【專欄】語言發展佮政治經濟的關係

文/陳月妙 （台灣教授協會副會長、中正大學外文系前系主任退休教授）

英語雖罔是當今地球頂上強勢的語言，其實英語佇中世紀14,15世紀以前，嘛是予人殖民的語言。

盎格魯薩克森（Anglo-Saxon ）部族是佇公元449年，對丹麥半島佮荷蘭北部低地跨海入侵英倫，甲原來佇英倫的Celtics克爾特人趕去北方的蘇格蘭高地、西南方的威爾斯和西邊的愛爾蘭。所以，英語的基底是西德語系，佮威爾斯語、蘇格蘭語、愛爾蘭語等克爾特語系，是無仝語族。

了後1000年，英語經過基督教597AD傳入的文化革命，8,9世紀北方維京的入侵佮1066年的諾曼征服Norman Conquest,了後予法國殖民300冬，到14世紀中，一直攏是予人殖民的鄉里街市之語，毋是殿堂官方言說佮文書的語言，當時官方語是法語。嘛因為按呢，英語雖然是德語族的一種，毋過文法比較德語，已經簡單化足濟。

到甲14世紀中，喬叟Chaucer是第一個用在地英語做書寫語的作家，伊才引領整個英國的文藝復興，閣再經莎士比亞、漢米爾頓等大文豪的書寫，佮國家級學術院牛津大辭典的接力編輯團隊，經過將近200冬的發展經營，才形成英國現代國家的認同佮建立。

政治上，閣再經過伊莉莎白一世女王佇公元1588年，拍敗西班牙無敵艦隊了後，一步一步取代西班牙佇大航海時代海上霸權的地位，最後殖民東西方足濟國家，成做「日不落國」。

語言發展和政治經濟實力關係密切。英語佇予人殖民的近1000年期間449AD~1400AD，英語嘛留落拉丁語、維京語佮法語的痕跡。

了後，殖民世界300外冬，嘛吸收融合世界各地的語言。二戰後，美國接續英國，成做世界強權，造就今仔日英語做世界上強勢語言的面貌。

咱的台語原來是清國殖民台灣咱祖先的語言。經過300外冬在地化了後，包容層層疊疊予外來殖民的痕跡。到今，咱猶咧奮鬥欲脫離外來殖民的枷鎖，咱是行佇「台語文藝復興」的路途頂。

佇政治上，咱猶未脫離外來中華殖民的枷鎖進前，語言文化政治是一體兩面，咱的台語發展就無可能正常，總是會有各種奇奇怪怪的現象展現出來。

總是，咱若會當用台語台文創作濟濟反應咱在地生活、文化各個層次精神的作品，恢復台語台文的普遍使用，按呢就會幫贊形成台灣意識佮認同，嘛會幫贊建立新而獨立國家。嘛會使講，民族語言文化的獨立，才有獨立的新國家。反倒轉來，嘛會使講，有新而獨立的國家，咱這塊土地真正的語言，才會當行入正常發展的路途。