桐花祭藝文表演个淺見

(本篇為客家語文書寫)
四月二十五日，滿懷个期待參與新北市客家桐花祭，到了下晝个時節「好客桐花青春飛揚」藝文表演活動現場，臺頂高个小朋友當有活力在該跳舞，𠊎行前認真聽啊聽，仰毋係客家歌曲，𠊎失望、疑狐个行向…著等新北市政府制服个工作人員，拜問啊～客家藝文活動仰般毋係客家表演个呈現？
工作人員：朝晨正有，下晝無了，你愛看个話朝晨就好來。
𠊎問：既然係客家活動，敢毋係愛安排客家表演為主正著？
工作人員：這問題係見仁見智。
一隻捉鬼塞塘涵个「見仁見智」同推辭！經由行政院客委會指導，新北市客家事務局協辦个「客家桐花祭」藝文表演活動，節目个表演內容，單淨係山崗牛牯大个名目定定！實質个活動裡肚非客家藝文表演企大部分。
個人試著：做麼个一年一度講係客家个活動，勞師動眾之餘，有一種「掛羊頭賣狗肉」个無影，客家眾多團體个表演去哪位呢？抑係尋毋著客家个表演團體？
再講，客委會長年以「振興客家語言文化為使命」，出錢出力辦个活動，舞臺頂个呈現仰無用客家語言、音樂、戲劇等做主軸；還過，若係講尋毋著客家團體表演个話，該事情就大條了，恁多年來按算了大筆个預算，發落下來个結果，嗄無法度栽培出抑係班請客家藝文團體來表演？這擺，桐花祭藝文表演个安排分𠊎心肝肚十分毋解，更加感覺著失望摎深深个失落。