【台語世界／錄音】Tú-tio̍h困難ê時陣

文、錄音 ／ A-ka（退休國小老師）

細漢ê時，阮bat去報名學泅水，m̄-kú學兩禮拜ah，猶是緊張kah kha尾手尾冷吱吱，m̄敢tī水底kā目睭褫- -開，換氣ê時koh tiāⁿ-tiāⁿ會去cha̍k- -tio̍h，真無順利。Tī我懊惱kah無想beh繼續學ê時，阿爸kā我鼓勵講：「決定一ê人ê koân度m̄是用金銀財寶，是tú-tio̍h困難ê時，你對人生ê態度。」我感覺阿爸ê話真有道理，假使一tú-tio̍h困難就想beh放棄，未免siuⁿ過軟chiáⁿ無志氣？阮只好chhùi齒根咬leh，決定koh去試看māi leh。

就按呢，hit年ê熱天，ta̍k-kang lóng浸tī游泳池，泅過來泅過去，一遍koh一遍，m̄驚辛苦一直練。Chit-má，我已經泅kah chiâⁿ好勢ah，做一睏tio̍h會當泅五百公尺，親像桌頂拈柑hiah-ni̍h簡單。想bē到tn̄g-tio̍h困難ê時，堅持拚落去，想辦法kā克服，會當得tio̍h chiah-ni̍h甘甜ê快樂。Hit當陣，阮若無膽量，chhìn-chhài用一ê借口無繼續學落去，hō͘成功ê機會走閃去，敢m̄是真可惜？

原來人生在世，遇tio̍h困難真sù常。若是m̄敢面對，一直躊躇，想beh kā當做無看見，問題仝款chhāi tī hia，bē家己解決。心肝內顛倒愈刺鑿，bē-su有千萬斤重ê大石頭teh tī肩胛頭，hō͘人接載bē-tiâu。會當解決ê時機一下過去，一定會怨嘆koh後悔，因為仝款ê情形會koh發生，永遠kā咱纏tiâu leh。

歷史上有真濟人，in堅持in ê理念，用熱情度過性命中ê難關。親像Edison為tio̍h beh發明電火球仔，tī研究ê過程中，m̄知試過偌濟材料，經過偌濟擺ê失敗，伊lóng無放棄，m̄驚別人笑伊是戇大呆。Edison成功了後，名聲迵四海，伊對人類ê貢獻真使人尊敬，因為chit ê 發明改變全世界。所以，咱若tn̄g-tio̍h阻礙免驚hiâⁿ，心頭掠hō͘定，骨力會補頇顢，萬項代誌若是熟手就會變kah真內行，無tek-khak經過這ê考驗，咱ê人生koh加學tio̍h一項。

會記得有一ê鞋仔ê廣告按呢講：「Just do it！」無m̄-tio̍h！勇敢kā踏出去就tio̍h ah，會跋才會大，有艱苦才會有快活，眼界mā會愈開闊。俗語講：「一勤天下無難事」，會堪得大風大湧才是真功夫。Chit-má ê我，信心十足，m̄驚困難來相tú，因為伊是上好ê老師。美麗高貴ê真珠就是經過一粒一粒ê幼沙仔ta̍uh-ta̍uh仔磨練出來- -ê。阮會愈來愈堅強，做一位正港ê勇士，tī tú-tio̍h困難ê時陣，認真拍拚m̄認輸，將來一定會有好成就。

台灣字（白話字）版
Tú-tio̍h Khùn-lân ê Sî-chūn

Sè-hàn ê sî, gún bat khì pò-miâ o̍h siû-chúi, m̄-kú o̍h nn̄g lé-pài ah, iáu-sī kín-tiuⁿ kah kha-bóe chhiú-bóe léng-ki-ki, m̄-káⁿ tī chúi-té kā ba̍k-chiu thí—khui. Ōaⁿ-khùi ê sî koh tiāⁿ-tiāⁿ ē khì cha̍k- -tio̍h, chin bô sūn-lī. Tī góa àu-náu kah bô siūⁿ beh kè-sio̍k o̍h ê sî, a-pah kā góa kó͘-lē kóng, “Koat-tēng chi̍t ê lâng ê koân-tō͘ m̄-sī iōng kim-gîn châi-pó, sī tú-tio̍h khùn-lân ê sî, lí tùi jîn-seng ê thāi-tō͘.” Góa kám-kak a-pah ê ōe chin ū tō-lí, ká-sú chi̍t tú-tio̍h khùn-lân tō siūⁿ beh hòng-khì, bī-bián siuⁿ-kòe nńg-chiáⁿ bô chì-khì? Gún chí-hó chhùi-khí-kin kā leh, koat-tēng koh khì chhì khòaⁿ-māi leh.

Chiū án-ne, hit nî ê joa̍h-thiⁿ, ta̍k-kang lóng chìm tī iû-éng-tî, siû kòe-lâi siû kòe-khì, chi̍t piàn koh chi̍t piàn, m̄-kiaⁿ sin-khó͘ it-ti̍t liān. Chit-má, góa í-keng siû kah chiâⁿ hó-sè ah, chò chi̍t-khùn tio̍h ē-tàng siû 500 kong-chhioh, chhin-chhiūⁿ toh-téng ni kam hiah-ni̍h kán-tan. Siūⁿ-bē-kàu tn̄g-tio̍h khùn-lân ê sî, kian-chhî piàⁿ- -lo̍h-khì, siūⁿ pān-hoat kā khek-ho̍k, ē-tàng tit-tio̍h chiah-ni̍h kam-tiⁿ ê khoài-lo̍k. Hit-tang-chūn, gún nā bô tám-liōng, chhìn-chhái iōng chi̍t ê chioh-kháu bô kè-sio̍k o̍h- -lo̍h-khì, hō͘ sêng-kong ê ki-hōe cháu-siám- -khì, kám m̄-sī chin khó-sioh?

Goân-lâi jîn-seng chāi-sè, gū-tio̍h khùn-lân chin sù-siông. Nā-sī m̄-káⁿ bīn-tùi, it-ti̍t tiû-tû, siūⁿ beh kā tòng-chò bô khòaⁿ-kìⁿ, būn-tê kâng-khoán chhāi tī hia, bē ka-kī kái-koat. Sim-koaⁿ-lāi tian-tò jú chhì-chha̍k, bē-su ū chhian-bān-kin tāng ê tōa chio̍h-thâu teh tī keng-kah-thâu, hō͘ lâng chih-chài bē-tiâu. Ē-tàng kái-koat ê sî-ki chi̍t-ē kòe- -khì, it-tēng ē oàn-thàn koh hiō-hóe, in-ūi kâng-khoán ê chêng-hêng ē koh hoat-seng, éng-oán kā lán tîⁿ tiâu leh.

Le̍k-sú-siōng ū chin chē lâng, in kian-chhî in ê lí-liām, iōng jia̍t-chêng tō͘-kòe sèⁿ-miā-tiong ê lân-koan. Chhin-chhiūⁿ Edison ūi-tio̍h beh hoat-bêng tiān-hóe-kiû-á, tī gián-kiù ê kòe-thêng-tiong, m̄-chai chhì kòe gōa-chē châi-liāu, keng-kòe gōa-chē pái ê sit-pāi, i lóng bô hòng-khì, m̄-kiaⁿ pa̍t-lang chhiò i sī gōng-tōa-tai. Edison sêng-kong liáu-āu, miâ-siaⁿ thàng sù-hái. I tùi jîn-lūi ê kòng-hiàn chin sú lâng chun-kèng, in-ūi chit ê hoat-bêng kái-piàn choân sè-kài. Só͘-í, lán tn̄g-tio̍h chó͘-gāi bián kiaⁿ-hiâⁿ, sim-thâu lia̍h hō͘ tiāⁿ, kut-la̍t ē pó͘ hân-bān, bān-hāng tāi-chì nā-sī se̍k-chhiú tō ē piàn kah chin lāi-hâng, bô tek-khak keng-kòe chit ê khó-giām, lán ê jîn-seng koh ke o̍h tio̍h chi̍t hāng.

Ē kì-tit ū chi̍t ê ê-á ê kóng-kò án-ne kóng, “Just do it！” Bô m̄-tio̍h! Ióng-kám kā ta̍h- -chhut-khì tō tio̍h ah! Ē poa̍h chiah ē tōa, ū kan-khó͘ chiah ē ū khùiⁿ-oa̍h, gán-kài mā ē jú khui-khoah. Sio̍k-gí kóng, “It khîn thian-hā bû lân-sū.” Ē kham-tit tōa-hong tōa-éng chiah sī chin kang-hu. Chit-má ê góa, sìn-sim cha̍p-chiok, m̄-kiaⁿ khùn-lân lâi sio-tú, in-ūi i sī siōng-hó ê lāu-su. Bí-lē ko-kùi ê chin-chu tō sī keng-kòe chi̍t lia̍p chi̍t lia̍p ê iù-soa-á ta̍uh-ta̍uh-á bôa-liān chhut-lâi- -ê. Gún ē jú-lâi jú kian-kiông, chò chi̍t ūi chiàⁿ-káng ê ióng-sū, tī tú-tio̍h khùn-lân ê sî-chūn, jīn-chin phah-piàⁿ m̄ jīn su, chiong-lâi it-tēng ē ū hó sêng-chiū.

讀hōo你聽