​【台語世界／錄音】無百面是真相！

是按怎欲揀這篇：
網路時代注重資訊thang光，ē-tàng透過Google揣著濟濟訊息，m̄-koh揣–著ê消息無一定是值得信任–ê。傳統媒體替lán把守ê時代已經過去，新時代ê規矩suah iáu未起造好勢，個人ê資訊吸收beh按怎管理，已經tsiânn做每一个人ê難題。
 
啥mi̍h是「真相」？Lán先問家己tsit个問題，尤其是leh面對闊bóng-bóng ê網路世界ê時。面對五花十色ê資訊，lán到底ài相信啥，啥mi̍h koh是值得lán相信–ê？若是lán kan-tann相信感覺、倚靠情感，無經過邏輯思考，就算有理性ê分析囥tī面頭前，mā是tènn做無khuàinn，án-ne tiānn-tio̍h ē對國家ê民主造成tsiok大ê傷害。
 
現代社會ê濟濟資訊透過網路媒體生湠、分張，一个傳過一个，若是有人刁工beh影響選舉á是政策ê方向，he是真簡單ê代誌。Tī網路時代，手機仔pué–一-下，不管有路用、無路用ê資訊一大堆，lán無時間mā貧惰去求證，自án-ne suah無去思考，hông牽leh行。
 
網路時代注重資訊公開，m̄-koh tse mā牽涉著tsia-ê資訊是m̄是thang信任–tsit–ê。台灣2013年kap 2014年ê年度漢字（註一）分別是「假」kap「烏」，顯示「假消息」m̄-nā造成社會ê不安，koh造成人民對政府執政無信任、社會對立，影響著規个環境ê生活品質。
 
Koh來看英語ê例，The Collins Dictionary 2016年ê年度詞彙是「fake news（假新聞）」，Oxford English Dictionary 2017年ê年度詞彙是「post-truth（後真相）」。Tse koh進一步說明政治人物、名喙á是利益團體利用媒體講白賊，kōo「假」ê數字、妝thānn–過ê話語來欺騙民眾，thang好hōo in得著利益，落尾，mā是民眾leh受災厄。
 
Lán tī網路tiānn-tiānn看著一寡網路仙、suān-siâu客，靠勢有tsiânn濟fans，寫一寡oo-lóo-bo̍k-tsè–ê，kōo真hiánn目ê標頭、無經過事實查證ê文章，全靠個人情感來批評。In引tshuā社會風氣，suah是扭曲真相、白–ê染做烏–ê，當事者有影是「é-káu–ê teh死囝」，huah kah直喉，mā無法度對抗網路ê暴力。落尾，就算放風聲ê人hông拍銃 、hông證明是家己烏白鬥–ê，mā免負啥mih責任，mā bē感覺歹勢，隔工koh繼續leh騙。Tse代表lán ê民主防衛機制iáu-koh無夠分，對社會長期發展不利。
 
Lán長期受黨國體制教育ê苦毒，已經真欠缺邏輯思考，欠缺tshiau揣事實ê法度kah勇氣，真歹無帶情緒來看待社會種種ê議題；有ê人規氣kā tsia-ê議題當做是一齣連續劇niâ。人民tsua̋nn慣勢看無論證ê敘事表面，全靠主流tshuā頭；啊若講真話，顛倒ē hōo大多數ê人phì-siùnn。
 
未來公民意識ê發展，tio̍h-ài看lán是m̄是ē-tàng有獨立思考、tshiau揣真相ê法度，上重要–ê是ài有第三方公信單位ê審查、監督，減少「假新聞」、「假政見」tsit款無負責任ê代誌來發生。Lán mā ǹg望政府leh追求轉型正義ê時，tshiau揣過去歷史真相ê跤步ài khah緊–leh。

讀予你聽：

（作者是台文筆會會員；本文由台文筆會提供。）
 
註一：正式名稱是「台灣年度代表字」，是聯合報uì 2008年起主辦ê漢字徵選活動。
 
註二：本文使用教育部推薦漢字kap台羅，一寡字詞ê語音kap語意thang上教育部台灣閩南語常用詞辭典查詢。

延伸閱讀：
・不只美國，擴散中的「假新聞」正悄悄滲透亞洲國家（關鍵評論）
・「後真相」時代，誰來定義假新聞？（紐約時報中文網） 
 
若欲投稿，請寄：[email protected]，文章字數 600-800；文章若採用，有淡薄仔稿費。
請上【台語世界】閱讀閣較濟相關文章。

專欄屬作者個人意見，文責歸屬作者，本報提供意見交流平台，不代表本報立場