【台語世界／錄音】​台中人口超越高雄 成做台灣第二大城市

是按怎欲揀這篇：
台灣ê人口分佈沓沓仔leh變化，台中都會區漸漸leh發展，成做第二大城市，m̄-koh台北都會區（包括台北市kap新北市）猶是台灣人口上濟ê城區。Tsit篇除了kā城市人口變化講kah活跳跳，mā提供各縣市ê台語名thang參考。

「台中市teh-beh成做台灣第二大城市」ê讖語（tshàm-gí），講幾若個月，終其尾tī今年下半冬起鼓ê 8月初1實現–ah。到kah 7月底，台中市人口277萬8,182人，高雄市277萬7,873人，台中市ke 300 thóng人，成做台灣第二大城市，而且因為最近幾冬台中人口增幅（tsing-hok）攏比高雄較緊，tī thang按算ê未來，台中亞軍（a-kun）地位無疑悟。

台灣各縣市以新北市人口上濟，tī今年6月底ê統計，有398萬2,434人，koh差1萬7千thóng人就欲到400萬人ê坎站，超過第二名高雄市有120萬人tsiah-nī濟，thang按算ê未來除了行政區域（khu-hi̍k）重新劃分（ue̍h-hun）等重大事項，無，新北市會長期領先（líng-sian）各縣市，人口上濟攑頭旗。

但是tī人口第二名ê競爭（kīng-tsing），高雄6月底以277萬8,023人，超過台中ê 277萬6,579人iáu-koh有1,400 thóng人，占亞軍m̄-koh不止仔倚近；而且最近幾冬ê趨勢（tshu-sè），台中人口成長率（sîng-tióng-lu̍t）比高雄較緊，所以台中市方面一直樂觀讖講「teh-beh成做台灣第二大城市」。

誠實（tsiânn-si̍t）有影，經過7–月ê人口變化，台中增加，高雄顛倒減少，一下án-ne，台中超過高雄300 thóng人，正式liòng起來成做台灣第二大城市，高雄第三，台北以269萬人綴後，koh來是桃園261萬占第五，台南188萬排第六。非六都ê部份，彰化128萬攑頭旗，憑頭排–落-來是屏東83萬、雲林、苗栗（Biâu-li̍k）、新竹縣、嘉義縣、南投、宜蘭、新竹市、基隆（Ke-lâng）、花蓮、嘉義市、台東、金門、澎湖（Phînn-ôo）、連江。

若準看人口密度（bi̍t-tōo），以縣市區分，台北以每平方公里（pîng-hong-kong-lí）欲倚萬人攑頭旗，嘉義市4,400 thóng人占第二，新竹市4,200 thóng人徛第三，基隆第四、新北市第五。若照區或者鄉鎮來分，人口密度懸–ê，攏是院轄市（īnn-hat-tshī）ê區，新北市永和區每平方公里3萬9千人攑頭旗，台北市大安區2萬7千人占第二，紲–來憑頭是新北市蘆洲、高雄市新興、新北市板橋（Pang-kiô）、三重埔（三重）、台北市大同、松山、艋舺（Báng-kah，萬華）、台中市北區。

讀予你聽

註：本文使用教育部推薦漢字kap台羅。

華語原文：
台中市人口超越高雄市309人 正式成為台灣第二大城市

延伸閱讀：
教育部台灣閩南語常用詞辭典所收錄ê縣市名
若欲投稿，請寄：[email protected]，文章字數 600-800。
請至【台語世界】閱讀更多相關文章。