積極參與國際社會，嚴正拒絕「ㄧ中」「九二」

WHA邀請台灣參加, 但是附帶說明愛遵守「九二共識」、「一中原則」！台灣人無beh接受這款講法！

台灣ê醫藥發達, 衛生水準通講是世界級。m̄管是早期消滅ma-la-li-a(malaria，虐疾)、後來斷骨熱(豋格熱)、腸病毒、SARS種種傳染病ê防治, 抑是肝炎防治、肝臟移殖、燒燙傷、、甚至上先進ê「幹細胞修補受傷神經再生技術」等等臨床問題ê處理能力、、攏是世界公認ê一流成就。

做世界村ê成員, 咱需要對世界有貢獻。m̄過，想bē到健康議題也即呢政治化，koh講根據聯合國2758號決議，強迫台灣接授「九二共識」、「一中原則」！真正氣死人！2758號決議干焦處理「中國代表權」，是beh解決「中國國民黨」kap「中國共產黨」啥人會當代表聯合國ê「中國問題」，kap台灣一點仔關係mā無。大家攏足清楚，國際條約「舊金山合約」才是真正ê戰後「正式」條約，有真正法律約束力。tī彼內面，無講著按怎處理「台灣主權」！

大家mā攏知，「九二共識」其實根本mā無存在！當時海基會辜振甫、總統李豋輝攏已經「親嘴」否定！

馬政府所講ê「九二共識」mā干焦是國共兩黨ê「共識」，kap台灣人無治代，當然袂當表台灣人！這m̄是咱空嘴pō͘舌，凊彩烏白講。所有ê民調kap最近ê選舉攏是按呢確認。

阮主張台灣應該勇敢、積極參與國際組織及活動！

若hō͘人矮化就應該利用機會大聲抗議，kā國際社會提出訴求，爭取國際社會認同！若是放棄無beh參加，永遠無聲無說，徹底被邊緣化，永遠tī國際社會消失！