〈專文〉賴清德務實推動台獨的機會

文/劉重義

823投票結果，支共守住怹在立法院佔領的山頭，而且，早著囂俳向台灣人嗆聲，要大量引進支共勢力，創造有利併吞台灣的情勢。怹控制下的法制局明講，怹無需要遵守支那民國憲法法庭的裁決。這寡親支共立委還呣敢大聲講的大概是，怹要遵守的是支那人民共和國憲法。

對有追求台灣獨立意識的賴清德來講，續落2冬的任期，是要考驗伊到底是呣是會當真正做台灣人的領導者。

在台灣社會相當予人尊重的作家和政治時事評論家金恆煒先生，8月17在「報呱全世界」接受訪問指出：親支共立委故意予憲法法庭無法度運作，其實是予賴清德有足大的運作空間，伊會當宣佈所有親支共立委亂台灣的法案攏違憲，攏交予無法度運作的憲法法庭無限期放在桌仔頂，予彼寡法案攏免執行。金恆煒嘛建議賴清德善用行政命令，甚至是有違憲疑問的行政命令，通壓制、清除親支共勢力，予台灣社會閣較安全。事實上，目前美國總統川普處理美國社會的作為，會當予賴清德足好的啟示。

對國際社會看台灣的觀點，因為賴清德是由台灣人以民主形式選出，賴清德現在其實有兩個角色：一個是外來赤藍人的假支那民國總統，在這個位置，伊是外來體制的買辦，受赤藍人的支那民國憲法約束；另外一個是台灣人的領導者，伊會當無受非法的外來赤藍人的支那民國憲法約束，成立「台灣民族議會」和外來非法體制的立法院形成雙重權力(dual power)，務實推動台灣民族獨立。

愛沙尼亞人的民族領導者，在帶領人民爭取恢復國家獨立前，著先否定體制上的蘇聯憲法的合法性，然後推動公投獨立。現在，親支共立委已經公開宣示，無要遵守支那民國憲法，賴清德應該借力使力，掌握機會仿愛沙尼亞模式，召開「台灣國民會議」向台灣人宣告，否定外來的支那民國憲法的合法性，並倡議成立「台灣民族議會」執行「正名制憲」。

賴清德應該瞭解，今仔日的台灣社會，足濟台灣人對支持民進黨冷淡，絕對呣是因為親支共或是驚支共，絕對呣是痛恨民進黨還和支那黨、民眾黨祙比得的貪汙腐敗，是因為民進黨背離台灣民族願景，予台灣人失望！

賴清德個人本來在台灣人中間有足高的聲望，無論支共和支共走狗安怎惡毒的醜化攻擊，無可能動搖台灣人對伊的信任，是賴清德家己將應該廢除的「支那民國」名號和咱台灣綁做伙，予台灣人失去對賴清德的期待！

台灣人期待建立真正台灣人新閣獨立的國家，遮才是真正會當鼓舞咱的民族熱情和鬥志的民族目標。現在是台灣人上失望的時陣，嘛是台灣人上抱希望有勇敢領導者的時陣，賴清德著掌握這個天公賜咱台灣的機會，務實推動台灣獨立！