【台語世界／錄音】食暗頓ê時陣

文、錄音／A-ka

Ta̍k日，我上期待- -ê著是食暗頓ê時陣。因為透早一起床，規家口仔m̄是趕上班，著是趕beh去上課。驚路- -裡that車，時間會bē赴，阮lóng早早著出門，chhìn-chhái食一寡物件做早頓。我ê中晝頓是tī學校食營養午餐，有時輪著我做值日生，khang-khòe一下濟，著無法度穩心仔食晝。Kan-ta「暗頓」，我chiah會當好好仔享受，是一工內底上kài輕鬆歡喜ê時陣。

為著beh hō͘囡仔食飽koh食巧，食hō͘營養koh健康，阿母lóng盡量家己煮，koh看冊學煮食，手藝chiâⁿ好，親像魔術師teh變魔術仝款，ta̍k頓ê菜色變來變去，阮lóng食bē siān。Ta̍k工ê暗頭仔，阿母一下班轉來到厝，lóng無歇睏，著隨去灶腳chhoân暗頓：洗米koh煮飯、炒菜兼khòng湯。看阿母無閒kah大細粒汗chha̍p-chha̍p滴，實在足辛苦- -ê。阮阿母ê腳手真liú-lia̍h，一tak久仔，tō聽著阿母hoah講：「煮好ah！緊來食o͘h！」Ta̍k遍聽著阿母ê叫聲，我著會隨chông去灶腳，tàu chhoân碗箸、tàu添飯。

Iáu bē kiâⁿ到灶腳，我著先鼻著芳kòng-kòng ê氣味。規桌頂ê菜有影chheⁿ-chhau koh phong-phài，山珍海味ta̍k項有：滷肉、排骨酥、五柳枝、蝦仁蔥仔卵、hah-muh炒高麗菜、tīm香菇雞湯。Lóng是我愛食- -ê，害我看kah嘴nōa直直流。等大家坐好勢，我已經iau kah大腸告小腸ah。阿爸hoah一聲「食飯！」ta̍k-ê緊kā箸gia̍h- -起來，隨人kā愛食ê菜nge̍h入去碗內，食kah su̍t-su̍t叫。我上愛食飯攪滷肉汁，koh nge̍h一大塊肥軟仔肥軟ê三層肉，掛khiū-teh-teh ê肉皮pō͘ tī嘴內，鹹chiáⁿ tú-tú仔好，滋味有夠讚- -ê，叫我食三碗公mā無問題！

食暗頓ê時陣，我tiāⁿ-tiāⁿ講tī學校發生ê笑khoe代，小妹仔lóng聽kah gāng- -去，bē記得pe飯，著ài阿母kā提醒，小妹仔chiah繼續phâng碗lāng箸，實在chiâⁿ古錐！阿爸著親像電台ê廣播員仝款，開始放送今仔日ê新聞，講了有sòa，著直直講，講無停。Chit時，阿母tō會插嘴講：「你o͘h！Mài koh thí- -落去ah！食飯配話，ná囡仔leh！」大家笑kah嘴仔裂sai-sai，笑lóng bē煞。阿母mā會分享伊工作上心適ê代誌，m̄-kú伊koh-khah要意- -ê是：阮敢有揀食？敢有食飽？飯若食無了，阿母著會講：「飯粒仔若pe無清氣，大漢以後是會嫁貓翁、娶貓某o͘h！」著按呢，大家輕輕鬆鬆坐相倚，歡歡喜喜講天講地，享受著阿母用疼惜阮ê心所煮ê好料裡。

Chit-má我khah大漢ah，便若有閒，著會去灶腳tàu-saⁿ-kāng，做阿母ê助理。阿母beh洗米進前，會叫我tàu揀米，我ê目睭真lāi，lóng揀kah足清氣。Uì切菜到煮菜，lóng ài細膩，若無，tō會去切著手指頭仔，á-sī去hō͘油噴- -著。看著每一項菜lóng是阿母用心計較、用tīⁿ-tīⁿ ê愛煮出來- -ê，我深深感受著阿母ê偉大。等阿母kā菜煮好，我著一盤一盤phâng去桌頂。有時仔，我會忍bē-tiâu偷偷仔ni一塊來食，koh會kā阿爸展講：「今仔日ê暗頓我有tàu煮o͘h！」阿爸著會phah-pho̍k仔，呵咾我真厲害，hō͘我足有成就感- -ê！

若是tú著特別ê節日á-sī厝內有人過生日，阮mā會利用食暗頓ê時陣同齊來慶祝。所以，chit ê時間足寶貴- -ê，是阮兜做伙團圓ê時陣，ta̍k-ê互相鼓勵、互相關心，規家伙仔ê感情真bā，有濟濟甜蜜ê記持tī內底。日- -時所tú-tio̍h ê壓力kap無爽快著按呢lóng放bē記ah，只想beh好好仔享受家庭chiah有ê自在kap溫暖。我chiâⁿ珍惜ta̍k-pái會當tàu-tīn食暗頓ê時陣，因為che是點燈仔火mā無底chhōe ê快樂，有錢mā無tè買ê幸福。

台灣字（白話字）版
Chia̍h Àm-tǹg ê Sî-chūn

Ta̍k-ji̍t, góa siōng kî-thāi- -ê tio̍h sī chia̍h àm-tǹg ê sî-chūn. In-ūi thàu-chá chi̍t khí-chhn̂g, kui-ke-kháu-á m̄ sī kóaⁿ siōng-pan, tio̍h sī kóaⁿ beh khì siōng-khò. Kiaⁿ lō͘- -nih that-chhia, sî-kan ē bē-hù, gún lóng chá-chá tio̍h chhut-mn̂g, chhìn-chhái chia̍h chi̍t-kóa mi̍h-kiāⁿ chò chá-tǹg. Góa ê tiong-tàu-tǹg sī tī ha̍k-hāu chia̍h êng-ióng ngó͘-chhan. Ū-sî lûn-tio̍h góa chò ti̍t-ji̍t-seng, khang-khòe chi̍t-ē chē, tio̍h bô-hoat-tō͘ ún-sim-á chia̍h-tàu. Kan-ta “àm-tǹg”, góa chiah ē-tàng hó-hó-á hiáng-siū, sī chi̍t kang lāi-té siōng-kài khin-sang hoaⁿ-hí ê sî-chūn.

Ūi-tio̍h beh hō͘ gín-á chia̍h-pá koh chia̍h-khá, chia̍h hō͘ êng-ióng koh kiān-khong, a-bú lóng chīn-liōng ka-kī chú. Koh khòaⁿ chheh o̍h chú-chia̍h, chhiú-gē chiâⁿ hó, chhin-chhiūⁿ mô͘-su̍t-su teh piàn mô͘-su̍t kāng-khoán, ta̍k-tǹg ê chhài-sek piàn lâi piàn khì, gún lóng chia̍h bē siān. Ta̍k-kang ê àm-thâu-á, a-bú chi̍t hā-pan tńg-lâi kàu chhù, lóng bô hioh-khùn, tio̍h sûi khì chàu-kha chhoân àm-tǹg, sé-bí koh chú-pn̄g, chhá-chhài kiam khòng-thng. Khòaⁿ a-bú bô-êng kah tōa-sè lia̍p kōaⁿ chha̍p-chha̍p-tih, si̍t-chāi chiok sin-khó͘- -ê. Gún a-bú ê kha-chhiú chin liú-lia̍h, chi̍t-tak-kú-á, tō thiaⁿ-tio̍h a-bú hoah kóng, “Chú hó ah, kín lâi chia̍h o͘h!” Ta̍k-piàn thiaⁿ-tio̍h a-bú ê kiò-siaⁿ, góa tio̍h ē sûi chông khì chàu-kha, tàu chhoân óaⁿ-tī, tàu thiⁿ-pn̄g.

Iáu bē kiâⁿ kàu chàu-kha, góa tio̍h seng phīⁿ-tio̍h phang-kòng-kòng ê khì-bī. Kui toh-téng ê chhài ū-iáⁿ chheⁿ-chhau koh phong-phài, san-tin-hái-bī ta̍k-hāng ū: ló͘-bah, pâi-kut-so͘, ngó͘-liú-ki, hê-jîn chhang-á-nn̄g, hah-muh chhá ko-lê-chhài, tīm hiuⁿ-ko͘ ke-tng. Lóng sī góa ài chia̍h- -ê, hāi góa khòaⁿ kah chhùi-nōa ti̍t-ti̍t-lâu. Tán tāi-ke chē hó-sè, góa í-keng iau kah tōa-tn̂g kò sió-tn̂g ah. A-pah hoah chi̍t siaⁿ, “Chia̍h-pn̄g!” ta̍k-ê kín kā tī gia̍h- -khí-lâi, sûi lâng kā ài chia̍h ê chhài nge̍h ji̍p-khì óaⁿ-lāi, chia̍h kah su̍t-su̍t-kiò. Góa siōng ài chia̍h-pn̄g kiáu ló͘-bah-chiap, koh nge̍h chi̍t tōa tè pûi-nńg-á pûi-nńg ê sam-chân-bah, kòa khiū-teh-teh ê bah-phôe pō͘ tī chhùi-lāi, kiâm-chiáⁿ tú-tú-á hó, chu-bī ū-kàu chán- -ê, kiò góa chia̍h saⁿ óaⁿ-kong mā bô būn-tê.

Chia̍h àm-tǹg ê sî-chūn, góa tiāⁿ-tiāⁿ kóng tī ha̍k-hāu hoat-seng ê chhiò-khoe-tāi, sió-mōe-á lóng thiaⁿ kah gāng- -khì, bē-kì-tit pe-pn̄g. Tio̍h ài a-bú kā thê-chhéⁿ, sió-mōe-á chiah kè-sio̍k phâng óaⁿ lāng tī, si̍t-chāi chiâⁿ kó͘-chui. A-pah tio̍h chhin-chhiūⁿ tiān-tâi ê kóng-pò͘-oân kāng-khoán, khai-sí hòng-sàng kin-á-ji̍t ê sin-bûn, kóng liáu ū sòa, tio̍h ti̍t-ti̍t kóng, kóng bô thêng. Chit-sî, á-bu tō ē chhap-chhùi kóng, “Lí o͘h! Mài koh thí- -lo̍h-khì ah! Chia̍h-pn̄g phòe ōe, ná gín-á leh!” Tāi-ke chhiò kah chhùi-á li̍h-sai-sai, chhiò lóng bē soah. A-bú mā ē hun-hióng i kang-chok-siōng sim-sek ê tāi-chì, m̄-kú i koh-khah iàu-ì- -ê sī: Gún kám ū kéng-chia̍h? Kám ū chia̍h-pá? Pn̄g nā chia̍h bô-liáu, a-bú tio̍h ē kóng, “Pn̄g-lia̍p-á nā pe bô chheng-khì, tōa-hàn í-āu sī ē kè niau-ang, chhōa niau-bó͘ o͘h!” Tio̍h án-ne, tāi-ke khin-khin-sang-sang chē sio-óa, hoaⁿ-hoaⁿ-hí-hí kóng-thiⁿ kóng-tē, hiáng-siū tio̍h a-bú iōng thiàⁿ-sioh gún ê sim só͘ chú ê hó liāu-lí.

Chit-má góa khah tōa-hàn ah, piān nā ū-êng, tio̍h ē khì chàu-kha tàu-saⁿ-kāng, chò a-bú ê chō͘-lí. A-bú beh sé-bí chìn-chêng, ē kiò góa tàu kéng-bí. Góa ê ba̍k-chiu chin lāi, lóng kéng kah chiok chheng-khì. Ùi chhiat-chhài kàu chú-chhài, lóng ài sè-jī, nā-bô, tō ē khì chhiat-tio̍h chhiú-chéng-thâu-á, á-sī khì hō͘ iû phùn- -tio̍h. Khòaⁿ-tio̍h múi chi̍t hāng chhài lóng sī a-bú iōng-sim kè-kàu, iōng tīⁿ-tīⁿ ê ài chú chhut-lâi- -ê, góa chhim-chhim kám-siū tio̍h a-bú ê úi-tāi. Tán a-bú kā chhài chú hó, góa tio̍h chi̍t pôaⁿ chi̍t pôaⁿ phâng khì toh-téng. Ū-sî-á, góa ē jím-bē-tiâu thau-thau-á ni chi̍t tè lâi chia̍h, koh ē kā a-pah tián kóng, “Kin-á-ji̍t ê àm-tǹg góa ū tàu chú o͘h!” A-pah tio̍h ē phah-pho̍k-á, o-ló góa chin lī-hāi, hō͘ góa chiok ū sêng-chiū-kám- -ê!”

Nā-sī tú-tio̍h te̍k-pia̍t ê cheh-ji̍t, á-sī chhù-lāi ū lâng kòe-seⁿ-ji̍t, gún mā ē lī-iōng chia̍h àm-tǹg ê sî-chūn tâng-chê lâi khèng-chiok. Só͘-í, chit ê sî-kan chiok pó-kùi- -ê, sī gún tau chò-hóe thoân-îⁿ ê sî-chūn. Ta̍k-ê hō͘-siong kó͘-lē, hō͘-siong koan-sim. Kui-ke-hóe-á ê kám-chêng chin bā, ū chē-chē tiⁿ-bi̍t ê kì-tî tī lāi-té. Ji̍t- -sî só͘ tú-tio̍h ê ap-le̍k kap bô sóng-khoài tio̍h án-ne lóng pàng-bē-kì ah, chí siūⁿ beh hó-hó-á hiáng-siū ka-têng chiah ū ê chū-chāi kap un-loán. Góa chiâⁿ tin-sioh ta̍k-pái ē-tàng tàu-tīn chia̍h àm-tǹg ê sî-chūn, in-ūi che sī tiám teng-á-hóe mā bô tè chhōe ê khoài-lo̍k, ū chîⁿ mā bô-té bé ê hēng-hok.

讀hōo你聽