文、錄音/呂昆霖Lū Khun-lîm
Sī án-chóaⁿ 父母kap 阿公、阿媽會曉講台語,ná-ē lóng用華語hâm囡á講話?
Soà–lo̍h-lâi sī我ê看法。
第1點、囡á惜面皮:
現此時社會 kap媒體ê主流 sī華語,而且tī學校 kan-na tī台語課chiah講台語,時數mā較少。囡á kap同學、朋友鬥陣ê sî-chūn lóng-sī講華語,tńg–lâi mā bōe-koàn-sì轉tńg-lâi台語,驚講m̄著koh驚gāi-gio̍h。Lú bô講tio̍h lú bōe koàn-sì講。Kui-khì tō bô-ài講–loh。
第2點、家庭環境:
父母互相lóng用華語講,ka-kī本身mā bô-siáⁿ ē-hiáu講。驚囡á 聽bô tō bô-ài 講。阿公、阿媽ē-hiáu講,soà 華語kap台語chham-chòe-hé,竹篙tàu菜刀。Sióng-hāi–ê sī父母koh阻擋阿公、阿媽kap囡á講台語。
第3點、父母愛面子:
父母本身ê 觀念偏差,認為台語sī方言,sī老一輩teh kóng–ê,bô tio̍h-sī社會ē-kha-chàn teh講ê話,出現粗魯kiam bô水準ê錯覺。普遍認為學外國語言,āu-pái khah ū chhut-thoat,ē-sái趁khah-chōe錢,得tio̍h khah-koân ê社會地位,hō͘父母有面子。
以上sī 我個人ê 看法。
時間tng-leh一點一滴流失,M̄-koh lán千萬m̄-thang 失志。Chiah-ê問題lán lóng知,kan-na bô願意面對,Ài先kā ka-kī ê 觀念chhiâu-hō͘-chiàⁿ,sòa–lo̍h-lâi對家庭教育開始,ta̍uh-ta̍uh–á kā囡á siâⁿ hō͘ koàn-sì講台語。Lo̍h-bé kā kui-ê社會環境 tńg-se̍h–tńg-lâi。Án-ne chiah ē-sái hō͘台語chiah-nī súi ê語言世世代代繼續講–lo̍h-khì.
台灣字(白話字)版
Sī án-chóaⁿ pē-bú kap a-kong, a-má ē-hiáu kóng Tâi-gí, ná-ē lóng iōng Hôa-gí hâm gín-á kóng-oē?
Soà–lo̍h-lâi sī goá-ê khòaⁿ-hoat.
Tē it tiám、Gín-á sioh-bīn-phê:
Hiān-chhú-sî siā-hōe kap mûi-thé ê chú-liû sī Hôa-gí, jî-chhiáⁿ tī ha̍k-hāu kan-na tī Tâi-gí-khò chiah kóng Tâi-gí, sî-sò͘ mā khah-chió. Gín-á kap tông-o̍h, pêng-iú tàu-tīn ê sî-chūn lóng-sī kóng Hôa-gí, tńg–lâi mā bōe-koàn-sì choán tńg-lâi Tâi-gí. Kiaⁿ kóng m̄-tio̍h, koh kiaⁿ gāi-gio̍h. Lú bô-kóng tio̍h lú bōe-koàn-sì kóng. Kui-khì tō bô-ài-kóng–loh.
Tē lī tiám
Ka-têng khoân-kéng:
Pē-bú hō͘-siong lóng-iōng Hoâ-gí kóng, ka-kī pún-sin mā bô-siáⁿ ē-hiáu kóng . Kiaⁿ gín-á thiaⁿ-bô tō bô-ài kóng. A-kong, a-má ē-hiáu kóng, soà Hoâ-gí kap Tâi-gí chham-chò-hoé, tek-ko tàu chhài-to. Siōng-hāi–ê sī pē-bú koh chó͘-tòng a-kong, a-má kap gín-á kóng Tâi-gí.
Tē saⁿ tiám、Pē-bú ài bīn-chú:
Pē-bú pún-sin ê koan-liām phian-chha. Jīn-uî Tâi-gí sī hong-giân, sī lāu-chi̍t-pòe teh kóng–ê, bô tio̍h-sī siā-hōe ē-kha-chàn teh kóng ê ōe, chhut-hiān chho͘-ló͘ kiam bô-chuí-chún ê chhò-kak. Phó͘-phiàn jīn-ûi o̍h goā-kok gí-giân, āu-pái khah ū chhut-thoat, ē-sái thàn khah-choē chîⁿ, tit-tio̍h khah-koân ê siā-hōe-tē-ūi, hō͘ pē-bú ū bīn-chú.
Í-siōng sī góa kò-jîn ê khòaⁿ-hoat.
Sî-kan tng-leh chi̍t-tiám-chi̍t-tih lâu-sit. M̄-koh lán chhian-bān m̄-thang sit-chì. Chia-ê būn-tê lán lóng-chai, kan-na bô-goān-ì bīn-tùi. Ài seng kā ka-kī ê koan-liām chhiâu-hō͘-chiàⁿ, sòa–lo̍h-lâi tùi ka-têng kàu-io̍k khai-sí, ta̍uh-ta̍uh–á lâi kā gín-á siâⁿ hō͘ koàn-sì kóng Tâi-gí. Lo̍h-bé kā kui-ê siā-hōe tōa-khoân-kéng tńg-se̍h–tńg-lâi. Án-ne chiah ē-sái hō͘ Tâi-gí chiah-nī súi ê gí-giân sè-sè-tāi-tāi kè-sio̍k kóng–lo̍h-khì.
讀hōo你聽:
本文僅代表作者立場,不代表本平台立場
Facebook Comments 文章留言