【台語世界／錄音】蜜蜂徙岫 Bi̍t-phang Sóa Siū

佇leh開始進前，我欲kā逐家紹介一寡仔蜜蜂ê智識。伊ê成長過程ùi蜂王hām公ê蜜蜂交尾了後放卵，卵變幼蟲，幼蟲變蜂蝦，蜂蝦變蜜蜂，這四ê階段ài經過3禮拜久，人講「一山不容二虎」當蜂岫內底有兩隻以上ê蜂王ê時，就是欲pun岫的時陣ah。這時做工–á蜂會先飛出–來，蜂王和公ê蜜蜂tòe-leh後壁出岫。這陣蜂á會顫動翼股發出聲音，順紲分泌特殊ê氣味來當做互相連繫ê信號。這時蜂王會揣一个所在歇–落-來。遐–ê綴出–來ê蜂á就hām蜂王結做kui球，有chi̍t-pòaⁿ-chiah-á會先飛去chhōe所在結岫，所在chhōe好tō規陣飛走。

我佇國中–ê leh教冊，有一工無意中tī學校內底發見蜂á颺颺飛，kā看一下真，一丸蜂球結tī樹á頭，bat佇電視看過，知影這陣蜂leh分岫，本底想講看就好，m̄-過學生á出出入入，驚in hō͘蜂叮–tio̍h，lāu-sin–ê就頭毛試火，kā捧看敢會kā人叮。我ta̍uh-ta̍uh-á伸手對下跤慢慢仔kā撈chi̍t-me起來，蜂á佇手捗趖來趖去動無時停，感覺ngiau-ngiau。可能是溫度和氣味bô-siáⁿ仝，一隻一隻koh飛轉去攬做伙。第二工koh去kā看，已經無四界飛ah，規陣mā無親像chăng遐爾仔活跳，恬恬仔khut做堆，想講若是予人知，定著ài處理，我choăiⁿ tèⁿ恬恬無通報，橫直it–lâi無危險性，jī–lâi𪜶chhōe著新所在就會飛走，按呢逐家攏省事事省。

蜂á這件代誌，落尾hō͘總務處知影了後，就通報hō͘消防隊來處理。in處理ê方式，m̄是kā蜂王掠徙位，若是按呢，蜂á就bōe死kui塗跤。in是提蠓仔水點火，用火kā濺予死，sûi死–ê算好積德，若較歹運–ê，m̄是tī塗跤ngiauh，bô就是予蠓仔水濺–tio̍h，早慢無命，攏是艱苦死。

咱人tī地球徛起，和天頂飛ê鳥隻，塗跤兜活動ê走獸，蟲豸，水底泅–ê水族動物，koh有提供動物食物ê花草樹木等ê植物，敢m̄是攏ài平等看待。為著性命ê維持，各種ê動物攏會chia̍h其他種類ê動物a̍h是植物。所有ê生物攏是食飽tō好，干焦人類siōng痟貪，為著欲過較心爽ê生活，往往食飽了後，koh撈過界，嚴重侵犯別項物種ê生存空間。舉一ê例，Amazonia踮南美洲咱kā號做地球ê肺。為著欲開墾牧場soah來kā雨林ê樹仔chhò掉。自2000年到2018年18年中間chhò掉ê面積有14个臺灣遐爾仔大，差不多Amazonia面積ê 8%無去ah，這內底有歇偌濟動物？m̄但按呢，kám知影，雨林會使調節地球ê氣候？因為chhò樹仔所擺地球會ná-lâi ná sio-joa̍h，溫度變懸會hō͘南極和北極ê冰層溶–khì，致使海水漲懸，bē少國家會chŏaⁿ無–khì。這就是人類ê自私，若無sió chat–leh，災禍會翻頭轉來家己身–上。

我定定leh想，人和世間萬物，敢bē當好好á做伙？咱人有智慧，有智識佮經驗ê傳承，só͘-pái有能力來控制其他物種，設使m̄是危害tio̍h咱人ê性命安全，咱ài去學習按怎生活做伙，若是有安全上ê考慮，ài用bōe造成傷害ê方式來遷徙。以這pái校園蜂á徙岫事件來講，欲就kā學生教育，莫去攪吵蜂á，遠遠–ā共觀察就好，若無驚學生á hō͘蜂叮–tio̍h對家長歹交代，會使叫蜂農來tàu幫贊，收蜂ài hō͘專業–ê來，mā會當kā學生和教職員上一節用錢無tè買ê性命教育課。
[nop]
當蜂岫內底有兩隻以上ê蜂王ê時，就是欲pun岫的時陣ah。示意圖／Pixabay[/nop]
台灣字（白話字）版

Tī-leh khai-sí chìn-chêng, góa beh kā ta̍k-ke siāu-kài chi̍t-kóa-á bi̍t-phang ê tì-sek. I ê sêng-tióng kòe-thêng ùi phang-ông hām kang ê bi̍t-phang kau-bóe liáu-āu pàng nn̄g, nn̄g pìⁿ iù-thâng, iù-thâng pìⁿ phang-hê, phang-hê pìⁿ bi̍t-phang. Chi̍t 4 ê kai-tōaⁿ ài keng-kòe 3 lé-pài-kú. Lâng kóng, “It-soaⁿ put-iông jī-hó͘.” Tng-tong phang-siū lāi-té ū nn̄g chiah í-siōng ê phang-ông ê sî, tō-sī beh pun-siū ê sî-chūn ah. Chi̍t-sî chò-kang-á phang ē seng poe–chhut-lâi. Phang-ông hām kang ê bi̍t-phang tòe-leh āu-piah chhut-siū. Chi̍t-tīn phang-á ē chùn-tōng si̍t-kó hoat-chhut siaⁿ-im, sūn-sòa hun-pì te̍k-sû ê khì-bī lâi tòng-chò hō͘-siōng liân-hē ê sìn-hō. Chi̍t-sî phang-ông ē chhōe chi̍t-ê só͘-chāi hioh–lo̍h-lâi. Hia-ê tóe–chhut-lâi ê phang-á tō hām phang-ông kiat chò kui-kiû. Ū chi̍t-pòaⁿ-chiah-á ē seng poe khì chhōe só͘-chāi kiat siū, só͘-chāi chhōe hó tō kui-tīn poe-cháu.

Góa tī kok-tiong–ê leh kà-chheh. Ū chi̍t-kang bô-ì-tiong tī ha̍k-hāu lāi-té hoat-kiàn phang-á iāⁿ-iāⁿ-poe. Kā khòaⁿ-chi̍t-ē chin, chi̍t-oân phang-kiû kiat tī chhiū-á-thâu. Bat tī tiān-sī khòaⁿ–kòe, chai-iáⁿ chit-tīn phang leh pun-siū. Pún-té siūⁿ-kóng khòaⁿ tō-hó, m̄-koh ha̍k-seng-á chhut-chhut-ji̍p-ji̍p, kiâⁿ in hō phang tèng–tio̍h. Lāu-sin–ê tō thâu-mn̂g chhì-hóe, kā phóng khòaⁿ kám-ē kā- âng tèng. Góa tau̍h-tau̍h-á chhun-chhiú ùi ē-kha bān-bān-á kā hô͘ chi̍t-me khí–lâi, phang-á tī chhiú-pô͘ sô-lâi sô-khì tāng bô-sî-thêng, kám-kak ngiau-ngiau. Khó-lêng sī un-tō͘ hām khì-bī bô-siáⁿ-kâng, chi̍t-chiah chi̍t-chiah koh poe tńg-khì lám chò-hóe. Tē-jī kang koh khì kā khòaⁿ, í-keng bô sì-kè poe ah. Kui-tīn mā bô chhin-chhiūⁿ chăng hiah-nī-á oa̍h-thiàu. Tiām-tiām-á khut-chò-tui. Siūⁿ kóng nā-sī hō͘ lâng chai tiāⁿ-tio̍h ài chhú-lí. Góa choăiⁿ tìⁿ tiām-tiām bô thong-pò. Hûiⁿ-ti̍t it–lâi bô gûi-hiám-sèng, jī–lâi in chhōe-tio̍h sin só͘-chāi to̍h-ē poe-cháu. Án-ne ta̍k-ke lóng séng-sū sū-sèng.

Phang-á chit-kiāⁿ tāi-chì lo̍h-bóe hō͘ chóng-bū-chhù chai-iáⁿ liáu-āu, tō thong-pò hō͘ siau-hông-tūi lâi chhú-lí. In chhú-lí ê hong-sek, m̄-sī kā phang-ông lia̍h sóa-ūi. Nā-sī án-ne, phang-á tō-bē sí kui thô͘-kha. In sī the̍h báng-á-chúi tiám hóe, iōng hóe kā chōaⁿ hō͘ sí! Sûi-sí–ê sǹg hó chek-tek. Nā khah pháiⁿ ūn–ê, m̄-sī tī thô͘-kha ngiauh, bô tō-sī hō͘-báng-á-chúi chōaⁿ–tio̍h, chá-bān bô-miā, lóng sī kan-khó͘ sí.

Lán lâng tī tē-kiû khiā-khí, hām thiⁿ-téng poe–ê chiáu-chiah, thô͘-kha-tau oa̍h-tāng ê cháu-siù, thâng-thōa, chúi-té siû–ê chúi-cho̍k tōng-bu̍t, koh-ū thê-kiong tōng-bu̍t chia̍h-mi̍h ê hoe chháu chhiū-bo̍k téng ê si̍t-bu̍t, kám m̄-sī lóng ài pêng-téng khòaⁿ-thāi? Ūi-tio̍h sèⁿ-miā ê î-chhî, kok-chióng ê tōng-bu̍t lóng ē chia̍h kî-tha chióng-lūi ê tōng-bu̍t a̍h-sī si̍t-bu̍t. Só͘-ū-ê seng-bu̍t long-sī chia̍h-pá tō-hó, kan-na jîn-lūi siōng siáu-tham! Ūi-tio̍h beh kòe khah sin-sóng ê seng-oa̍h, éng-éng chia̍h-pá liáu-āu, koh hô͘ kòe-kài, giâm-tiōng chhim-hoān pa̍t-hāng bu̍t-chióng ê seng-chûn khong-kan. Kí chi̍t ê lē, Amazonia tiám-tī Lâm-bí-chiu lán kā hō chò tē-kiû ê hì. Ūi-tio̍h beh khai-khún bo̍k-tiûⁿ soah-lâi kā hō͘-nâ ê chhiū-á chhò tiāu. Chū 2000 nî kàu 2018 nî 18nî tiong-kan chhò tiāu ê bīn-chek ū 14 ê Tâi-oân hiah-nī-á tōa, chha-put-to Amazonia ê bīn-chek ê 8% bô–khì ah. Chi̍t lāi-té ū hioh lōa-chē tōng-bu̍t? M̄-nā-án-ne, kám chai-iáⁿ, hō͘-nâ ē-sái tiâu-chiat tē-kiû ê khì-hāu. In-ūi chhò chhiū-á só͘-pái tē-kiû ē ná-lâi ná sio-joa̍h. Un-tō͘ piàn koân ē hō͘ Lâm-ke̍k hām Pak-ke̍k ê peng-chân iûⁿ–khì. Tì-sú hái-chúi tiùⁿ-koân, bē-chió kok-ka ē chŏaⁿ bô–khì. Che tō-sī jîn-lūi ê chū-su! Nā-bô sió chat–leh, chai-ê ē hoan-thâu tńg-lâi ka-kī sin-siōng.

Góa tiāⁿ-tiāⁿ teh siūⁿ, lâng hām sè-kan bān-bu̍t, kám bē-tàng hó-hó-á chò-hóe? Lán-lâng ū tì-hūi, ū tì-sek kap keng-giām ê thoân-sêng. Só͘-pái ū lêng-le̍k lâi khòng-chè kî-tha ê bu̍t-chióng. Siat-sú m̄-sī ē gûi-hāi tio̍h lán-lâng ê sìⁿ-miā an-choân, lán ài khì ha̍k-si̍p án-chóaⁿ seng-oa̍h chò-hóe. Nā-sī ū an-choân siōng ê khó-lū, ài iōng bōe chō-sêng siong-hāi ê hong-sek lâi kā chhian-sóa. Í chi̍t-pái hāu-hn̂g phang-á sóa siū sū-kiāⁿ lâi kóng, beh tio̍h kā ha̍k-seng kàu-io̍k, mài khì kiáu-chhá phang-á, hn̄g-hn̄g–á kā koan-chhat tō-hó. Nā-bô kiaⁿ ha̍k-seng-á hō͘ phang tèng–tio̍h tùi ka-tiúⁿ pháiⁿ kau-tài. Ē-sái kiò phang-lông lâi tàu pang-chān, siu-phang ài hō͘ choan-gia̍p–ê lâi. Mā ē-tàng kā ha̍k-seng hām kàu-chit-goân siōng chi̍t-chiat iōng chîⁿ bô-tè bé ê sìⁿ-miā kàu-io̍k-khò.
讀hōo你聽：

文章屬作者個人意見，文責歸屬作者，本報提供意見交流平台，不代表本報立場。