【台語世界／錄音】你所無了解ê本土語言人權

是按怎欲揀這篇：
各種本土語言，是台灣濟濟人ê母語，in ê語言人權需要受著重視，tse mā是轉型正義bē-tàng欠缺ê一塊。若準tsit-tsūn你hông限制ài講全原住民族語、客語、台語ē感覺真困難、足礙虐，tio̍h thang了解早前lán ê序大hông強迫講全華語，是啥mih款ê心情。

愈來愈濟人leh討論人權kap轉型正義，總–是，tse m̄是一工兩工tō有法度kā長期殖民教育ê毒素洗清；尤其牽涉政治利益ê時，koh-khah有伊轉型ê困難。Hô-hóng，目前台灣對族群ê認同mā lóng限定tī運動比賽ê時，逐家tsiah會想起tsē-tsē運動員是原住民，nā原住民欲爭取土地正義、語言平等ê時，tō lóng tènn做無khuàinn。拆白（thiah-pe̍h）講，咱lóng是選擇性ê正義。

「語言人權」是人權其中一項，mā是tiānn-tiānn hōo人pàng-sak–ê。語言人權tī《世界人權宣言》內底包括：教育權、使用權、傳播權kap號名權。Tse少人討論，tī中華民國ê體制內底，目前無一件做kah到，經過三pái ê政權交替，目前咱iû-guân看無正規本土語言教育ê規劃，tian-tò是有人leh tsènn中國「文言文」ê部份bē-tàng減少，hit種kan-tann死背應付考試ê思維，iû-guân koh欲tînn-tuè咱ê後一代。

Siánn-mih款ê教育tō會培養siánn-mih款ê國民，咱kám有以「台灣」做主體ê教育體制？Tsē-tsē問題lóng愛uá靠《國家語言發展法》確定了tsiah有法度做？咱知知he可能koh是一个假議題，因為以現此時總統kap國會政黨比例來看，無應該進展hiah慢tsiah tio̍h。唯一ē-sái解說–ê，tō是民進黨政府無心–lah，無，tō是台灣早tō sì-kè充滿中國白蟻leh tshńg-tsia̍h咱ê té-tì。

咱來看阻礙khah少ê號名權，mā是少人致意–ê。阿扁在位ê時，有五个原住民族正名，koh kā介壽路正名做『凱達格蘭大道』…等等。前幾日行政院通過修正草案增加「平埔原住民」，tse敢是正名？ Tse好thang hōo咱思考tse內底ê精差。

傳播權–leh？咱今年拚勢欲爭取「台語電視台」，為欲得著國會多數委員認同，不管政黨lóng ǹg-bāng in會使tâng-tsê來救台語，實現語言ê平等。總–是，tsē-tsē人koh再陷落「台語ia̍h是閩南語」tsit款議題，tse tō牽涉tú-tsiah講ê號名權問題。直直se̍h-lin-long，無法度hua̍h出去一步，因為咱欠缺「語言人權」ê概念。

Tī欠缺學校教育之下，竟然hām媒體ê傳播權利lóng無，kā所有本土語言ê教育lóng sak hōo家庭教育？Tī大眾媒體內底，本土語言ê使用hām華語、英語、日語、韓語，甚至是廣東話比–起-來，根本是天差地，koh tiānn-tiānn hông當做「次等語言」來對待，bē-su講台語tō是粗俗。近來，客家電視台kap原住民電視台內底使用本土語言ê狀況，mā thang等待咱讀者去比較。

無論教育權、使用權、傳播權kap號名權，lóng是咱成做一个國家ê源頭；內底，教育權kap傳播權主要是hōo咱tsē-tsē人脫離青盲牛、臭耳鴨ê身份，恢復對土地ê連結。拆白講，無教育權、傳播權，本土語言使用人口無可能增加，tsia-ê語言註定死亡；Nā án-ne，以「台灣」名義tsiânn-tsò ê國家想像，有影是空喙哺舌，huah thiòng–ê。

無教育權ê推sak，年歲tī國中以下ê少年人，會愈來愈bē曉講ka-tī ê「母語」；欠缺少年人講，本土語言m̄-nā加倍流失，koh是死亡ê歹吉兆。現tsūn咱nā無ùi傳播權tsit方面有進展，咱mā免ǹg-bāng政府會kā教育權還–咱。終其尾，咱ê本土語言、咱ê語言人權kan-na是政治láu-á選舉時ê喙瀾。

讀予你聽：

（作者是台文筆會會員；本文由台文筆會提供。）

註：本文使用教育部推薦漢字kap台羅，一寡字詞ê語音kap語意thang上教育部台灣閩南語常用詞辭典查詢。

延伸閱讀：
【台語世界／錄音】Tio̍h緊通過《國家語言發展法》
〈世界語言權宣言〉摘錄（華文版kap台文版對照；成功大學台灣語文測驗中心整理）

若欲投稿，請寄：[email protected]，文章字數 600-800；文章若採用，有淡薄仔稿費。
請上【台語世界】閱讀閣較濟相關文章。

專欄屬作者個人意見，文責歸屬作者，本報提供意見交流平台，不代表本報立場。