【台語世界／錄音】意外款ê婚禮

文／錄音 蘇晏德

2020年10月18禮拜，為著大漢後生ê親事，全家到桃園市ê八塊區（八德區）提親，原本是講女方beh tī kōaⁿ-tiāⁿ hit工順紲請人客，南部ê例是先kōaⁿ-tiāⁿ訂婚女方選日子，結婚ê時男方揀日子先請人客，紲接女方chiah辦桌，可能是南北風俗無仝，抑是言語表達têng-tâⁿ，致使女方當做阮同意訂婚kah結婚beh仝一工進行。Tī莫名奇妙、含含糊糊、歡歡喜喜當中，hō͘女方選擇訂婚kah結婚ê日子。因為後生tī北部食頭路，半個月後、後生講訂婚kah結婚ê日子對方攏選好ah，攏選kāng一日tī桃園舉辦訂婚儀式，紲接結婚宴客。我想這聲害遛遛ah，ná-ē舞這齣–ê，我想講女方kám是誤解我ê意思。這對新人開始tī北部準備in ê婚禮，既然代誌已經按呢teh進行，為著雙方和諧只好讓步，後生新婦tī 2020年12月24先登記結婚，到taⁿ猶未請人客。

既然代誌到chit-ê坎站，趁後生新婦轉–來過年，我事先有kah牧師、後生參詳好勢，2021年2月初10，舊曆12月29 tī大樹教會做家庭禮拜，為這對新人祝福，因為若beh tī教會辦結婚式都合bē拄好。透過簡單ê儀式tī教會hō͘牧師證婚，新郎kah新娘攏無穿禮服，m̄是結婚式，是簡單ê家庭禮拜，並無邀請親人朋友參加。阮全家五人早時9點對路竹出發，到大樹教會才9點45分，準備好勢kā牧師講10點開始，牧師探頭看外口講：10點10分才開始。

過一tiap仔久，雄雄禮拜堂外口出現一台車，車門phah開是一个熟似ê面孔枝龍兄，sòa–落去，車一台一台駛入教會ê停車場，我一時gông-ngia̍h，ná-ē hiah-nī chē教會ê兄弟姊妹來參加阮ê家庭禮拜，好友美霞專程送一束花來予阮新婦。本chiâⁿ是beh做簡單ê家庭禮拜，sòa演變成一場意外ê婚禮。意外ê婚禮是新郎kah新娘無穿禮服，有二个牧師幫in證婚，有一群阮無邀請m̄知對佗位聽tio̍h風聲，走來教會kā阮祝福chiah-ê真有心ê兄弟姊妹。意外ê婚禮tī意外ê歡喜當中進行，牧師ê證道兄姊ê祝歌，一聲一句攏刻牢tī阮ê心內。感謝上帝、感謝兄弟姊妹ê祝福，感謝逐家替阮彌補遺憾ê孔喙。原本辦一桌安排beh kah牧師全家聚餐，因為這場意外ê婚禮，中晝攏總辦三桌，tī意外、歡喜、gông-ngia̍h當中完成這場上意外ê婚禮。

宏恩 沅涵 結婚祝詞

宏圖大展好將來，恩展滿滿福滿載，感謝上帝差天使，恩賜幸福大舞台。
沅涵溫柔人人愛，涵養出眾添光彩，知情達理好太太，足以協助好翁婿。
基督信仰結連理，宏恩心內只有你，聖經道理愛謹記，靈修祈禱無停止。
佇厝爸母惜命命，沅涵向望你來疼，信仰無偏愛四正，綴主跤步向前行。

台灣字（白話字）版

Ì-gōa ê hun-lé

Bûn／lio̍k-im: So͘, Iàn Tek

2020 nî 10 goe̍h 18 lé-pài, Ūi-tio̍h tōa-hàn hāu-seⁿ ê chhin-sū, Choân-ke kàu Thô-hn̂g-chhī ê Peh-tè-khu(Pat-tek-khu)the̍h-chhin, Goân-pún sī kóng lú-hong beh tī kōaⁿ-tiāⁿ hit-kang sūn-sòa chhiáⁿ lâng-kheh. Lâm-pō͘ ê lē sī seng kōaⁿ-tiāⁿ tēng-hun lú-hong soán ji̍t-chí, Kiat-hun ê sî lâm-hong kéng ji̍t-chí seng chhiáⁿ lâng-kheh, Sòa-chiap lú-hong chiah pān-toh. Khó-lêng sī lâm-pak hong-sio̍k bô-kâng, a̍h-sī giân-gí piáu-ta̍t têng-tâⁿ, Tì-sú lú-hong tòng-chò goán tông-ì tēng-hun kah kiat-hun beh kāng chi̍t-kang chìn-hêng. Tī bo̍k-bêng-kî-biāu, hâm-hâm-hô͘-hô͘, hoaⁿ-hoaⁿ-hí-hí tang-tiong, hō͘ lú-hong soán-te̍k tēng-hun kah kiat-hun ê ji̍t-chí. In-ūi hāu-seⁿ tī pak-pō͘ chia̍h thâu-lō͘, Pòaⁿ kó-goe̍h āu, hāu-seⁿ kóng tēng-hun kah kiat-hun ê ji̍t-chí tùi-hong lóng soán hó ah, Lóng soán kāng chi̍t-ji̍t tī Thô-hn̂g pān tēng-hun gî-sek, Sòa-chiap kiat-hun iàn-kheh. Góa siūⁿ chit-siaⁿ hāi-liú-liú ah, ná-ē bú chit-chhut–ê, Góa siūⁿ kóng lú-hong kám-sī gō͘-kái góa ê ì-sù. Chit-tùi sin-lâng khai-sí tī pak-pō͘ chún-pī in ê hun-lé, Kì-jiân tāi-chì í-keng án-ne teh chìn-hêng, Ūi-tio̍h siang-hong hô-hâi chí-hó niū-pō͘, Hāu-seⁿ sin-pū tī 2020 nî 12 goe̍h 24 seng teng-kì kiat-hun, Tàu-taⁿ iáu-bōe chhiáⁿ lâng-kheh.

Kì-jiân tāi-chì kàu chit-ê khám-chām, Thàn hāu-seⁿ sin-pū tńg–lâi kòe-nî, Góa sū-sian ū kah bo̍k-su, hāu-seⁿ chham-siông hó-sè, 2021 nî 2 goe̍h chhe 10, Kū-le̍k 12 goe̍h 29 tī Tōa-chhiū kàu-hōe chò ka-têng lé-pài, Ūi chit-tùi sin-lâng chiok-hok, In-ūi nā beh tī kàu-hōe pān kiat-hun sek to͘-ha̍p bē tú-hó. Thàu-kòe kán-tan ê gî-sek tī kàu-hōe hō͘ bo̍k-su chèng-hun, Sin-lông kah sin-niû lóng bô chhēng lé-ho̍k, m̄-sī kiat-hun-sek, Sī kán-tan ê ka-têng lé-pài, Pēng-bô iau-chhiáⁿ chhin-lâng pêng-iú chham-ka. Goán choân-ke 5 lâng chá-sî 9 tiám tùi Lō͘-tek chhut-hoat, Kàu Tōa-chhiū kàu-hōe chiah 9 tiám 45 hun, Chún-pī hó-sè kā bo̍k-su kóng 10 tiám khai-sí, Bo̍k-su thàm-thâu khòaⁿ gōa-kháu kóng：10 tiám 10 hun chiah khai-sí.

Kòe chi̍t-tiap-á-kú, Hiông-hiông lé-pài-tn̂g gōa-kháu chhut-hiān chi̍t-tâi chhia, Chhia-mn̂g phah-khui sī chi̍t-ê se̍k-sāi ê bīn-khóng Ki-liông hiaⁿ, Sòa–lo̍h-khì, Chhia chi̍t-tâi chi̍t-tâi sái-ji̍p kàu-hōe ê thêng-chhia-tiûⁿ, Góa chi̍t-sî gông-ngia̍h, ná-ē hiah-nī chē kàu-hōe ê hiaⁿ-tī chí-moāi lâi chham-ka goán ê ka-têng lé-pài, Hó-iú Bí-hâ choan-têng sàng chi̍t-sok hoe lâi hō͘ goán sin-pū. Pún-chiâⁿ sī beh chò kán-tan ê ka-têng lé-pài, Sòa ián-piàn sêng chi̍t-tiûⁿ ì-gōa ê hun-lé. Ì-gōa ê hun-lé sī sin-lông kah sin-niû bô chhēng lé-ho̍k, Ū 2 ê bo̍k-su pang in chèng-hun, Ū chi̍t-kûn goán bô iau-chhiáⁿ m̄-chai tùi tó-ūi thiaⁿ-tio̍h hong-siaⁿ, Cháu lâi kàu-hōe kā goán chiok-hok chiah-ê chin ū-sim ê hiaⁿ-tī chí-moāi. Ì-gōa ê hun-lé tī ì-gōa ê hoaⁿ-hí tang-tiong chìn-hêng, Bo̍k-su ê chèng-tō hiaⁿ-ché ê chiok-koa, Chi̍t-siaⁿ chi̍t-kù lóng kheh-tiâu tī goán ê sim-lāi. Kám-siā Siōng-tè, Kám-siā hiaⁿ-tī chí-moāi ê chiok-hok, Kám-siā ta̍k-ke thè goán mî-pó͘ ûi-hām ê khang-chhùi. Goân-pún pān chi̍t-toh an-pâi beh kah bo̍k-su choân-ke chū-chhan, In-ūi chit-tiûⁿ ì-gōa ê hun-lé, Tiong-tàu lóng-chóng pān 3 toh, tī ì-gōa, hoaⁿ-hí, gông-ngia̍h tang-tiong oân-sêng chit-tiûⁿ siōng ì-gōa ê hun-lé.

Hông-un Goân-hâm kiat-hun chiok-sû

Hông-tô͘ tāi-tián hó chiong-lâi, Un-tián móa-móa hok móa-chài, Kám-siā Siōng-tè chhe thiⁿ-sài, Un sù hēng-hok tōa bú-tâi.

Goân-hâm un-jiû lâng-lâng ài, Hâm-ióng chhut-chiòng thiam kong-chhái, Ti-chêng ta̍t-lí hó thài-thài, Chiok í hia̍p-chō͘ hó ang-sài.

Ki-tok sìn-gióng kiat liân-lí, Hông-un sim-lāi chí-ū lí, Sèng-keng tō-lí ài kín-kì, Lêng-siu kî-tó bô thêng-chí.

Ti chhù pē-bú sioh-miā-miā, Goân-hâm ǹg-bāng lí lâi thiàⁿ, Sìn-gióng bô phian ài sì-chiàⁿ, Tòe Chú kha-pō͘ Hiòng-chêng kiâⁿ.

讀給你聽