文化台灣民俗【台語世界/錄音】足感心Ê...

【台語世界/錄音】足感心Ê紅包

Date:

文、錄音/陳俐雯

會記得做囡仔時上歡喜過年,有新衫通穿媠媠koh有紅包通提,若愈倚近二九暝心情著親像食尾牙等beh摸彩仝款,彼種貓貓等nih-nih望giàn beh提紅包ê心情是做囡仔才有ê福利。目一nih,彼个樂暢等beh提紅包ê囡仔phí已經hoán做ài分teh年錢予序大ê年歲ah!

疫情自2019年底爆發到taⁿ已經三冬外,世界各國疫苗研發速度猶拚bē過病毒直直變種四界湠ê流速,這款隨時攏會穢著「中國肺炎」ê危險正經予人bē按算–得。阮老爸今年83歳,疫苗一劑攏無注,舊年mā無細膩去穢著中國肺炎,佳哉伊老罔老猶足gâu哺塗豆kài勇身,無幾工仔就醫原全,hō͘阮chia做序細–个一粒慄慄掣ê心總算是毋免koh跳Tango。所pái,規家伙á若攏會當佇時勢chiah-ni̍h-á bē平順ê年冬日日平安,這就是世間上大ê幸福。

今暗koh來到團圓暝,分紅包是逐冬食飯飽ê大齣頭,大姊lā話頭ài大家拜年攏用台語講好話,講煞才會使分紅包。這時等bē赴beh提紅包ê老爸早著stand by坐kah好勢好勢,hō͘大家看kah起愛笑。兄弟姊妹按大姊先起鼓隨个仔祝福老爸兔仔年身體勇健食百二、逐工生理旺旺旺收錢收袂離、年年平安運途順序好空一直來……。老爸二蕊目睭掠紅包金金相笑kah喙仔lī-sai-sai。本成阮當做紅包ê戲齣搬到遮著煞局ah,想bē到好酒沉甕底,換老爸koh加一場分紅包祝福阮chia-ê序細攏平安順序。

真正足感動mā足感謝這份恩典,阮老爸到taⁿ 83歲ah,面路猶是紅膏赤chi̍h身體勇kah溜溜走四界去,攏免阮操煩。食kah這个歲頭koh會當佇二九暝提著序大人分hō͘阮的teh年錢,足幸福,這真正是天公伯仔hō͘阮上讚ê恩賜!

台灣字(白話字)版
Chiok Kám-sim Ê Âng-pau

Ē-kì-tit chò gín-á sî siōng hóaⁿ-hí kòe-nî, ū sin-saⁿ thang chhēng-súi-súi koh ū âng-pau thang the̍h. Nā lú óa-kīn jī-káu-mê sim-chêng tio̍h chhin-chhiūⁿ chia̍h bóe-gê tán beh mo͘-chhái kâng-khóaⁿ. Hit-chióng niau-niau-tán nih-nih-bāng giàn beh the̍h âng-pau ê sim-chêng sī chò gín-á chiah ū ê hok-lī. Ba̍k-chi̍t-nih, hit-ê lo̍k-thiòng tán-beh the̍h âng-pau ê gín-á-phí í-keng hoán-chò ài pun teh-nî-chîⁿ hō͘ sī-tōa ê nî-hòe ah!

E̍k-chêng chū 2019 nî té po̍k-hoat kàu-taⁿ í-keng saⁿ-tang gōa. Sè-kài kok-kok e̍k-biâu gián-hoat sok-tō͘ iáu piàⁿ bē kòe pēⁿ-to̍k ti̍t-ti̍t piàn-chéng sì-kè thòaⁿ ê liû-sok. Chit-khoán sûi-sî lóng ē òe-tio̍h “Tiong-kok hì-iām” ê gûi-hiám chèng-keng hō͘-lâng bē-án-sǹg–tit. Gún lāu-pē kin-nî 83 hòe, e̍k-biâu chi̍t-che lóng bô chù, kū-nî mā bô-sè-jī khì òe-tio̍h Tiong-kok hì-iām, ka-chài i lāu-bóng-lāu iáu chiok gâu pō͘ thô͘-tāu kài ióng-sin. Bô kúi-kang-á chiū i-oân-choân, hō͘ gún chia chò sì-sè–ê chi̍t-lia̍p la̍k-la̍k-chhoah ê sim chóng-sǹg sī m̄-bián koh thiàu Tango. Só͘-pái, kui-ke-hóe-á nā lóng ē-tàng tī sî-sè chiah-nī-á bē pêng-sūn ê nî-tang ji̍t ji̍t pêng-an. Che chiū-sī sè-kan siōng tōa ê hēng-hok.

Kin-àm koh lâi kàu thoân-îⁿ-mê. Pun âng-pau sī ta̍k-tang chia̍h pn̄g pá ê tōa-chhut-thâu: tōa-chí lā-ōe-thâu ài tāi-ke pài-nî lóng ài iōng Tâi-gí kóng hó-ōe, kóng soah chiah ē-sái pun âng-pau. Chit-sî tán-bē-hù beh the̍h âng-pau ê lāu-pē chá tio̍h stand by chē kah hó-sè hó-sè, hō͘ tāi-ke khòaⁿ kah khí-ài-chhiò. Hiaⁿ-tī chí-mōe àn tōa-chí seng khí-kó͘ sûi-ê-á chiok-hok lāu-pē thò͘-á-nî sin-thé ióng-kiāⁿ chia̍h-pah-jī, ta̍k-kang seng-lí ōng-ōng-ōng siu-chîⁿ siu-bē-lī, nî-nî pêng-an ūn-tô͘ sūn-sī hó-khang it-ti̍t lâi… Lāu-pē nn̄g-lúi ba̍k-chiu lia̍h âng-pau kim-kim-siòng chhiò kah chhùi-á lî-sai-sai. Pún-chiâⁿ gún tòng-chò âng-pau ê hì-chhut poaⁿ kàu chia tio̍h soah-kiok ah. Siūⁿ-bē-kàu hó-chiú tîm àng-té, ōaⁿ lāu-pē koh ka chi̍t-tiûⁿ pun âng-pau chiok-hok gún chia-ê sì-sè lóng pêng-an sūn-sī.

Chin-chiàⁿ chiok kám-tōng mā chiok kám-siā chit-hūn un-tián. Gún lāu-pē kàu-taⁿ 83 hòe ah, bīn lō͘ iáu sī âng-ko-chhiah-chi̍h sin-thé ióng kah liu-liu-cháu sì-kè khì, lóng bián gún chhau-hoân. Chia̍h kah chit-ê hòe-thâu koh ē-àng tī jī-káu-mê the̍h-tio̍h sī-tōa-lâng pun hō͘ gún ê teh-nî-chîⁿ, chiok hēng-hok, che chin-chiàⁿ sī thiⁿ-kong-peh-á hō͘ gún siōng chán ê un-sù.
讀hōo你聽:

本文僅代表作者立場,不代表本平台立場

分享文章

Facebook Comments 文章留言

編輯中心
編輯中心https://vigormedia.tw/
銳傳媒 編輯中心 https://vigormedia.tw/

專欄

推薦閱讀