 siaⁿ chán!!
讀hōo你聽：

文章屬作者個人意見，文責歸屬作者，本報提供意見交流平台，不代表本報立場。