【台語世界／錄音】台語文ê活路——羅馬字

是按怎欲揀這篇：
到現此時逐家leh學台語，iáu是有人無啥接受kā羅馬字當做正式書寫系統，有hit款「漢字tsiah是字」ê觀念。對初學者來講，羅馬字除了是tiau發音真有應效ê撇步，本文作者mā提出實例，顯示羅馬字對保留地方腔口ê價值，hōo逐家參考看māi。
 
台語羅馬字是非常趣味koh科學化、國際化ê文字，我講伊「科學化」是因為簡單、好學koh有根據，「國際化」是因為外國人真緊就學ē-hiáu，而且kan-na用十七个字母就解決所有台語文字化ê問題。假使你若beh全部用漢字來寫台文，保證你學到頭毛喙鬚白iáu-koh無法度全部用漢字來寫台文；就算你全部用漢字來寫台文，一定有人質疑你所寫ê漢字佗一字m̄-tio̍h。古早人講：「四書五經讀透透，m̄ bat guân、ngôo、ku、pih、tsàu」，請問guân、ngôo、ku、pih、tsàu若用漢字beh按怎寫？（註一）所以我建議逐家：ài認真學正港ê台灣字──羅馬字。
 
有人講台語「有音無字」，所以用台語寫文章真麻煩。研究漢學ê人聽了真bē爽快就講：所有ê台語音用漢字lóng有法度thang寫，in用幾十年ê時間來研究台語漢字beh按怎寫，結果到人生ê終點iáu-koh研究bē完。若是用羅馬字寫（讀）台文，就無tsit个問題。Lán ài排除「漢字tsiah是字、羅馬字是音標」tsit款錯誤ê觀念，若是漢字tsiah是字，án-ne全世界有幾个語言有文字？
 
全世界任何一个語言一開始lóng是「有音無字」，後–來為著beh記載文獻、歷史、地理等等，tsiah ē發明文字。Tuì上帝創造人類開始就有語言（語言就是聲音），m̄-koh hit時並無文字（語言學家ê研究報告講，人類存在tī地球大約185萬年，文字ê存在tsiah 5,000到6,000年）。人出世開始學講話，自然得著使用母語ê能力，m̄免文字幫tsān；「有音無字」tī全世界任何語言lóng是án-ne，北京話mā無例外。若堅持用漢字寫台文就會拄著麻煩，下面tsit段文字用斜體羅馬字標示ê所在是永靖腔，請認真唸看māi。若全部用漢字寫台文，就無辦法寫（讀）出作者ê原汁。
 
我tuì Ián-tsiān（永靖）來，tsia tia̍t-tiān（特定）ê農產品是giân-gián（龍眼）。Tsia有一kian（一間）pian果siat（冰果室），頭家ê名叫做Ián-siàn（永勝），伊有賣tshian-pian（清冰）kap giân-gián（龍眼）。Pian果siat（冰果室）kian-iân（經營）ê tsiân-hiân（情形）hōo人tsiok khián-tiān（肯定），tsia暗時仔街路lián-lián-tshian-tshian（冷冷清清），假日真鬧熱。
 
若用羅馬字kā各地腔口寫–出-來，tsiah ē-tàng呈現作者ê原味。
 
有一工，我專工去永靖（Ián-tsiān），beh揣永靖人講話、聽in講台語。我kap幾个當地人phò-tāu，雖bóng講kah真投機，m̄-koh真可惜，濟濟永靖人已經失去in ê原味，永靖腔khah輸我tsit个外地人。我問一个二十幾歲ê查某囡仔，『行政院』台語按怎講，伊講「hîng-tsìng院」、無講「hiân-tsiàn院」。Tsit个例hōo我感覺，台灣各地ê腔口若beh保留，lán需要提倡羅馬字，羅馬字是lán台語文ê活路。

讀予你聽：

（作者是台灣羅馬字協會路竹分會長；本文由台灣羅馬字協會提供。）

註一：Tsit五字寫做「黿、鼇、龜、鼊、竈」，是五種龜ê名，tsia用來強調漢字ê歹寫kap歹讀。
 
註二：本文使用教育部推薦漢字kap台羅，一寡字詞ê語音kap語意thang上教育部台灣閩南語常用詞辭典查詢；『 』內底用華語發音。

延伸閱讀：
・【台語世界／錄音】台語文若是攏用漢字……
・【台語世界／錄音】白話字ê利益

若欲投稿，請寄：[email protected]，文章字數 600-800；文章若採用，有淡薄仔稿費。
請上【台語世界】閱讀閣較濟相關文章。

專欄屬作者個人意見，文責歸屬作者，本報提供意見交流平台，不代表本報立場