【台語世界／錄音】斑芝仔ê故鄉

文、錄音／蘇晏德

2020年3月初7拜六，9點50分對厝出發，今仔日ê行程是去台南ê將軍欣賞斑芝仔花，順紲做一寡記錄。講著台南ê將軍區，可能有真濟人猶m̄-bat聽–過。馬沙溝彩繪村，青鯤鯓青山漁港，青鯤鯓葵扇型ê鹽田，方圓美術館，香雨書院，這攏是將軍ê旅遊景點。M̄-koh今仔日ê主角是將軍ê斑(pian)芝仔，將軍ê斑(pian)芝仔樹是全台灣上濟 ê所在。

9點50分車對路竹出發，沿國一高速公路，佇麻豆lo̍h交流道，沿171線道路代先來到將軍ê苓仔寮斑(pian)芝仔路。這條路佇苓和國小ê後面，外地人較 m̄知影這个所在。一條kan-na 300公尺長ê斑(pian)芝仔路，攏puh出紅冇冇ê花蕊探頭咧共阮看。紅.媠閣大pān ê斑(pian)芝仔花，m̄知你敢有夢中ê情人？

最近5年，將軍這个所在大概來欲20擺。斑芝仔花開佇二、三月，今仔日ê斑芝仔大概開八成，雖罔是拜六，m̄-koh遊客真少。閣來第二站來到南21號道路，這條路比較khah濟人知，佇將軍國中ê前面。紅冇冇ê斑芝仔，一蕊一蕊對烏墨墨ê花莓(m̂)puh–出來，新ê性命新ê向望對遮開始。迷人閣妖嬌ê斑(pian)芝仔，有紅–ê嘛有柑仔色–ê，攏出來共我揲手。紅色佮柑仔色ê斑芝仔，這个單純ê少女，共南21號道路妝娗甲媠噹噹。第三站紲接車沿將軍國中邊仔，順南20號道路駛，這條路是在地人ê祕密景點，雖罔花蕊無親像前二條路hiah-nī奢颺，m̄-koh來一條無人小路佮斑芝仔約會，沓沓仔行，勻勻仔欣賞，享受一下仔舊情綿綿ê快樂人生。

第四站車沿南20號道倒斡，沿台17線閣倒斡來到南24號道路，這條是通往漚汪(將軍市區)ê道路。今年ê斑芝仔比往年發較濟，m̄-koh這條路參觀ê人較少，攏是過路ê較濟。第五站車沿南20號道路，經過南19號道路往佳里ê方向，正斡來到南27號道路。這條路ê斑芝仔雖罔短短大約無500公尺，m̄-koh有一小段發甲真ām，經過途中親像是行過紅色ê磅空。

將軍ê斑芝仔，雖罔無白河林初埤hiah-nī出名，m̄-koh將軍ê斑芝樹遍佈大街小路，範圍大閣媠，將軍堪得叫做台灣ê斑芝鄉。真可惜將軍區公所無大力宣傳，嘛無其他ê相關造景，致使名聲無白河林初埤hiah-nī奢颺。雖然林初埤ê斑芝仔較少，m̄-koh誠集中，閣有其他ê配套，加上白河區公所大力宣傳，所以名聲迵全世界。M̄管按怎我猶原欲替將軍ê斑芝仔贊聲，向望斑芝花開時，請你將軍行踏。

最後欲說明一下，斑芝仔花華語叫做『木綿花』，台語千萬m̄通講bo̍k-mî-hoe。

台灣字（白話字）版
Pian-chi-á ê kò͘-hiong

2020 nî 3 goe̍h chhe 7 pài-la̍k, 9 tiám 50 hun tùi chhù chhut-hoat, Kin-á-ji̍t ê hêng-têng sī Tâi-lâm ê Chiong-kun-khu, khó-lêng chin-chē lâng m̄-bat thiaⁿ–kòe. Má-soa-kau chhái-hōe-chhoan, Chheⁿ-khun-sin Chheng-san hî-káng, Chheⁿ-khun-sin khôe-sìⁿ-hêng ê iâm-chhân, Hong-oân bí-su̍t-koán, Hiong-ú su-īⁿ, Che lóng-sī Chiong-kun ê lú-iû kéng-tiám. M̄-koh kin-á-ji̍t ê chū-kak sī Chiong-kun ê pian-chi-á, Chiong-kun ê pian-chi-á-chhiū sī choân Tâi-oân siōng-chē ê só͘-chāi.

9 tiám 50 hun chhia tùi Lo͘-tek chhut-hoat, Iân kok-it ko-sok kong-lō͘, Tī Môa-tāu lo̍h kau-liû-tō, Iân 171 sòaⁿ tō-lō͘ seng lâi kàu Chiong-kun ê Lêng-á-liâu pian-chi-á-lō͘. Chit-tiâu lō͘ tī Lêng-hô kok-sió ê āu-bīn, Gōa-tē-lâng khah m̄ chai-iáⁿ chit-ê só͘-chāi. Chit-tiâu kan-na 300 kong-chhioh tn̂g ê pian-chi-á-lo͘, Lóng puh chhut âng-phàⁿ-phàⁿ ê hoe-lúi tham-thâu teh kā goán khòaⁿ. Âng súi koh tōa-pān ê pian-chi-á-hoe, M̄-chai lí kám ū bāng-tiong ê chêng-jîn？

Chòe-kīn 5 nî, Chiong-kun chit-ê só͘-chāi tāi-khài lâi beh 20 pái. pian-chi-á khui tī jī saⁿ goe̍h, Kin-á-ji̍t ê pian-chi-á tāi-khài khui 8 siâⁿ, Sui-bóng sī pài-la̍k, m̄-koh iû-kheh chin-chió. Koh-lâi tē-jī-chām lâi-kàu Lâm 21 hō tō-lō͘, Chit-tiâu lō͘ pí-kàu khah chē lâng chai, Tī Chiong-kun kok-tiong ē chêng-bīn. Âng-phàⁿ-phàⁿ ê pian-chi-á, Chi̍t-lúi chi̍t-lúi tùi o͘-ba̍k-ba̍k ê hoe-m̂ puh–chhut-lâi, Sin ê sèⁿ-miā sin ê ǹg-bāng tùi chia khai-sí. Bê-lâng koh iau-kiau ê pian-chi-á, Ū âng–ê mā ū kam-á-sek–ê, lóng chhut-lâi kā góa ia̍t-chhiú. Âng-sek kah kam-á-sek ê pian-chi-á, Chit-ê tan-sûn ê siàu-lú, Kā Lâm 21 hō tō-lō͘ chng-thāⁿ kah súi-tang-tang. Tē-sann-chām sòa-chiap chhia iân Chiong-kun kok-tiong piⁿ-a, Sūn Lâm 20 hō tō-lō͘ sái, Chit-tiâu lō͘ sī chāi-tē-lâng ê pì-bi̍t kéng-tiám, Sui-bóng hoe-lúi bô chhin-chhiūⁿ chêng nn̄g-tiāu lō͘ hiah-nī chhia-iāⁿ, M̄-koh lâi chit-tiâu bô-lâng ê sió-lō͘ kah pian-chi-á iok-hōe, Ta̍uh-ta̍uh-á kiâⁿ, Ûn-ûn-á him-sióng, Hiáng-siū chi̍t-ē-á kū-chêng mî-mî ê khoài-lo̍k jîn-seng.

Tē-sì-chām chhia iân Lâm 20 hō tō-lō͘ tò-oat, Iân Tâi 17 sòaⁿ koh tò-oat lâi-kàu Lâm 24 hō tō-lō͘, Chit-tiâu lō͘ sī thong-óng Áu-ang(Chiong-kun chhī-khu)ê tō-lō͘. Kin-nî ê pian-chi-á pí éng-nî hoat khah-chē, M̄-koh chit-tiâu lō͘ chham-koan ê lâng khah-chió, Lóng-sī kòe-lō͘–ê khah-chē. Tē-gō͘-chām chhia iân Lâm 20 hō tō-lō͘, Keng-kòe Lâm 19 hō tō-lō͘ óng Ka-lí ê hong-hiòng, Chiàⁿ-oat lâi-kàu Lâm 27 hō tō-lō͘. Chit-tiâu lō͘ sui-bóng té-té tāi-iok bô 500 kong-chhioh, M̄-koh ū chi̍t-tōaⁿ ê pian-chi-á hoat kah chin ām, Keng-kòe tô͘-tiong chhin-chhiūⁿ kiâⁿ-kòe âng-sek ê pōng-khang.

Chiong-kun ê pian-chi-á, Sui-bóng bô Pe̍h-hô Lîm-chhe-pi hiah-nī chhut-miâ, M̄-koh Chiong-kun ê pian-chi-chhiū piàn-pò͘ tōa-ke sió-lō͘, Hoān-ûi tōa koh súi, Chiong-kun kham-tit kiò-chò Tâi-oân ê pian-chi-hiong. Chin bô-chhái Chiong-kun khu-kong-só͘ bô soan-thoân keng-siau, Mā bô kî-thaⁿ siong-koan chō-kéng, Tì-sú miâ-siaⁿ bô Pe̍h-hô Lîm-chhe-pi hiah-nī chhia-iāⁿ. Sui-bóng Lim-chhe-pi ê pian-chi-á khah-chió, M̄-koh chiâⁿ chi̍p-tiong, Koh ū kî-thaⁿ ê phòe-thò, ka-siōng Pe̍h-hô khu-kong-só͘ keng-siau koan-kong, Só͘-í miâ-siaⁿ thàng choân sè-kài. M̄-koán án-chóaⁿ góa iû-goân beh thè Chiong-kun ê pian-chi-á chān-siaⁿ, Ǹg-bāng pian-chi-á-hoe khui ê sî, Chhiáⁿ lí lâi Chiong-kun kiâⁿ-ta̍h.

Chòe-āu beh soeh-bêng–chi̍t-ê, Pian-chi-á Hôa-gí kiò-chò『木綿花』, Tâi-gí chhian-bān m̄-thang kóng bo̍k-mî-hoe. Goán chāi-tē ê khiuⁿ-kháu bô kóng pan-chi goán chia lóng kóng pian-chi-á.

讀hōo你聽：