【台語世界／錄音】2022年ê中秋暝

文、錄音/王淑珍 Ông Siok-tin

今年ê中秋暝（註1），我ê第二查某囝Elsa佮幾ê仔同窗- -ê相招，chhōa轉來厝- -裡過節，in beh tī二樓ê空中花園辦一ê BBQ party。我ê翁婿專工買一kōaⁿ長長ê露營燈來妝thāⁿ露台。燈一下點著，看起來真súi、真顯目、真有氣氛。

BBQ ê材料是大家分頭仔去準備- -ê，chhoân到有夠phong-phài- -ê，食- -ê、lim- -ê、四秀仔（註2）ta̍k項有。海產有墨賊仔、蝦仔、魚仔、蚶仔；肉類有骰仔牛肉、菜捲牛肉、hiam白菜sīⁿ（註3）豬肉；菜蔬有茭白筍（註4）、番麥筍、番麥、khiû-meh仔菜佮大同仔（註5）。

我另外koh kûn一khaⁿ菜頭湯，內面下真濟好料- -ê，有干貝、蓮子、lǐn-jín（註6）、魚丸仔kap芋仔貢丸。Tāi-ke lóng食kah呵咾kah會觸舌。

大家鬥陣lim中秋「期間限定」ê台灣「SUNMAI」（註7）ê蜂蜜bì-luh（註8），koh有其他濟濟種無仝款牌子- -ê bì-luh，提來thàu韓國燒酒濫做伙lim。阮兩ê老- -ê tòe chia-ê少年- -ê經試幾仔種無仝口味ê bì-luh，chit款新ê體驗chiâⁿ趣味，hō͘阮soà一時感覺kap in仝款平少年。

大家ná食ná lim ná開講，真鬧熱。Lim kah略略仔茫茫ê時，bô-tiuⁿ bô-tî，圓圓圓ê月娘已經恬恬仔ùi雲ê後面sô- -出來，金金金掛tī天頂，有夠光颺- -ê。月娘tú時陣會hō͘薄薄ê雲cha̍h- -leh，像khàm一têng新娘網仔仝款，有一種言語無法度形容ê迷人kap神祕。有月娘ê陪伴，ta̍k-ê lóng耍kah足歡喜，一直到beh倚11點才甘願散場。

Êng暗，是ùi 2020年中國武漢肺炎（註9）大爆發以來，阮兜真無簡單才有ê聚會；mā 有可能是 Elsa 佮in chia-ê同窗- -ê今年上尾pái ê聚會。因為伊tī chit ê 10月tio̍h beh離開故鄉台灣，去到 hn̄g∼hn̄g-hn̄g ê美國食頭路ah。無人知影in後一pái ê見面會tī啥物時陣。

Chit ê BBQ party會使講是Elsa 上mah-chih（註10）ê朋友伴為伊辦ê歡送會。Tī Elsa人生ê另外一ê階段beh開始進前，有機會通kap大家saⁿ 鬥陣、互相祝福，我心內感覺真安慰。Chit ê中秋暝定著會chiâⁿ做阮心內永遠難忘ê記持。

註：1.新曆9月初10；2. chhùi食物仔；3. Kimchi；4.水筍；5.青番薑仔；6.紅菜頭；7. SUNMAI是一間歐洲式料理餐廳「金色三麥」ê品牌bí-luh，in ê蜂蜜bí-luh參加2022年歐洲bí-luh比賽有得tio̍h金牌。8. Beer；9. COVID19；10. 鬥陣了會合、感情真好

台灣字（白話字）版
2022 nî ê Tiong-chhiu-mî

Kin-nî ê Tiong-chhiu-mî, goá ê tē-jī cha-bó͘-kiáⁿ Elsa kap kúi-ê-á tông-chhong–ê sio-chio, chhoā tńg-lâi chhù–nih koè-cheh, in beh tī jī-lâu ê khong-tiong hoe-hn̂g pān chi̍t ê BBQ party. Goá ê ang-sài choan-kang bé chi̍t koāⁿ tn̂g-tn̂g ê lō͘-iâⁿ-teng lâi chng-thāⁿ lō͘-tâi. Teng chi̍t-ē tiám-to̍h, khoàⁿ–khí-lâi chin súi, chin hiáⁿ-ba̍k, chin ū khì-hun.

BBQ ê châi-liāu sī tāi-ke pun-thâu-á khì chún-pī–ê, chhoân kàu ū-kàu phong-phài–ê, chia̍h–ê, lim–ê, sì-siù-á ta̍k-hāng ū. Hái-sán ū ba̍k-cha̍t-á, hê-á, hî-á, ham-á; bah-lūi ū tâu-á gû-bah, chhài-kńg gû-bah, hiam-pe̍h-chhài-sīⁿ ti-bah; chhài-se ū kha-pe̍h-sún, hoan-be̍h-sún, hoan-be̍h, khiû-mé-á-chhài kap tāi-tông-á.

Goá lēng-goā koh kûn chi̍t khaⁿ chhài-thâu-thng, lāi-bīn hē chin-chē hó-liāu–ê, ū kan-poè, liân-chí, lǐn-jín, hî-oân-á kap ō͘-á-kòng-oân. Ta̍k-ê lóng chia̍h kah o-ló kah ē tak-chi̍h.

Tāi-ke tàu-tīn lim Tiong-chhiu “kî-kan hān-tēng” ê Tâi-oân “SUNMAI” phang-bi̍t bì-luh, koh ū kî-tha chē-chē-chióng bô kâng-khoán pâi-chú–ê bì-luh, the̍h-lâi thàu Hân-kok sio-chiú lām chò-hoé lim. Gún nn̄g ê lāu–ê toè chia-ê siàu-liân–ê keng-chhì kúi-á- chióng bô-kâng kháu-bī ê bì-luh, chit khoán sin ê thé-giām chiâⁿ chhù-bī, hō͘ gún chi̍t-sî kám-kak kap in kâng-khoán pêⁿ siàu-liân.

Tāi-ke ná chia̍h ná lim ná khai-káng, chin nāu-jia̍t. Lim kah lio̍h-lio̍h-á bâng-bâng ê sî, bô-tiuⁿ bô-tî, îⁿ∼îⁿ-îⁿ ê goe̍h-niû í-keng tiām-tiām-á ùi hûn ê āu-bīn sô- -chhut-lâi, kim∼kim-kim koà tī thiⁿ-téng, ū-kàu kng-iāⁿ- -ê. Goe̍h-niû tú sî-chūn ē hō͘ po̍h-po̍h ê hûn cha̍h- -leh, chhiūⁿ khàm chi̍t têng sin-niû-bāng-á kâng-khoán, ū chi̍t chióng giân-gí bô hoat-tō͘ hêng-iông ê bê-lâng kap sîn-pì. Ū goe̍h-niû ê poê-phoāⁿ, ta̍k-ê lóng sńg kah chiok hoaⁿ-hí, it-ti̍t kàu beh oá 11 tiám chiah kam-goān soàⁿ-tiûⁿ.

Êng-àm, sī ùi 2020 nî Tiong-kok Bú-hàn hì-iām toā po̍k-hoat í-lâi, gún tau chin bô kán-tan chiah ū ê chū-hoē; mā ū khó-lêng sī Elsa kap in chia-ê tông-chhiong- -ê kin-nî siōng boé-pái ê chū-hoē. In-ūi i tī chit ê 10- -goe̍h tio̍h beh lî-khui kò͘-hiong Tâi-oân, khì-kàu hn̄g∼hn̄g-hn̄g ê Bí-kok chia̍h thâu-lō͘ ah. Bô-lâng chai-iáⁿ in āu chi̍t-pái ê kìⁿ-bīn ē tī siáⁿ-mi̍h sî-chūn.

Chit ê BBQ party ē-sái kóng sī Elsa siōng mah-chih ê pêng-iú-phoāⁿ ūi i pān ê hoan-sàng-hoē. Tī Elsa jîn-seng ê lēng-goā chi̍t ê kai-toāⁿ beh khai-sí chìn-chêng, ū ki-hoē thang kap tāi-ke saⁿ tàu-tīn, hō͘-siong chiok-hok, goá sim-lāi kám-kak chin an-ùi. Chit ê Tiong-chhiu-mî tiāⁿ-tio̍h ē chiâⁿ-choè gún sim-lāi éng-oán lân-bōng ê kì-tî.

讀hōo你聽：