​【台語世界／錄音】Ioh墓粿

是按怎欲揀這篇：
早前lán人清明培墓有「ioh墓稞」ê風俗，囡仔thang分著稞、分著錢，是規年thàng天上kài歡喜koh好額ê一工。Tsit-má社會富裕，糖仔餅早就無稀罕，少年輩–ê無需要去「ioh墓稞」mā真oh想像，不如來看本文作者講詳細，tsit號風俗是啥款。
 
清明培墓是lán台灣人久年ê風俗，m̄-koh guán ê風俗suah m̄是án-ne。細漢ê時，正月初5去崁頭仔培（puē）阿公阿媽ê墓，正月初9去埔心培查埔祖kap查某祖ê墓，到清明時節，guán無墓好培，規陣囡仔lóng去墓仔埔ioh墓粿（ioh-bōng-kué）。
 
國校ê時，兒童節kap清明節連做伙，連suà歇兩工，tse是guán上期待ê日子。原來崁頭仔ê墓仔埔透早就有人來培墓–ah，培墓ê順序是代先kā墓草khau掉，整理墓龜、piànn掃墓埕。Suà–落-來就是排牲醴、拜祖先，hōo祖先食一頓tshenn-tshau。
 
等一睏久，祖先大概食飽–ah，主人家就放炮收牲醴，準備beh打道回府（tánn-tō-huê-hú）–ah。Tsit个時tsūn，就有一陣囡仔tī墓邊排隊，等待主人家來分錢（pun tsînn），guán講tse是ioh墓粿。
 
Hit時，大門墓–ê ē分兩角銀，細門墓分一角銀，一晡落–來，ē-tàng分著khoo外銀，是guán一年中間上kài好額ê時tsūn。後–來升初中，清明猶原歇睏（heh-khùn），我猶原來到墓仔埔看光景，e̋？按怎無囡仔來ioh墓粿neh？原來我小學五六年參加升學補習，三年無來墓仔埔，三年之間，tsit个風俗就無–去–ah。
 
無就無（bô tiō bô），我mā無leh要意（iàu-ì），m̄-koh我一直想bē曉，guán無臆謎猜（ioh-bī-tshai），mā無分著粿，按怎ē叫做「臆墓粿」neh？等到我做台語推廣ê活動，khah bat文字，khah bat民俗文化，tsiah知影tse是「挹（ioh）」墓粿，m̄是臆謎猜、分墓粿。
 
原來從古到tann（tsîng-kóo-kàu-tann），墓仔埔lóng是iap-thiap，暗sàm，草木真ōm，無人踏跤到（ta̍h-kha-kàu）ê所在。M̄-koh因為草木ōm，suah變成看牛囡仔牽牛食草ê牛埔（gû-poo）。牛規年thàng天（kui-nî-thàng-thinn）tī墓仔埔thún踏，ke減ē sńg-tn̄g著墓仔，等到明年koh來，墓仔就虛lè-lè–ah，修整墓埕mā變做大工程–ah。
 
就是án-ne，主人家就tī tsit个時tsūn，用禮物來巴結在場ê看牛囡仔，拜託in m̄-thang kā墓仔踏歹–去。Tsit个禮物，上kài利便–ê就是培墓ê紅龜粿、麵龜、草仔粿等。M̄-koh，提粿進前，ài先kā墓仔行一个禮，就是挹禮（ip-lé）、挹墓（ip-bōng）。
 
挹禮就是雙手合掌tī胸前，頭殼小可ànn腰tàm頭，是比鞠躬（kiok-kiong）khah細ê禮儀。挹ê白話音是ioh，文言音是ip，海口腔（註一）讀文言音，內埔腔（註一）讀白話音，所以有「ioh-bōng-kué」kap「ip-bōo-ké」兩个腔口。
 
我án-ne牽山絆林（khan-suann-phuānn-nâ），牽出ioh墓粿ê元神（guân-sîn），啊墓粿走佗去neh？Tse是因為看牛囡仔十外个，墓粿無夠分，就用銀角仔打（tánn）–in 。以上，就是我閒人e phànn粟（phànn-tshik），e tuì ioh墓粿ê推測（tshui-tshik）。

☆詞彙學習☆
【無就無】『沒有就算了』
【要意】『在乎』
【想bē曉】『想不通』
【臆謎猜】『猜謎』
【ōm】『茂盛，茂密』
【踏跤到】『到來』
【ànn腰tàm頭】『向前彎腰點頭』
【牽山絆林】『東拉西扯』
【元神】『原來面貌』
【打–in】『以此物作價支付他們』
【phànn粟】『不飽滿的稻穀』
【閒人e phànn粟】『閒人閒嗑牙』

讀予你聽：

（作者是李江却台語文教基金會董事長，有kap陳憲國合編《台灣諺語典》、《華語台語對照典》；本文由李江却台語文教基金會提供。）
 
註一：海口腔就是傳統所講ê「偏泉腔」，內埔腔就是傳統所講ê「偏漳腔」。​
註二：本文使用教育部推薦漢字kap台羅，一寡字詞ê語音kap語意thang上教育部台灣閩南語常用詞辭典查詢；『 』內底用華語發音。​
 
延伸閱讀：
飲水思源清明節（台灣民俗文化研究室）
【台語世界／錄音】Tio̍h用二二八培墓節取代清明 
 
若欲投稿，請寄：[email protected]，文章字數 600-800；文章若採用，有淡薄仔稿費。
請上【台語世界】閱讀閣較濟相關文章。

專欄屬作者個人意見，文責歸屬作者，本報提供意見交流平台，不代表本報立場