〈專文〉黃國昌PK傅崐萁

文/劉重義

支那黨和民眾黨內底的支共卒仔，大概攏著聽支共政協主席王滬寧的指示。有美國智庫方面的支那問題專家，認為王是上可能的習近平接班人。所以，咱看著台灣這寡痟想出頭的支共卒仔，攏極力相爭展現無保留、祙見笑巴結境外敵人的奴才行為，希望受王重視重用。遮是在遭受外來勢力壓迫的社會，攏會出現的背叛家己所徛起的社會的不幸現象，彼種人著是社會的雜質敗類！

傅崑萁在舊年4月著導17個支那黨立委去拜見王滬寧，轉來台灣了，支那黨立委開始和民眾黨立委合作，露骨立法大亂台灣社會的政治秩序，了後嘛阻擋台灣安全防衛的發展，並且強立法予支共通合法滲透、入侵台灣，目的攏是在替習近平妄想的2027支共武力併吞台灣，鋪設內應據點和通路，並且企圖強化在法理上有內戰名義，通制止國際社會干涉支共侵犯台灣。

支那黨和民眾黨彼種背叛台灣的努力，是要予王滬寧會當向習近平交出一張，協助2027併台準備的媠成績單。真可能會予習近平錯誤地感覺時機成熟，殘殘對台灣動武拚看邁。

對支援支共併吞台灣的努力，民眾黨立委因為人數少，到目前顯然咁哪是做走桌苦勞仔角色，傅崐萁搶著較大的功勞。硬要爭出頭的黃國昌當然呣甘願咁哪替傅崑萁提皮包予伊加分數，所以無管甚麼代誌，差不多連半暝家己睏摔落眠床腳，嘛要尋理由牽拖，拚性命大聲吠賴清德。

大罷免是台灣人抗支保台的自救運動，無罷免任何民眾黨立委，黃國昌卻嘛若痟狗四界吠賴清德，若像要予王滬寧注意著伊攏足積極，在替支共吠較重要有推動台獨傾向的賴清德。黃國昌，你是和傅崑萁在拚看啥人在王滬寧眼中，較走狗、較奴才嗎？