【台語世界／錄音】難忘ê一節課

文、錄音／A-ka（國小退休老師）

會記得國校仔ê老師teh上課ê時，bat講過Helen Keller ê故事hō͘阮聽，koh紹介伊寫ê冊：〈假使hō͘我三工ê光明〉。伊ê一生tī無光無聲ê世界內底度過真濟冬，猶原意志堅定，對未來充滿希望。Che使我chiâⁿ感動，jím-bē-tiâu喉tīⁿ目箍紅。

老師為著beh加深學生ê印象，決定hō͘全班來試看māi leh。老師吩咐大家先去教室ê外口排隊，兩人一組。Sòa- -落-來，ta̍k組lóng pun一ê目掩，其中一人ài先用目掩kā兩蕊目睭cha̍h- -起來，hō͘另外一位同伴來領chhōa。

我頭一pái做體驗，敢若teh冒險，眼前一片暗眠摸，東西南北chhōe無方向。會記得彼當陣，我心肝頭pho̍k-pho̍k-chhéng，雖然一手有人牽tiâu- -leh，猶是chiâⁿ緊張，另外一手koh tī半空中bo̍k-bo̍k-siû。

好ka-chài！有老師ê鼓勵，我踏出第一步。Chit條走廊，我ta̍k工lóng行幾nā pái，明明真熟似，chit-má sòa親像龜teh sô，感覺路途遙遠長lò-lò。我一步一步ta̍uh-ta̍uh仔sóa，chit種速度是beh tī時才行會soah。

後- -來，我ê partner講：「Beh落樓梯ah。」我想講：「Taⁿ害ah，平常時無注意，m̄知影樓梯一層有gōa koân，等- -leh若踏無好勢，tǹg落去thô͘-kha坐，he著真卸面皮！」

我kā partner ê衫khiú ân-ân，ta̍k步lóng ài先試探，因為腳手siuⁿ過慢，造成後壁大that車。聽著同學直直催，我愈驚惶，身軀phi̍h-phi̍h-chhoah，想beh行較緊- -leh，又koh m̄敢，心情jû-ká-ká。

Tī混亂當中，chit ê活動總算結束ah，雖然才用去短短半點鐘ê時間，我sòa感覺bē-su經過一世紀hiah-ni̍h-á久長。Tng我kā目掩提- -落-來，koh再看著五彩ê世界，有講bē出ê激動tī阮心肝內。

原來chheⁿ-mê無看見，親像一隻孤帆tī大海，茫茫渺渺真恐怖，一點仔安全感mā無。人講：「目睭是靈魂ê窗仔門」，真正是規欉好好—無錯。失明ê人bē當自由自在四界去，永遠活tī烏暗暝，應該真無利便，不止仔辛苦teh過日子。

這節課實在真難忘，hō͘我學會曉ài替人設想，ài互相體諒。因為親身去感受，我將心比心，體會特別深，kap學著智識比- -起來，che是koh-khah重要ê課程。咱對家己已經有ê物件，往往m̄知通寶惜，等失- -去了後，才知影貴重。

所以，目睭thí開，會當看著美麗ê景緻，是chiâⁿ幸運ê代誌。以後，我會感恩koh知足，用心去累積chit種單純ê快樂，對阮所有ê一切更加去愛護，che才是一世人上大ê幸福。

台灣字（白話字）版
Lân-bōng ê Chi̍t Chiat Khò

Ē kì-tit kok-hāu-á ê lāu-su teh siōng-khò ê sî, bat kóng kòe Helen Keller ê kò͘-sū hō͘ gún thiaⁿ, koh siāu-kài i siá ê chheh Ká-sú hō͘ góa saⁿ kang ê kong-bêng. I ê it-seng tī bô kng bô siaⁿ ê sè-kài lāi-té tō͘-kòe chin chē tang, iu-goân ì-chì kian-tēng, tùi bī-lâi chhiong-boán hi-bāng. Che sú góa chiâⁿ kám-tōng, jím-bē-tiâu âu-tīⁿ ba̍k-kho͘ âng.

Lāu-su ūi-tio̍h beh ka-chhim ha̍k-seng ê ìn-siōng, koat-tēng hō͘ choân-pan lâi chhì khòaⁿ-māi leh. Lāu-su hoan-hù tāi-ke seng khì kàu-sek ê gōa-kháu pâi-tūi, nn̄g lâng chi̍t cho͘. Sòa- -lo̍h-lâi, ta̍k cho͘ lóng pun chi̍t ê ba̍k-am, kî-tiong chi̍t lâng ài seng iōng ba̍k-am kā nn̄g lúi ba̍k-chiu cha̍h- -khí-lâi, hō͘ lēng-gōa chi̍t ūi tông-phōaⁿ lâi niá-chhōa。

Góa thâu-chi̍t-pái chò thé-giām, káⁿ-ná teh mō͘-hiám, gán-chiân chi̍t phiàn àm-bîn-bong, tang-sai-lâm-pak chhōe bô hong-hiòng. Ē kì-tit hit-tang-chūn, góa sim-koaⁿ-thâu pho̍k-pho̍k-chhéng, sui-jiân chi̍t chhiú ū lâng khan tiâu- -leh, iáu-sī chiâⁿ kín-tiuⁿ, lēng-goā chi̍t chhiú koh tī pòaⁿ-khong-tiong bo̍k-bo̍k-siû.

Hó-ka-chài! Ū lāu-su ê kó͘-lē, góa ta̍h chhut tē-it pō͘. Chit tiâu cháu-lông, góa ta̍k-kang lóng kiâⁿ kúi-nā pái, bêng-bêng chin se̍k-sāi, chit-má sòa chhin-chhiūⁿ ku teh sô, kám-kak lō͘-tô͘ iâu-oán tn̂g-lò-lò. Góa chi̍t pō͘ chi̍t pō͘ ta̍uh-ta̍uh-á sóa, chit chióng sok-tō͘ sī beh tī-sî chiah kiâⁿ ē soah.

Āu- -lâi, góa ê partner kóng, “Beh lo̍h lâu-thui ah.” Góa siūⁿ-kóng, “Taⁿ hāi ah, pêng-siông-sî bô chù-ì, m̄ chai-iáⁿ lâu-thui chi̍t chàn ū gōa koân, tán- -leh nā ta̍h bô hó-sè, tǹg lo̍h-khì thô͘-kha chē, he tio̍h chin sià bīn-phôe !”

Góa kā partner ê saⁿ khiú ân-ân, ta̍k-pō͘ lóng ài seng chhì-thàm. In-ūi kha-chhiú siuⁿ kòe bān, chō-sêng āu-piah tōa that-chhia. Thiaⁿ-tio̍h tông-o̍h ti̍t-ti̍t chhui, góa jú kiaⁿ-hiâⁿ, sin-khu phi̍h-phi̍h-chhoah, siūⁿ beh kiâⁿ khah kín- -leh, iū-koh m̄-káⁿ, sim-chêng jû-ká-ká.

Tī hūn-loān tang-tiong, chit ê oa̍h-tāng chóng-sǹg kiat-sok ah! Sui-jiân chiah iōng khì té-té pòaⁿ-tiám-cheng ê sî-kan, góa sòa kám-kak bē-su keng-kòe chi̍t sè-kí hiah-ni̍h-á kú-tn̂g. Tng góa kā ba̍k-am the̍h- -lo̍h-lâi, koh chài khòaⁿ-tio̍h ngó͘-chhái ê sè-kài, ū kóng bē chhut ê ke̍k-tōng tī gún sim-koaⁿ-lāi.

Goân-lâi chheⁿ-mê bô khòaⁿ-kìⁿ, chhin-chhiūⁿ chi̍t chiah ko͘-phâng tī tōa-hái, bông-bông-biáu-biáu chin khióng-pò͘, chi̍t-tiám-á an-choân-kám mā bô. Lâng kóng, “Ba̍k-chiu sī lêng-hûn ê thang-á-mn̂g”, chin-chiàⁿ sī kui châng hó-hó, bô-chhò. Sit-bêng ê lâng bē-tàng chū-iû chū-chāi sì-kè khì, éng-oán oa̍h tī o͘-àm-mî, èng-kai chin bô lī-piān, put-chí-á sin-khó͘ teh kòe ji̍t-chí.

Chit chiat khò si̍t-chāi chin lân-bōng, hō͘ góa o̍h ē-hiáu ài thè lâng siat-sióng, ài hō͘-siong thé-liōng. In-ūi chhin-sin khì kám-siū, góa chiong-sim-pí-sim, thé-hōe te̍k-pia̍t chhim. Kap o̍h-tio̍h tì-sek pí- -khí-lâi, che sī koh-khah tiōng-iàu ê khò-thêng. Lán tùi ka-kī í-keng ū ê mi̍h-kiāⁿ, éng-éng m̄ chai thang pó-sioh; tán sit- -khì liáu-āu, chiah chai-iáⁿ kùi-tiōng.

Só͘-í, ba̍k-chiu thí-khui, ē-tàng khòaⁿ-tio̍h bí-lē ê kéng-tì, sī chiâⁿ hēng-ūn ê tāi-chì. Í-āu, góa ē kám-un koh ti-chiok, iōng-sim khì lúi-chek chit chióng tan-sûn ê khoài-lo̍k, tùi gún só͘-ū ê it-chhè kèng-ka khì ài-hō͘. Che chiah sī chi̍t-sì-lâng siōng-tōa ê hēng-hok.

讀hōo你聽