【專文】是安怎我祙閃避講論文門？

文/劉重義

自古早到現在，真濟人類社會攏知影，「誠信」著愛是社會道德體系中的基本價值。誠信牽涉一個人的行為、言語和意圖的真實、真誠、清楚和勇氣。誠信所以受著重視，是因為持守誠信價值，予人能當在講事實之時保持一致，嘛予人對代誌的真相更加深入把握，予人能當清楚地信賴所預料的環境條件，所以，著會當促進人際互動中間的信任、正直和公平。

誠信嘛是領導者所需要擁有的特質中間上重要之一的特質。誠信對有效的領導非常重要：建立信任、做好模樣、鼓勵反應實情、並且促進責任制效率。誠信閣透明的領導者才愈有可能激勵團隊，來實現組織的目標。領導者若是無誠信，著是做歹模樣，導頭敗壞穩定社會進步的價值。

逐擺我若批判蔡英文的「論文門」和譴責伊濫權迫害追查真相的彭文正教授，著有一寡台灣人想孔想縫要阻止我誠實講正直的公道話。這種企圖阻止人誠實講公道話的見笑習性，在台灣社會演變做鼓舞「自己人作惡做歹無要緊」的無尊嚴的雙重標準習性。結果，意識對立的雙方，閣較胡說八道至少自己這邊的人和西瓜倚大邊的投機者攏會讚聲吼對，予整個社會陷入認知混亂。致到，一般台灣人常常對有爭議的代誌真歹分辨是非真假。

當掩蓋真相、歪曲事實是被普遍採取的爭執手段，咱社會著真困難接受真相，當然著無法度確立有公信力的公平正義，社會的爭執對立著祙當合理消除。當前的台灣社會著是陷入在這個爛土窟。

革命運動理論有一個結論：革命拖久祙成功的民族或族群，若無堅持民族主義或類似前瞻願景信念的意志，運動者會失去革命目標和信心，會墮落模仿壓迫者的行為和思想模式，造成運動閣較大的困難。

無尊重誠信價值 認可詐騙掠奪手段

台灣人在外來赤藍權貴所建構的假「支那民國」民族壓迫體制下，承受超過70冬落伍腐敗的赤藍化的支那化社會規範：無尊重誠信價值，認可詐騙為掠奪手段。咱台灣民族的覺醒，才予咱有出頭天的願景：推動民族獨立運動，廢除假「支那民國」，建立真正屬於台灣人自己的民主自由、公平合理閣幸福優質，能當永續發展的現代國家。

革命運動理論有另外一個結論：在運動中能當由社會菁英提升社會文明的被壓迫民族或族群，革命成功的機會增加，反者，若社會文明水準顛倒下降的，成功的機會著下降。

遮是因為被文明進步的族群殖民或壓迫統治的民族或族群，社會精英攏較有機會吸收進步文明提升自己，這寡素質突出的社會菁英才會當有效教育並帶動群眾，發揮運動能量爭取著革命運動的目標。

比如，幾乎所有被西方強權殖民統治的亞非殖民地，有真濟社會精英攏有機會到殖民母國社會受先進的教育，怹在彼種生活經驗中領悟自己民族文明的弱點，嘛瞭解壓迫族群的文明優勢，予怹會當正確領導帶動自己的民族完成獨立建國。另外，1960年代美國非裔的民權運動和20世紀後期南非廢除種族隔離，攏是在相對文明進步族群的壓迫下，怹的運動目標嘛攏爭得相當的成果。

1920年代台灣已經是文明進步社會

咱台灣社會在1920年代已經是亞洲第二文明進步的社會，咁哪輸日本本土。戰後卻不幸遭受文明比咱加逐落伍的支那掠奪集團的剝削統治，台灣社會精英為生存和追求成就，無法度避免和赤藍權貴有較密切的接觸，當然感染著落伍的赤藍習性，在台灣一般民眾的眼中，咱的社會精英的文明水準和價值操守顛倒是落伍退步，失去予民眾追隨領導的信心，台灣民族獨立運動所以困難重重。

真濟台灣人認定民進黨已經墮落做第二個支那黨，基本上著是有理論根據的不幸發展。台灣民族運動要突破咱獨立運動的障礙，必須以台灣民族主義為理念和行動主軸，來強調重新建造台灣社會的現代進步社會規範，尤其著確立「誠信價值」。

台灣社會若無穩固「誠信價值」，著無可能產生「公信力」，管理當局若無公信力，一切的改革著攏是空談，無可能產生正面的進步效果。真可能嘛被期待著扭轉台灣社會亂局的賴清德先生，祙當無瞭解「論文門」是在台灣人社會對「誠信價值」上嚴重的破壞：領導者做歹模樣硬拗硬騙，閣濫權動用政府機器掩蓋真相並迫害追查真相的彭文正教授，社會精英嘛普遍麻痺喪失誠實的勇氣。

要務實作台獨工作，一定著糾正被嚴重撕破「誠信價值」的台灣社會，賴清德一定著決心做好模樣，擁護伊的民眾一定著培養堅守誠信的勇氣，包括譴責詐騙的勇氣。所以，拜託哩，祙閣來叫我呣通講「論文門」！