【台語世界／錄音】春花望雨

文、錄音／王淑珍 （Ông Siok-tin）

中央氣象局tī 3月初tio̍h公布講，根據新竹縣以南氣象台ê紀錄，到目前為止，平均ê落雨量是60年來上低- -ê。

日月潭khiām ê水chhun無到6成，潭底hit 9隻水雞已經hō͘人看現現。台灣海拔上koân ê聖山- -玉山，kui-ê冬天lóng無落到半pái雪，che是有史以來ê頭一pái。南部地區已經超過560外工無落過大雨 (超過200 mm) ah。若準5- -月到6- -月，黃酸雨*koh無落，á-sī落了無夠額，有可能會造成30年來上嚴重ê大洘hoāⁿ。

3月中旬，我kap幾ê仔同窗- -ê做陣去嘉義六腳鄉溪岸邊ê青色公路行春。沿路兩排大大欉ê苦楝仔樹，花開到o͘m~o͘m-o͘m。苦楝仔花細細kah蕊仔，kui葩kui葩開tī樹尾頂，淺淺ê粉茄仔色真迷人。春風一陣一陣微微仔吹，樹枝toè leh輕輕仔搖。苦楝仔花ê清芳味也toè leh一陣一陣飄- -過-來。當teh謝- -ê、開始反白色ê苦楝仔花像落雪仝款，sap-sap仔sap-sap仔，一片一片tùi樹仔頂lak- -落來，無聲無說。Che情景好親像北國ê「櫻花雨」。

阮行佇有樹ńg，較涼爽ê路仔邊，ná行ná排「pose」ná hip-siōng。行到過晝，腹肚iau ah ，chiah離開。阮se̍h tùi朴子市內入- -去，chhoē tio̍h一間氣氛bē-bái ê餐廳，歇睏食中晝，ná食ná phò-tāu。

食飽，離開餐廳了，阮ǹg南oat-tùi台南市ê學甲區去。逐年ê 3、4- -月，學甲區ê 「蜀葵花文化節」，tek-khak會佇光華里種一phiàn大大phiàn ê蜀葵花，吸引濟濟「jiok花」ê觀光客來賞花。蜀葵花也號做柑盤花、一丈紅。因為花欉發到kui欉直liòng-liòng、lò-lò長，mā有人kā叫做「竹篙花」。

蜀葵花kap日頭花仝款真kah意日頭，品種真濟，五花十色。有青春ê粉紅仔色，有艷麗ê大紅色，有妖嬌ê桃花紅，有純潔ê白色，有活潑ê金黃色，koh有真oá烏色ê重茄仔色。重茄仔色ê蜀葵號做「墨葵」，大pān koh神祕，足特殊- -ê。

除了一大phiàn蜀葵花以外，四箍圍猶有栽真濟其他ê花。有2、3區栽逐色逐樣、生做真古錐ê波斯菊kap百日草，tī邊仔leh tàu鬧熱。另外猶有一區栽kap La̍h-vèn-tah (Lavender) ê色水beh仝仔beh仝ê niáu鼠仔尾草。He niáu鼠仔尾草kui-phiàn ê粉茄仔色，真迷人。行入去tī hit-phiàn粉茄仔色ê花海內底，hō͘人感覺親像去到北海道欣賞La̍h-vèn-tah (Lavender)仝款，心情chiâu輕鬆- -起來。

阮 tī chia，一區行過一區，流連bē-soah。遺憾- -ê是，kui-ê園區田塗lóng焦khok-khok。所有ê花欉oá塗跤面hit-chat，枝葉kap花蕊lóng tiâu一iân kāu-kāu ê塗粉。看- -起來已經有一段時日無ak水ah。有一寡仔較lám身ê花欉，花m̂未曾開tio̍h開始leh焦lian啊ah。Hia ê花開kah當艷當súi ê花欉，好親像leh對抗欠水ê困境，拚性命硬keng，勉強展開伊上súi ê笑容，想beh tī chit-phiàn焦洘ê土地繼續生存- -落去。Chit款情境hō͘人看tio̍h真m̄甘。

天色beh暗啊，大家準備beh離開ê時，我輕聲kā田- -nih ê花蕊講:「感謝lín開到chiah-ni̍h súi! 愛繼續加油o͘h~」。

我tī心內祈禱，ǹg望雨水緊來，thang kā樹欉、花蕊洗hō͘清氣清氣，hō͘ in健康有元氣。Koh較ǹg望- -ê是，今年雨水有夠額，田塗水分飽飽，水庫入水tīⁿ -tīⁿ，thang解除洘hoāⁿ ê危機。
*黃酸雨=梅雨。

台灣字（白話字）版
Chhun-hoe Bāng Hō͘

Tiong-iong khì-siōng-kio̍k tī 3 goe̍h chhe tio̍h kong-pò kóng, kin-kì Sin-tek-koān í-lâm khì-siōng-tâi ê kì-lio̍k, kàu ba̍k-chêng ûi-chí, pêng-kin ê lo̍h-hō͘-liōng sī 60 nî lâi siōng-kē- -ê.

Ji̍t-goa̍t-thâm khiām ê chúi chhun bô-kàu 6 siâⁿ, thâm-té hit 9 chiah chúi-ke í-keng hō͘ lâng khoàⁿ-hiān-hiān. Tâi-oân hái-poa̍t siōng-koân ê sèng-soaⁿ, Gio̍k-san, kui-ê tang-thiⁿ lóng bô lo̍h kàu poàⁿ-pái seh, che-sī iú-sú í-lâi ê thâu 1 pái. Lâm-pō͘ tē-khu í-keng chhiau-koè 560 goā kang bô lo̍h koè toā-hō͘ (chhiau-koè 200 mm) ah. Nā-chún 5- -goe̍h kàu 6- -goe̍h, n̂g-sng-hō͘ koh bô lo̍h, á-sī lo̍h-liáu bô-kàu gia̍h, ū khó-lêng ē chō-sêng 30 nî lâi siōng giâm-tiōng ê toā khó-hoāⁿ.

3 goe̍h tiong-sûn, goá kap kúi-ê-á tông-chhong- -ê chò-tīn khì Ka-gī La̍k-kha-hiong khe-hoāⁿ piⁿ ê chheⁿ-sek kong-lō͘ kiâⁿ-chhun. Iân-lō͘ nn̄g-pâi toā-toā-châng ê Khó͘-lēng-á-chhiū, hoe khui-kàu o͘m~o͘m-o͘m. Khó͘-lēng-á-hoe sè-sè-kah lúi-á, kui-pha kui-pha khui tī chhiū-boé téng, chhián-chhián ê hún-kiô-á-sek chin bê-lâng. Chhun-hong chi̍t-chūn chi̍t-chūn bî-bî-á chhoe, chhiū-ki toè leh khin-khin-á iô. Khó͘-lēng-á-hoe ê chheng-phang-bī iā toè leh chi̍t-chūn chi̍t-chūn phiau- -koè-lâi. Tng-teh siā- -ê, khai-sí hoán pe̍h-sek ê khó͘-lēng-á-hoe chhiūⁿ lo̍h-seh kâng-khoán, sap-sap-á sap-sap-á, chi̍t-phìⁿ chi̍t-phìⁿ tùi chhiū-á-téng lak- -lo̍h-lâi, bô-siaⁿ bô-soeh. Che chêng-kéng hó chhin-chhiūⁿ Pak-kok ê “Eng-hoe-hō͘”.

Gún kiâⁿ tī ū chhiū-ńg, khah liâng-sóng ê lō͘-á-piⁿ, ná kiâⁿ ná pâi “pose” ná hip-siōng. Kiâⁿ kàu koè-tàu, pa̍k-tó͘ iau ah, chiah lī-khui. Gún se̍h tùi Phò-chú chhī-lāi ji̍p- -khì, chhoē tio̍h chi̍t-keng khì-hun bē-bái ê chhan-thiaⁿ, hioh-khùn chia̍h tiong-tàu, ná chia̍h ná phò-tāu.

Chia̍h-pá, lī-khui chhan-thiaⁿ liáu, gún ǹg lâm oat-tùi Tâi-lâm-chhī ê Ha̍k-kah-khu khì. Ta̍k-nî ê 3, 4- -goe̍h, Ha̍k-kah-khu ê “Sio̍k-kûi-hoe bûn-hoà-cheh”, tek-khak ē tī Kong-hoâ-lí chèng chi̍t-phiàn toā-toā-phiàn ê sio̍k-kûi-hoe, khip-ín chē-chē “jiok-hoe” ê koan-kong-kheh lâi siúⁿ-hoe. Sio̍k-kûi-hoe iā hō-chò kam-poâⁿ-hoe, it-tiōng-hông. In-ūi hoe-châng hoat-kàu kui-châng ti̍t-liòng-liòng, lò-lò-tn̂g, mā ū lâng kā kiò-chò “tek-ko-hoe”.

Sio̍k-kûi-hoe kap ji̍t-thâu-hoe kâng-khoán chin kah-ì ji̍t-thâu, phín-chéng chin-chē, ngó͘-hoe cha̍p-sek. Ū chheng-chhun ê hún-âng-á-sek, ū iām-lē ê toā-âng-sek, ū iau-kiau ê thô-hoe-âng, ū sûn-kiat ê pe̍h-sek, ū hoa̍t-phoat ê kim-nn̂g-sek, koh ū chin oá o͘-sek ê tāng-kiô-á-sek. Tāng-kiô-á-sek ê sio̍k-kûi hō-chò “ba̍k-kûi”, toā-pān koh sîn-pì, chiok te̍k-sû- -ê.

Tû-liáu chi̍t-toā-phiàn sio̍k-kûi-hoe í-goā, sì-kho͘-ûi iáu-ū chai chin-chē kî-tha ê hoe. Ū 2, 3 khu chai ta̍k-sek ta̍k-iūⁿ, seⁿ-chò chin kó͘-chui ê Pho-su-kiok kap Pah-ji̍t-chháu, tī piⁿ-á leh tàu nāu-jia̍t. Lēng-goā iáu-ū chi̍t-khu chai kap La̍h-vèn-tah (Lavender /ラベンダー) ê sek-chúi beh kâng á beh kâng ê niáu-chhí-á-boé-chháu. He niáu-chhí-á-boé-chháu kui-phiàn ê hún-kiô-á sek, chin bê-lâng. Kiâⁿ ji̍p-khì hit-phiàn hún-kiô-á sek ê hoe-hái lāi-té, hō͘ lâng kám-kak chhin-chhiūⁿ khì-kàu Pak-hái-tō him-sióng La̍h-vèn-tah kâng-khoán, sim-chêng chiâu khin-sang- -khí-lâi.

Gún tī chia, chi̍t-khu kiâⁿ-khoè chi̍t-khu, liû-liân bē-soah. Ûi-hām- -ê sī, kui-ê hn̂g-khu chhân-thô͘ lóng ta-khok-khok. Só͘-ū ê hoe-châng oá thô͘-kha-bīn hit-chat, ki-hio̍h kap hoe-lúi lóng tiâu chi̍t-iân kāu-kāu ê thô͘-hún. Khoàⁿ- -khí-lâi í-keng ū chi̍t-toāⁿ sî-ji̍t bô ak-chúi ah. Ū chi̍t-koá-á khah lám-sin ê hoe-châng, hoe-m̂ boē-chêng khui tio̍h khai-sí leh ta-lian ah. Hia ê hoe khui kàu tng iām tng súi ê hoe-châng, hó chhin-chhiūⁿ leh tùi-khòng khiàm-chúi ê khùn-kéng, piàⁿ sìⁿ-miā ngē keng, bián-kióng tián-khui i siōng súi ê chhiò-iông, siūⁿ beh tī chit-phiàn ta-khó ê thó͘-tē kè-sio̍k seng-chûn- -lo̍h-khì. Chit-khoán chêng-kéng hō͘ lâng khoàⁿ tio̍h chin m̄-kam.

Thiⁿ-sek beh àm ah, tāi-ke chún-pī beh lī-khui ê sî, goá khin-siaⁿ kā chhân- -nih ê hoe-lúi kóng, “Kám-siā lín khui-kàu chiah-ni̍h súi! Ài kè-sio̍k ka-iû o͘h~”.

Goá tī sim-lāi kî-tó, ǹg-bāng hō͘-chúi kín lâi, thang kā chhiū-châng hoe-lúi sé hō͘ chheng-khì chheng-khì, hō͘ in kiān-khong ū goân-khì. Koh-khah ǹg-bāng- -ê sī, kin-nî hō͘-chúi ū-kàu gia̍h, chhân-thô͘ chúi-hun pá-pá, chúi-khò͘ ji̍p-chúi tīⁿ-tīⁿ, thang kái-tû khó-hoāⁿ ê gûi-ki.

讀hōo你聽：