【台語世界／錄音】一國兩制是騙局

最近中國koh提一國兩制，國民黨mā出力配合鼓吹。M̄-koh這是無合邏輯ê 思維，欺騙ê企圖明顯，台灣人應該有基本ê智慧判斷。
中國是獨裁國家，台灣卻是民主國家。本來tō已經「兩制」–ah！Kám有需要變「一國」才來講「兩制」？Kám講kap獨裁國家鬥陣有較好？若講獨裁ē-tàng帶來幸福，án-ne「一國一制」tō好，何必一國兩制？若獨裁無較好，「一pêng一國」kám無較自在？何必kap in ko-ko-tîⁿ？所以總講–一句，你若認同獨裁，何必「兩制」。你若kah-ì民主，何必kap獨裁結做「一國」？這款道理是chiok清楚。「一國」kap「兩制」是無法度鬥做伙。論真講，he是中國beh收回香港ê騙術。台灣kám無較好ê選擇？一定ài kap中國纏做伙？
Tī 1997年，中國為beh騙英國同意將香港還中國，提出一國兩制，承諾香港收回了後，50年不變。意思是這50冬內，香港人ē-tàng維持in民主自由ê生活。這明顯koh是騙局一場，尤其是有chē-chē欺騙前科ê中國。有影！香港已經騙過手，m̄免koh等50冬。所謂回歸未到5冬，北京tō開始插手香港ê選舉kap司法。除了少數死bē pìⁿ ê迷戀中國ê人，無人koh相信一國兩制ē-tàng繼續維持。
魚lia̍h–tio̍h-ah，免講魚餌tō收–起來。Chia中國無遵守約束ê劇情，台灣人lóng看現現。怪奇–ê是當初hō͘騙siōng thiám，逃到台灣ê國民黨。Hit當時koh是警告台灣人m̄-thang相信共產黨。Chit-má soah食西瓜反症，kap中華民國ê罪人—共產黨鬥陣鼓吹一國兩制。台灣人kám是hông騙大漢–ê。人講反攻大陸，咱tō『拋頭顱，灑熱血』替人賣命。人講一國兩制，咱kám tō戇kah kā身家性命交hō͘獨裁者。
中國若真正beh推銷一國兩制，至少tī香港實行成功才有吸引力！這款簡單ê道理，中共kám想無。Chit-má香港為逃犯條例亂chhāu-chhāu ê時，台灣人lóng看現現。證明一國兩制連beh做假to無法度。Án-ne iáu beh騙台灣人。台灣人kám有hiah戇。

台灣字(白話字)版
It-kok Lióng-chè Sī Phiàn-kio̍k
Bûn, Lo̍k-im/ Chiúⁿ Ji̍t-êng
Chòe-kīn Tiong-kok koh thê “It-kok Lióng-chè”. Kok-bîn-tóng mā choân-le̍k phòe-ha̍p kó͘-chhui. M̄-koh che sī bô ha̍h lô-chip ê su-î. Khi-phiàn ì-tô͘ bêng-hián. Tâi-oân-lâng èng-kai ū ki-pún ê tì-hūi phòaⁿ-toàn.
Tiong-kok sī to̍k-chhâi kok-ka. Tâi-oân khiok-sī bîn-chú kok-ka. Pún-lâi tō í-keng “lióng-chè”–ah! Kám ū su-iàu piàn “chi̍t kok” chiah lâi kóng “lióng-chè”. Kám-kóng kap to̍k-chhâi kok-ka tàu-tīn ū khah hó? Nā kóng to̍k-chhâi ē-tàng tòa-lâi hēng-hok, án-ne “it-kok it-chè” tō hó, hô-pit It-kok Lióng-chè? Nā to̍k-chhâi bô khah hó, “chi̍t pêng chi̍t kok” kám bô khah chū-chāi? Hô-pit kap in ko-ko-tîⁿ? Só͘-í chóng-kóng–chi̍t kù, lí nā jīn-tông to̍k-chhâi, hô-pit “lióng-chè”? Lí nā kah-ì bîn-chú, hô-pit kap to̍k-chhâi kiat-chò “chi̍t kok”? Chit khoán tō-lí sī chiok chheng-chhó. “It-kok” kap “lióng-chè” sī bô hoat-tō͘ tàu chò-hóe. Lūn-chin kóng, he sī Tiong-kok beh siu-hôe Hiong-káng ê phiàn-su̍t. Tâi-oân kám bô khah hó ê soán-te̍k? It-tēng ài kap Tiong-kok tîⁿ chò-hóe? 
Tī 1997 nî, Tiong-kok ūi beh phiàn Eng-kok tông-ì chiong Hiong-káng hêng Tiong-kok, thê-chhut It-kok Lióng-chè, sêng-lio̍k Hiong-káng siu-hôe liáu-āu, 50 tang put-piàn. Ì-sù sī chit 50 tang lāi, Hiong-káng-lâng ē-tang î-chhî in bîn-chú chū-iû ê seng-oa̍h. Che bêng-hián koh sī phiàn-kio̍k chi̍t tiûⁿ, iû-kî sī ū chē-chē khi-phiàn chiân-kho ê Tiong-kok. Ū-iáⁿ! Hiong-káng í-keng phiàn kòe-chhiú, m̄-bián koh tán 50 tang. Só͘-ūi “hôe-kui” bōe kàu 5 tang, Pak-kiaⁿ tō khai-sí chhap-chhiú Hiong-káng ê soán-kí kap su-hoat. Tû-liáu chió-sò͘ sí bē pìⁿ ê bê-loân Tiong-kok ê lâng, bô lâng koh siong-sìn It-kok lióng-chè ē-tàng kè-sio̍k î-chhî.
Hî lia̍h–tio̍h-ah, bián-kóng hî-jī tō siu–khí-lâi. Chia Tiong-kok bô chun-siú iok-sok ê ke̍k-chêng, Tâi-oân-lâng lóng khòaⁿ hiān-hiān. Koài-kî–ê sī tong-chho͘ hō͘ phiàn siōng thiám, tô-kàu Tâi-oân ê Kok-bîn-tóng. Hit tong-sî koh sī kéng-kò Tâi-oân-lâng m̄-thang siong-sìn Kiōng-sán-tóng. Chit-má soah chia̍h si-koe hoán-chèng, kap Tiong-hôa Bîn-kok ê chòe-jîn—Kiōng-sán-tóng tàu-tīn kó͘-chhui It-kok Lióng-chè. Tâi-oân-lâng kám sī hông phiàn tōa-hàn–ê. Lâng kóng hoán-kong tāi-lio̍k, lán tō 『phau thô͘-lû sā zó siūe』, thè lâng bē miā. Lâng kóng It-kok lióng-chè, lán kám tō gōng kah kā sin-ka sèⁿ-miā kau hō͘ to̍k-chhâi-chiá.
Tiong-kok nā chin-chiàⁿ beh thui-siau It-kok lióng-chè, chì-chió tī Hiong-káng si̍t-hêng sêng-kong chiah ū khip-ín-la̍t! Chit khoán kán-tan ê tō-lí, Tiong-kiōng kám siūⁿ bô? Chit-má Hiong-káng ūi Tô-hoān Tiâu-lē loān-chhāu-chhāu ê sî, Tâi-oân-lâng lóng khòaⁿ-hiān-hiān. Chèng-bêng It-kok Lióng-chè liân beh chò-ké to bô hoat-tō. Án-ne iáu beh phiàn Tâi-oân-lâng. Tâi-oân-lâng kám ū hiah gōng?
讀hōo你聽：

文章屬作者個人意見，文責歸屬作者，本報提供意見交流平台，不代表本報立場。