【台語世界】台語文學史內底ê三大運動

文／邱偉欣

台語，chêng kàu-taⁿ，m̄-bat成做殖民者透過教育系統推廣ê通用語。所致，台語文學mā一直徛tī lím墘ê所在teh發展。台語文學史是前人行- -過，一條坎坷ê路，路- -ni̍h有三ê顯目ê路站碑，he著是三pái ê台語運動。

頭pái ê台語運動發生tī日本時代ê 1930 – 1935 chit段期間，一般叫伊臺灣話文運動。Chhōa頭運動- -ê是漢文舊文人，比論賴和、黃石輝、楊華……chit寡人。運動有三ê重點：漢字台語書寫、言文一致實踐kap文藝大眾化。Kō͘漢字做智識車載ê舊文人上致重- -ê是漢字ê音kap意，所以chit-pái運動有真大部份teh會「beh án-chóaⁿ用適當ê漢字書寫台語」。In有討論著一寡台語漢字書寫ê困境kap解決方法，mā有產生一寡台語ê漢字理論、台語散文kap小說ê作品，m̄-koh落尾phēng無一个明確ê結局。Kan-taⁿ留落來一場漢字戰爭 – 臺灣話文佮漢文、中國白話文鬥爭 – ê khî。

第二pái ê台語運動發生tī 1970s – 1980s，是台灣外口ê海外台語運動。因端是台灣島內ê政治力頭捏kah hō͘台灣人bōe得出聲，台灣ê語言使用mā受國語運動ê強姦kap thún-ta̍h。台語ê使用kap書寫tī台灣島內流血流滴欲死盪幌，流浪海外ê台灣人tī一般生活kap公開演講lóng會得自由使用台語，mā chhōe著sàng-sò͘ ，用漢字kap羅馬字透濫ê書寫，繼續台語文學，hō͘強欲絕氣ê台語koh再活跳。1975年，黃武忠牧師kap chē-chē有志tī美國New York成立「台灣語言研究及推廣中心」，sòa後，出版冊、雜誌等等，成做chhōa-niá台語文學向前ê機關車。Siăn-pái李豐明、胡民祥、簡忠松……，in書寫台語來連結bōe-tàng轉- -去ê故鄉，寫出- -ê是hō͘人凝心koh感慨ê「烏名單台語文學」ah。

頂面講- -ê台語海外運動主要是tī美國，m̄-koh，離開台灣ê台語其實一四界lóng有teh puh-íⁿ，比論tī日本，王育德ùi 1960年代起，著有tī日本ê台灣人社群內底teh骨力chhui-sak台語；伊創辦《台灣青年》，自費出版台日對譯辭典《台灣語常用語彙》，家己發明「王一式」「王二式」，mā有寫台語散文，最後翻頭khioh白話字做台語ê書寫工具。王育德對台語ê理論建構，拍算是海外台語運動- -ni̍h出力上chē- -ê。

第三pái ê台語運動著是1987解嚴前後到taⁿ，台灣島內ê母語復振運動。Tòe政治桶箍束縛ê pàng-lēng kap台灣意識ê chhèng起，鑿枷消失，台灣人精神起來- -lah。Tī海外流浪ê台語文學總算轉來到台灣。起頭，有一座連繫海外kap台灣ê橋 – 《台文通訊》，伊1991年創刊，1992年tī台灣設立聯絡處，海外、台灣siāng時發行出刊。1997年以後，《台文通訊》換hō͘李江却台語文教基金會發行，kui欉徙栽轉來台灣，當然，漢羅濫ê台語書寫mā tòe來台灣釘根。漢羅濫寫解決長期漢字使用欠標準ê問題，chiâⁿ做現代台文上主流ê書寫法。80年代到taⁿ，chē-chē漢羅濫ê台語文學雜誌kap冊出世，其中，1999年出版ê《阿瑛！啊！》（張聰敏遺著）káⁿ m̄是台語復振運動內底，全民書寫台語文學ê見證？

歷史是過往ê痟狗湧pha tī海岸ê見證，lán是徛tī第三pái台語運動chit湧內底ê人。台語運動是台灣人ê百年追求，未來ê台語文學，著看lán án-chóaⁿ用心計較！