【台語世界／錄音】台語詩創作三首

文／蘇敬閔(So͘, Kèng-bín)
(高雄市茄萣仔國小5年生)

指導老師：蘇晏德

一、拍籃球

拍籃球真趣味
拍贏莫得意
拍輸莫放棄
拍籃球hō͘我笑微微
神準功夫足神奇
無拍籃球我會死
籃球籃球我愛你
你是我人生ê開始

台灣字（白話字）版

Phah nâ-kiû

Phah nâ-kiû chin chhù-bī
Phah iâⁿ mài tit-ì
Phah su mài hòng-khì
Phah nâ-kiû hō͘ góa chhiò-bi-bi
Sîn-chún kang-hu chiok sîn-kî
Bô phah nâ-kiû góa ē sí
Nâ-kiû nâ-kiû góa ài lí
Lí sī góa jîn-seng ê khai-sí

二、阿爸ê工課

阿爸ê工課真辛苦
伊像一隻用心ê猛虎
Hō͘我感覺足恐怖
有時伊真糊塗
Kā椅仔當做地舖
伊講阮大漢若欲有前途
愛認真讀冊行光明路
阮知影阿爸ê辛苦

A-pah ê khang-khòe

A-pah ê khang-khòe chin sin-khó͘
I chhiūⁿ chi̍t-chiah iōng-sim ê béng-hó͘
Hō͘ góa kám-kak chiok khióng-pò͘
Ū-sî i chin hô͘-tô͘
Kā í-á tòng-chò tē-phō͘
I kóng goán tōa-hàn nā beh ū chiân-tô͘
Ài jīn-chin tha̍k-chheh kiâⁿ kong-bêng lō͘
Goán chai-iáⁿ a-pah ê sin-khó͘

三、阿爸ê手

阿爸是我ê靠山
Kā阮全家黏相倚 逐工做工lóng流汗
為著全家ê生活
M̄驚寒也m̄驚熱
食飽koh ài鬥洗碗
工課lóng總做bē煞
任何重物伊lóng搬

A-pah ê chhiú

A-pah sī góa ê khò-soaⁿ
Kā goán choân-ke liâm sio-óa
Ta̍k-kang chò-kang lóng lâu-kōaⁿ
Ūi-tio̍h choân-ke ê seng-oa̍h
M̄-kiaⁿ kôaⁿ iā m̄-kiaⁿ joa̍h
Chia̍h-pá koh ài tàu sé-óaⁿ
Khang-khòe lóng-chóng chò bē soah
Jīm-hô tāng-mi̍h i lóng poaⁿ

讀hōo你聽